Kohelethu 10 - KITABU KITAKATIFU

¹ Kuli ziinji zikuzi zilomba maguta gu muhomo kufunya vugundu, nindio vusiru vokekeeke vwononyia vogeri vonene nu luyali.

² Mwoyo gwu mundu mugeri gokolaa vindu vilahi, navuzwa mwoyo gwu mundu musiru gokolaa vindu vidamanu.

³ Vusiru vwivwe vulaloleka kali ku vageni lwayaganaa navo kunzira. Yelolekizaa ku vuli mundu ndi aveeye musiru.

⁴ Niiva mwami woovo alava nu vutima naivi, utang'oda ibarwa yokoleka miyinzi mba. Niiva ulakilingana, hawundi alakusamiiha vudamanu vuvwo vonene vwa uva nokoli.

⁵ Yivu nu vudamanu vwandoli mu kivala vwa vamiihi valeta.

⁶ Avandu vasiru vahevwa vwiyangu vwu kuhaana malago, navuzwa vandu vatugi valekwa.

⁷ Ndaalora vatugwa nivagenderaa ku zibarasi, navuzwa vasaza vamenyi munyumba yu vwami vagenda ku vilenge kuli vatugwa.

⁸ Oyo ulimaa liliina, alakagwi mulio. Enzoka ilakalumi oyo uvitira mu lidigi.

⁹ Oyo utigulaa magina galamusaliriza. Oyo wisiaga zingu, yiviika mu vuhimwa nazio.

¹⁰ Niiva imbaazi iduhi ma uvuli kugihiagala, ulatumikira zinguru lwa ugiyinzilira. Navuzwa ovogeri vokonyaa mulala kuguuta.

¹¹ Niiva enzoka ilakuluma nikikiri kohomatizwa, muhomatizi siaveeye no vokonyi mba.

¹² Chu mundu mugeri avoora kimuleteraa luyali, navuzwa musiru adivizwaa na makuva geege mwene.

¹³ Mundu musiru atangaa limoloma makuva gu vusiru ma maliriza na makuva machamu gu vulalu.

¹⁴ Mundu musiru amolomaa makuva manyingi ga vuzwa. Siaveeyeho nu mundu unyala kumanya kizizaa kwekoleka mba, kandi sihaveeyeho nu mundu unyala kokovoolera kindu chaza chekoleke ni kwakakuza mba.

¹⁵ Miyinzi ju mundu musiru jimuluhizaa kandi siamanyi inzira izizaa mu lidaala mba.

¹⁶ Kivala kevezaa mu vudinyu lwu mwami wacho aveeye muyaayi, na vimiliri vacho vaveeye mulisaangala lie lilia vudiku vwosi.

¹⁷ Kivala kiveeye ni ingavi niiva keveeye nu mwami welomberaa zing'anagani zizie, kandi niiva avamihi valiza ku ing'inga idukanaa, avilindaa kandi vatahambikaa mba.

¹⁸ Mundu naveeye mugata kosohekela inyumba yeeye igulu, imbura ilakuba mu, na inyumba yiyi ilagwa.

¹⁹ Kolomba lilia linyingi likokolaa kuva nuvuyanzi, kandi iwaini ekokolaa kuva nuvusangali, navuzwa mabese gaveeye mativuli ku kindu choosi.

²⁰ Utadula mwami mba, kali mu zing'anagani zizio mba, kandi utalama vandu vatugi mba, kali have havundu hivisu mu keng'oze chicho cho kogona. Linyonyi linyala kuginga makuva googo ma livavoolele goosi ga ovooye.