Joshua 9 - KITABU KITAKATIFU

Avandu va Gibeoni vagada Joshua

¹ Uvuguuti vwa vandu va Isiraeli vwamanyikana ku vami vosi avaari imadioli wa Jorodani, muvivala vie vigulu, vie vireremo kandi viu kulujinga lwi inyanza ya Meditareniani kuduuka ivaale mu kivala cha Lebanoni. Yava vaali avami va vandu va Hiti, Amori, Kanaani, Perezi, Hivi kandi Jebusi.

² Vosi vaavungizana harara nivahambanyia amahi gaavo kulwaana Joshua na Avaisiraeli.

³ Navuzwa avandu va Gibeoni avaari Avahivi, vahulira aga Joshua yakola ku lidaala lia Jeriko na Ayi,

⁴ na vatovora kumugaada. Vazia nivanyoora chukulia nivakinyinya ku zibunda ziavo mu magunia makuulu gatanduka kandi nizimuya zie waini ziakubwa viraka.

⁵ Viviika zinguvu ziatanduka nivilato iviakubwa viilavi, migadi ja vaali najo jaali miumu na ijakuba uluguku.

⁶ Maku vazia ku Joshua hokososa ha Giligali, nivavolera Joshua harara na vandu va Isiraeli, “Kuuzi kutura mu kivala chihale ligali; kwenyaa mulombe lilagana harara ni kunyi.”

⁷ Navuzwa avandu va Isiraeli vavoola, “Kigira ki kolombe lilagana ni munyi? Hawundi mumenyi ahimbi hano.”

⁸ Vavoolera Joshua, “Kunyi koveeye mu vutumiki vuvwo.” Joshua yavateva, “Munyi muveeye vaaha? Muturi hayi?”

⁹ Kunangwa vamuvolera ulugano yilu: “Kunyi kutuli mu kivala chihale ligali, Omwami, kigira kumali kuhulira amakuva ga Yahova Nyasaye winyu. Kumali kuhulira amakuva gi vindu viosi via yakola mu Egebeti,

¹⁰ kandi aga yakola ku vami vaviri va vandu va Amori, Ivugwi wu mugera gwa Jorodani; Omwami Sihoni wa Heshiboni kandi mwami wa Ogu wa Bashani uwamenyaa mu Ashitarozi.

¹¹ Aviimiliri viitu na vandu vosi avamenyi mu kivala chietu vakovolera kuvuguli viukulia kwetegeke kologendo kuzia kwagana ni munyi. Kovoleeywe kwiviiki mu vutumiki vwinyu kandi kumuteeve mulombe lilagana ni kunyi.

¹² Loli migadi jietu. Lwa kwatula yengo najo, nikutanga logendo lwu kuuza kumwaganira, jaali nijikikiri mihiu. Navuzwa heenzi! Kalunu simali kwuma kandi jimali kuva nuvuguku.

¹³ Lwa kwizuliza zimuya zie waini yizi, ziali nizikikiri zimbia, navuzwa heenzi! Zitanduki. Zinguvu zietu nivilato vietu vitanduki kuturana nologendo lutambi.”

¹⁴ Avandu va Isiraeli vavugilira vilala ku viukulia, navuzwa sivateeva likuva kutura ku Yahova mba.

¹⁵ Joshua yalomba lilagana liuvulina harara na avandu va Gibeoni kandi navavugilira vave mwoyo. Aviimiliri va vandu va Isiraeli vahaana lisuuviriza liavo lie liesuuha kulinda lilagana.

¹⁶ Madiku gavaga inyima wokolomba lilagana na vandu va Gibeoni, Avandu va Isiraeli vahulira ndi avandu yava vaveeye avatende, avamenyi ahimbi ligali kuvo.

¹⁷ Kunangwa vandu va Isiraeli vasamula ku logendo kandi ku lidiku lia kavaga, vaduuka mu madaala mwa vandu yava vamenya: Gibeoni, Kefira, Beorozi, na Kiriazi-Jearimu.

¹⁸ Navuzwa vandu va Isiraeli sivali vanyara kuviita mba; kigira viimiliri vaavo vaali nivalombi lisuuviriza lie liesuuha kuvo mu lieta lia Yahova, Nyasaye wa Isiraeli. Avandu vosi vililira ku aviimiliri vaavo kigira likuva yili.

¹⁹ Navuzwa aviimiliri vosi vavativulira, “Kwamala kolomba lisuuviriza lie liesuuha kuvo mu lieta lia Yahova Nyasaye wa Isiraeli. Kalunu sikunyala kuvasaliriza mba.

²⁰ Kuduuka kuvaleke vave mwoyo kigira lisuuviriza lie liesuuha lietu. Nikuvula kokora ndio Nyasaye alakuha amageri.

²¹ “Leki vave mwoyo, navuzwa vakotenyere zingu kandi vakuziri mu kidaho.” Yaga nigo aga viimiliri vavavolera.

²² Joshua yalaga avandu va Gibeoni valetwe kuye kandi yavateva, “Kigira ki nimukugaada kandi nimukovoolera ndi muturaa ihale ligali, nang'ani mumenyi hano?

²³ Kigira mumali kokora yaga Nyasaye umali kumukalagira. Avandu vinyu valava avatugwa kazozo; vatenya zingu kandi vaginga amazi ga havundu Hatakatifu ha Nyasaye.”

²⁴ Vaativura, “Kwakora ndio mwami, kigira kwiga ndi gaali ligali agiligali Yahova Nyasaye winyu yaali niyamala kulaga mutumikiri weve Musa ahe munyi kivala yiki choosi kandi mwiti avandu vosi avamenyi mu lwa muzia imbiri kwingira mucho. Kwakora ndio kigira kwatihiizwa nimunyi ligali. Kwaali mu vuti vwi livamwoyo lietu.

²⁵ Kalunu kigira koveeye hasi hi zinguru zienyu, mukokole icha muganaganaa keveeye kilahi kandi kilungi.”

²⁶ Kunangwa yiki nicho cha Joshua yakola, yavakinga kandi siyavugilira avandu va Isiraeli vaviiti mba.

²⁷ Navuzwa ku ing'inga ndala nzere zana, yavakola avatugwa, ukwasiaga zingu kandi kugingira avandu va Isiraeli vosi amazi kandi kigira uvwali vwa Yahova. Kuduuka lidiku lia kalunu vazizagiliraa kokora miyinzi havundu aha Yahova amali kotovola asigamirwi.