Joshua 8 - KITABU KITAKATIFU

Avandu va Isiraeli Vadiviza Lidaala linene lia Ayi

¹ Yahova yavolera Joshua, “Vugula avasikari vi liihi vosi vazie harara niivi kandi uzie kuduuka Ayi. Utatia mba anoho utakuza mwoyo mba. Ndakokola uguuti Mwami wa Ayi; avandu veve, lidaala kandi kivala vilava vienyu.

² Ulakola ku Ayi harara numwami walio icha wakola ku Jeriko harara numwami walio, navuzwa ing'inga yiyi unyala kuvugura vilaanye vialio kandi mitugu jalio kuva ivienyu. Mwetegeke kwingilira lidaala linene zana ku liligosa nuluku kutura inyima.”

³ Kunangwa Joshua yetegeka kuzia Ayi harara na vasikari vi liihe veve vosi. Yatovola zielefu salasini ku avasikari valahi veve, naavatuma vudiku,

⁴ namalago yaga: “Mwivisi kolovega lundi lwi lidaala linene, navuzwa mutava ihale ligali kutura kulio mba; mwetegeke kulingilira.

⁵ Avandu vasaza vange vosi ninzi kulisuunda ku lidaala. Lwa vandu va Ayi vatura ichova kulwaana kunyi, na kunyi kulagirung'ana na kwiruki, kuli kwakora vuzwa ing'inga yukutanga.

⁶ Valakolondelera kuduuka lwa kumala kuvahila ihale ligali kutura ku lidaala. Valaganagana ndi kuviirukaa, kuli kwakora maziambiri.

⁷ Maku munyi mulatula aha mugoneki nukuvugula lidaala. Yahova Nyasaye winyu alamuha lidaala zana.

⁸ Nimwakamala kuvugura lidaala zana, mulihaambizi muliru, lihie; kuli Yahova amali kulaga. Yaga nigo malago ginyu.”

⁹ Kunangwa Joshua yavatuma vazie, navo vazia havundu hokogoneka haavo nivalindilira yo imadioli wa Ayi, hagati ha Ayi na Bezeli. Navuzwa Joshua yagona vudiku yivwo hokososa harara na vandu.

¹⁰ Mugambazuri mumavwevwe, Joshua yavuka naalanga harara avasikari vi liihi vosi. Maku, Oyo na viimiliri va Isiraeli vavimilira kuzia Ayi.

¹¹ Avasikari vi liihi avaari naye vazia vulungi ha kirivwa kenene chi lidaala linene zana nivalomba hokososa kolovega lwa ivaale, nalivona liali hagati haavo na Ayi.

¹² Yavugula ahimbi avasaza zielefu zitano navaviika vagoneke lovega lwi imadioli wi lidaala linene zana, hagati ha Ayi na Bezeli.

¹³ Avasikari vi liihi valohizwa kwetegekera vulwani, ahokososa hanene nihaveeye ivaale wi lidaala zana; na avasaza vatigaye nivaveeye kolovega lwi imadioli. Joshua yagona mu livona uvudiku yivwo.

¹⁴ Lwu Umwami wa Ayi yalora vandu va Joshua yakola vwangu. Oyo harara navandu vasaza veve vosi. Vaatura kuzia kolovega lwi livona lia Jorodani kulwaana vandu va Isiraeli havundu havalwaanira maziambiri, natamanyi ndi aveeye ahimbi kwingilirwa kutura inyima.

¹⁵ Joshua harara na vasikari vi liihi veve vigadiza ndi virukaa kwirana inyima, ni virukira mu kivala chi changalangwe.

¹⁶ Avasaza vosi mu lidaala vaali nivalangiywi harara valondelere, lwa vaali nivalondelera Joshua, vazizagilira kwisuunda ihale kutura ku lidaala.

¹⁷ Vuli musaza mu Ayi kandi Bezeli yazia kolondelera vandu va Isiraeli ni lidaala lialekwa nilialami, nilitaveeye vugira mundu wukulikinga.

