Kohelethu 6 - KITABU KITAKATIFU

Kuvula Kusuuvira mu Vutugi

¹ Voveyeho vudamanu vundi vwamali kolola mu kivala, na voveeye vuliduhu ku vandu.

² Nyasaye ahaanaa ku mundu vutugi, miandu kandi luyali kandi vindu viosi via yenya. Navuzwa sialekaa mundu kusangalira vindu yivi mba. Navuzwa mundu mugeni utamanyikani alavisangalira. Yaga gaveeye vuzwa, kandi gaveeye gokovereirza.

³ Mundu anyala kuva na vana 100, kandi amenye mihiga minyingi, sikeveeye kindu kuva ni limenya litambi niiva avula kusangalira vulahi vwi vindu yivi, kandi avuli konyoora liyavirwa lilahi; maku ndakavooye ndi, mwana wivuliiywi nakuzi, aveeye mulahi kumuvita.

⁴ Ni vuzwa mwana uyu kwivulwa kigira agoteraa mu kisundi ma yivililwa.

⁵ Sialola vulavu vwi lidiku mba, anoho kumanya kuli limenya liveeye, navuzwa mwana uyu umali konyoora vosoosi.

⁶ Kali niiva alamenya mihiga 2,000, na avuli kusangalira limenya, kali ndio vombi vazizaa havundu harara.

⁷ Vandu vakora miyinzi jaavo josi kunyoola vindu via valia, navuzwa si vanyoola vindu vivaduuka mba.

⁸ Mundu mugeri avitaa ndi mundu musiru? Ni vulahi ki vwu mundu mudaka akolaa aduuki kumanya kuli anyala komenya?

⁹ Ni vuzwa; gaveeye kuli kudidikana nokolonda imbuza. Ni vulahi kuvugilira cha oveeye nacho kuvita kwenya kindu kindi vuli kazozo.

¹⁰ Vuli kindu choosi chekoleka chaali ni chalohizwa kale, kandi kumanyi vulahi ndi mundu sianyala kuhangala nu mundu oveeye ni zinguru kumuvita mba.

¹¹ Lwa uzizagilira kuhangala kanyingi nilwo lwa voveeye vuzwa, kandi siulava vulahi mba.

¹² Mundu anyala kumanya ndi kindu keveeye kilahi ligali ku mundu wundi mu inyinga engekeeke yiyi. Livamwoyo lilie liveeye vuzwa kandi livitaa kuli chiriri. Mundu anyala ndi kumanya kiliekoleka mu kivala ni yakamala kukuza?