Kohelethu 4 - KITABU KITAKATIFU

¹ Maku ndaalora vuchamu vwosi vwekoleka mu kivala yiki. Avandu vadaambizwa vaalira, nu mundu siyaaliho uwaali unyala kuvakonya mba. Siyaaliho nu mundu waali unyala kuvakonya, kigira avadamibzi vaavo vaali ni zinguru kuvavita.

² Ndaaganagana ndi, avandu vaakuza vaveeye vulahi ligali kuvita yavo avakikiri mwoyo.

³ Navuzwa voveeye vulahi ligali ku vavura kwivulwa, yavo vavura kolola uvudamanu vwekolekaa mu kivala yiki, vulahi ligali kuvita vombi, niyavo avakikiri kwivulwa, avakikiri kolola uvudamanu vwekolekaa mu kivala yiki.

⁴ Maku ndaalora ndi, vuyinziri vwosi vudinyu kandi limanya lie miyinzi litulana niliegomba lie minyinzi ju mutende. Yaga goosi kandi gaveeye vuzwa kandi gaveeye vuzwa kuli kudidikana no kolonda imbuza.

⁵ Mundu musiru asuraa kuyinzira madaka chukulia, kandi akuza kigira inzara.

⁶ Voveeye vulahi kuva nacho kekekeeke mu mirembe, kuvita kuhandalara zing'inga ziosi kudidikana nu kugumira imbuza na makono gombi.

⁷ Kandi mali kolola kindu kindi mu limenya liu mundu ekeveeye vuzwa mu kivala.

⁸ Haveeye ho nu mundu omenyi yeng'ine. Siaveeye nu muyaayi mba, anoho amwavo mba, navuzwa ayinziraa zing'inga ziosi. Vutugi vwaveeye navwo si vumuduukaa mba; ayinziliraa vwaha vudinyu konyoora, navuzwa avula kwiyaanziza? Yiji kandi jiveeye miyinzi ja vuzwa kandi jo koveleriza.

⁹ Ni vulahi kuva vaviri kuvita kuva mulala, kigira madanyi gi miyinzi jaavo gaveeye malahi.

¹⁰ Niiva mulala alagwa, wundi alamusingiriza. Navuzwa niiva mundu aveeye yeng'ine magwi, voveeye vudamanu ligali, kigra siaveeyeho nu mundu umuvukiza mba.

¹¹ Kandi niiva vaviri valagona harara valava nu luya, navuzwa mundu mulala yeng'ine anyala ndi kuva nuluya?

¹² Vandu vaviri vanyara kulwana kandi vaguuti mundu mulala wi zinguru kuvita mundu mulala kulwaana naye. Mugoye guvasiywi ni migoye jivaga sigunyala kukalika mba.

¹³ Muyaayi oveeye mudaka kandi mugeri aveeye vulahi kuvita mwami muhindira kandi musiru utanyala kuvugilira miigizu,

¹⁴ Kali niiva yatura mu vuhambe nazia ku vwamihi anoho mu kivala chu vwamihi vwivwe, yiivulwa mudaka.

¹⁵ Ndaaganagana ku vandu vosi avamenyi mu kivala yiki. Ndaalora ndi hagati haavo, aveeye ho nu muyaayi mulala waza avuguli vogono vwu mwami.

¹⁶ Sikeveeyeho ne keheri ku vunyingi vwa vandu vu mwami yamiha mba. Lwu mwami uyu akuzaa, siaveeyeho nu mundu unyala kusandiza ku goosi ga yakola mba. Yaga gaveeye vuzwa. Gaveeye vuzwa kuli kudidikana nokolonda imbuza.