Kohelethu 5 - KITABU KITAKATIFU

Utalomba Lilagana lia Vwangu mba

¹ Ohenze vogeri lwa wingira mu Litembeli lia Nyasaye. Voveeye vulahi kwingira mu nu kwiga kuvita kuhaana visiuviliru kuli vandu vasiru vakora, vandu vatamanyi vulungi nu vudamanu.

² Uganagane ligali imbiri wu kikiri komoloma kindu, kandi utalomba lilagana lia vwangu ku Nyasaye mba. Nyasaye aveeye mwigulu na ivi oveeye hasi, kunangwa utavoola makuva manyingi kuvita ga wenyaa kovora mba.

³ Lwa ohenderaa kindu mbitilira, ni lwo lwa unyala kuva na maloto madamanu, lwa omoloma mbitilira, ni lwo lwa unyala kovora makuva gu vusiru.

⁴ Kunangwa lwa olomba lilagana na Nyasaye, uduukizi lilagana liilio vwangu kuli ganyalika. Nyasaye siaveeye no vokonyi na vasiru mba. Okole kuli walaga.

⁵ Vwakaveeye vulahi kuvula kulaga kuvita kulaga ma uvula kuduukiza lilagana liilio.

⁶ Utaleka makuva googo gakuhili mu vwoni mba, kunangwa uduuki kovoolera vasaalisi va Nyasaye ndi sivwaali vulaliri vuvwo kokora ndio mba. Kigira ki okole Nyasaye ave nu vutima na ivi? Kigira ki oleke Nyasaye yononyie vindu via wayinzilira?

⁷ Maloto manyingi na mang'ana manyingi si gaveeye ni kivune mba; gakuduukiraa utie Nyasaye.

Vutugi Voveeye Kindu mba

⁸ Utagenya lwa olola vwamihi nivudambizaa vadaka kandi ni vuvagayaa konyoola vulungi ni lienya liavo mba. Mwimiliri oveeye munene akingaa vuli mwimiliri wundi oveeye hasi kuye, na vimiliri yava vombi vakingwa nu mwimiliri oveeye igulu kuvo.

⁹ Kali mwamihi amenyaa kigira ligesa litulaa mu milimi.

¹⁰ Niiva wayanza mabese, si galakuduuka mba; niwegombaa kuva mutugi, si ulanyora viosi via wenya mba. Viosi viveeye vuzwa.

¹¹ Lwa uva nu vutugi vunyingi, kandi ulava na vandu vanyingi vukulihiza. Madanyi goosi gaonyoola ni kumanya ndi oveeye mutugi.

¹² Avayinziri vanyara konyoora anoho vavuli konyoora vindu via vaduukana kulia, navuzwa vanyara kuva ni zindoolo zindahi vudiku. Navuzwa vatugi vaveeye navio vinyingi, vivakolaa vave ni zing'anagani zinyingi zivalomba vavuli kogona vudiku vwosi.

¹³ Mali kolola kindu kidamanu ligali chekoleka mu kivala yiki: Mutugi aviikaa vutugi vwivwe kuduuka vwirana kumusaliriza,

¹⁴ maku avogotizira kunzira itaduukanaa: Lwu kumalirika, siatigala ku ni vindu viukuhaana ku vana veve mba.

¹⁵ Kuli yatura munda mwa mama weve, kandi alilana ndio chahonyo kuli yaza; sializia ni kindu kutura ku miyinzi jije, chanyala kuginga mu makono geege mba.

¹⁶ Si voveeye vulahi mba! Kuziiza kuli kwaza, kokoraa miyinzi nikudidikana kugumira imbuza, navuzwa si konyoora kindu mba.

¹⁷ Komenya limenya liu mu kisundi kandi mulivelera, muvudegelu, mu vutima kandi mu vulwaye.

¹⁸ Yaga nigo gandakumanyiliza; kindu kilahi kidukanaa mundu kokora ni kulia, nu kunwa nu kusangalira vindu viayayinzilira mu madiku makekeeke ga Nyasaye yamuha mu kivala. Yiki ni kidieli chu mundu.

¹⁹ Niiva Nyasaye alahaana ku mundu vutugi ni miandu no koleka asangale muvio, gamudukira asandizi kandi asangaliri miyinzi ja makono geege. Yiki ni kihanwa kutura ku Nyasaye.

²⁰ Kigira Nyasaye umali kumuvugilira kuva nu vuyanzi, sialahenda mwoyo kigira livamwoyo liveeye limbi mba.