Kohelethu 1 - KITABU KITAKATIFU

Limenya Liveeye Vuzwa

¹ Yaga na makuva gu mwilwazi muyaayi wa Daudi, waali mwami wa Jerusalemi.

² Mwilwazi yavoola ndi, voveeye vuzwa, vuzwa! Livamwoyo liveeye vuzwa, vindu viosi viveeye vuzwa.

³ Mundu anyoora kindiki ku miyinzi midinyu josi jakola mu kivala?

⁴ Makura na makura gaaza ni gaazia, navuzwa lirova limenya mihiga ni mihiga.

⁵ Liuva litongaa kandi liyera, kandi lididikana kwirana halituli.

⁶ Imbuza ihuuzaa nizia Isavaalu, kandi ihuuzaa nizia Ivaale; kandi ihuuzaa nevodong'ana niyirana hitangiyi.

⁷ Migera josi jizizaa munyanza, navuzwa inyanza si yizula mba. Amazi giranaa wi migera gitangiraa, kandi gatanga kwirana munyanza.

⁸ Vindu viosi viluhi, liluha linene ligali liu mundu anyala kuvula kovora. Zimoni si ziluhaa kolola mba, kinga matui si gizuraa lihulira mba.

⁹ Kindu keveeyeho kalunu, nicho kilivaho, kandi kindu kimali kokolwa kilakakolwi kandi. Si keveeyeho ni kindu kegeni mu kivala choosi mba.

¹⁰ Avandu vavoola, “Henza, yiki ni kindu kegeni?” Chaliho kutura kale, kandi chaliho kunyi nikukiri kuvaho.

¹¹ Siaveeyeho nu mundu wizulizaa vindu viekoleka mu ing'inga ya kale mba, anoho siaveeyeho nu mundu wizulizaa vindu viaza viekoleke mu madiku gaaza ku yavo avaazaa vivulwi mba.

Vogeri Vovee ni Kivuni mba

¹² Inzi mwilwazi, ndayamiiha kuli mwami wa Isiraeli mu Jerusalemi.

¹³ Ndaatovora ndi ndahenzeriza kandi ndenyeleriza no vogeri vwange vindu viosi viekoleka mu kivala yiki. Yigu nu muyinzi mudinyu gwa Nyasaye amali kuviika ku vandu.

¹⁴ Mali kolola vuli kindu choosi chekoleka mu kivala yiki, na ngovolera ndi, viosi viveeye vuzwa. Gaveeye vuzwa kuli kudidikana nokolonda imbuza.

¹⁵ Siunyala kulungikiza kindu chavedeka, kandi siunyala kuvaliza vindu vitaveeyeho mba.

¹⁶ Ndeevolera, “Inzi mali kuva mundu munene ligali, mugeri ligali kuvita mundu wundi woosi wamihaa Jerusalemi imbiri wange. Inzi manyi vulahi ligali cho vogeri ni limanyiriza viveeye.”

¹⁷ Ndaatovora kwiga liavukana hagati hi limanya nu vusiru, vogeri kandi uvularu. Navuzwa ndanyoora ndi gaveeye vuzwa kuli kudidikana nokolonda imbuza.

¹⁸ Kuva novogeri vunyingi, nilwo lwa voletaa lihenda mwoyo linyingi; kuva nilimanya linyingi, kandi nilwo lwa liletaa vovereri vunyingi.