¹⁸ Maku Yahova yavolera Joshua, “Sona litimu liilio ku lidaala lia Ayi; Ngoheza lidaala yili.” Joshua yakola kuli yavolerwa,

¹⁹ kandi nonoho lwa yaginga mukono gwigwe, avasaza vaali niviivisi vasingira vwangu nivanyagura mu lidaala nuluku, nivaligumira, valihambiza muliru nonoho.

²⁰ Lwa avasaza va Ayi viikivuka, valora umwochi niguduumaa. Sihaali ho ninzira ya virukira mu mba; kigira vandu va Isiraeli aviirukira muchangalangwe, vavingilira.

²¹ Lwa Joshua na vandu veve valora ndi avache vaavo vamali kuvugura lidaala, kandi lihambiziiywi muliru, vagirung'ana kandi nivatanga ukwita avasaza va Ayi.

²² Avandu va Isiraeli avaari mu lidaala, vaza kuhambana navo mu vulwani nivavingilira. Kunangwa vandu va Ayi venyoola nivakumbiriziywi ligali na vandu va Isiraeli, na vosi viitwa. Siyaali ho nuwahononoka anoho uwatigala mwoyo mba,

²³ nataveeye mwami wa Ayi. Yagumirwa kandi naaletwa ku Joshua.

²⁴ Avandu va Isiraeli vita vandu vosi va Ayi mu kiguti kandi mu changalangwe mwa vaali nivavalondeleye. Maku virana Ayi kandi niviita vuli mundu uwene yeyo.

²⁵ Avandu vosi Avasaza na avakali zielefu komi na mbili viitwa lidiku yilio.

²⁶ Joshua siyasingiliza ku vulwani, kuduuka lwa yamala kudiviza vandu vosi avamenyaa mu Ayi.

²⁷ Navuzwa vandu va Isiraeli vaavugura mitugu ni vindu vialanywa mu lidaala kuli Yahova yaali navoleeye Joshua.

²⁸ Joshua yasamba lidaala lia Ayi nalikora live kitumi cha mang'anye mihiga ni mihiga. Haveeye ndio kuduuka kalunu.

²⁹ Yasuunga mwami wa Ayi ku musaala, naleka ku muviri gwigwe kuduuka ha mugolova. Lwi liuva liayera Joshua yahaana malago ndi muviri gwikizwi hasi kandi gusuvwi ha vwingiliru vwi lidaala. Vagufuuma ni kitumi cha magina, agakikiri yo kuduuka kalunu.

Lilaga liasomangwa ha Kiguru cha Ebali

³⁰ Kunangwa Joshua yumbira Yahova Nyasaye wa Isiraeli uvwali ku Kiguru cha Ebali.

³¹ Yavolomba kolondekana na migizu ga Musa, mutumikiri wa Yahova yaaha avandu va Isiraeli, kuli gavoora mu Lilaga lia Musa, “Uvwali vwalombwa na magina agavula kuvazwa ni viju vie kivia.” Vahaana kuvwo vihaanwa viu kusambwa ku Yahova kandi vihaanwa vie mirembe.

³² Ahene yaho, Joshua yang'oda ku magina zana Lilaga lia Musa lia yaali niyang'oda avandu va Isiraeli nivaloraa.

³³ Avandu va Isiraeli vosi, harara na viimiliri vaavo na vanene vaavo, na vakalagi vaavo, harara na vageni vaali hagati haavo, vasingira ku zimbega ziviri zie Lisandugu lie Lilagana nivahenzi avasaalisi, avandu vihiiri ya Levi avaaligiingaa. Inusu ya vandu zana vasingira nivahenzizi migongo ku Kiguru cha Gerizimu, na inusu yindi nehenzizi migongo jaavo ku Kiguru cha Ebali. Mutumikiri wa Yahova Musa, yaali yavalaga vakole ndio lwa ing'inga iduuka yavo vanyoore uvugasu.

³⁴ Kunangwa Joshua yasooma Lilago liosi vudinyu, harara nuvugasu kandi vilaamo, kuli gang'odwa vuzwa mu kitabu chi Lilaga.

³⁵ Vuli lilago ku malago ga Musa gasomwa na Joshua ku livugana liosi lia vandu va Isiraeli, avakali, avana harara na avageni vamenya hagati haavo.