Joshua 7 - KITABU KITAKATIFU

Uvwoni vwa Akani

¹ Avandu va Isiraeli sivalonda lilaga lia Yahova kolondekana ni vindu vienyeka vidivizwi ligali. Mundu walangwa Akani, muyaayi wa Kaumi, mwisukulu wa Zabadi, ekesoni cha Zera, uwi ihiiri ya Yuda, siyaatia lilaga yilio mba, kunangwa Yahova yavihilirwa avandu va Isiraeli ligali.

² Joshua yatuma avasaza valala kutura Jeriko vazie Ayi, lidaala liveeye ivugwi wa Bezeli, ahimbi Bezaveni, namalago ndi vazie kutunyiriza kivala zana yicho. Lwa vaali nivakamara kokora ndio,

³ virana kuhaana amakuva ga valora ku Joshua ndi, “Siliveeye ho ni lienya liu kutuma avandu vosi kuzia kwingilira lidaala lia Ayi mba. Tuma vuzwa ahimbi avandu vasaza zielefu ziviri anoho zivaga. Utatuma yo iliihi liosi mba; siliveeye lidaala linene mba.”

⁴ Kunangwa, ahimbi vandu va Isiraeli zielefu zivaga vazia kulwaana, navuzwa vanigwa ukwirana inyima niviruka.

⁵ Ahene yaho avasaza va Ayi vavakunga kutura mu kirivwa chi lidaala, kuduuka Shebarimu, aha magina gayavwa kandi vita ahimbi vandu salasini na sita kunzira yikisulungutu. Maku vandu va Isiraeli vagotiza uvuluviliri vwavo; kandi vaali nuvuti vonene ligali.

⁶ Joshua harara na viimiliri va Isiraeli vatandula zinguvu ziavo mu vovereri, nivagwa hasi mamumama imbiri wi Lisandugu lie Lilagana, nivava ho kuduuka hamugorova, niviiyuhiyi uluguchi ku mitwi jaavo kumanyia ovovereri.

⁷ Joshua yavoola, “O, Yahova, Wuvunyali! Kigira ki nokoleta engereka wa Jorodani? Kukuhaana ku vandu va Amori vakudivizi? Kijiraki nikuvula komenya kolovega Lundi lwa Jorodani?

⁸ O, Yahova, kalunu mbolaki! Avandu va Isiraeli vamali kwiruka nu kwirana inyima kutura ku vasigu vaavo.

⁹ Avandu va Kanaani kandi navandu vandi vosi mu kivala valahulira amakuva yaga goosi. Valakukumbiriza nukwita vuli mulala ku kunyi! Kunangwa ivi ulakola ki kulinda luyali lwi lieta linene liilio?”

¹⁰ Yahova yavolera Joshua, “Vuka! Kigira ki ogonaa hasi mamumama kuli ndi?

¹¹ Avandu va Isiraeli vamali kokora uvwoni! Vamali kuvunaga lilagana lia ndaavalaga valindi! Vamali kuvugura vilala ku vindu vialagwa viononywe viiva vindu zana, nivaveeha, kandi nivaviviika harara ni vindu viavo aveene.

¹² Yiki nicho kijiri avandu va Isiraeli sivanyala kusingira kulwaana avasigu vaavo mba. Viranaa inyima niviruka kutura kuvo kigira yavo aveene vamali kukalagirwa vadivizwi! Sindava harara ni munyi kandi mba, nimutononyia ivindu via mwalagwa muvuli kuvugura!

¹³ Vuka! Uvavoolere, ‘Mwitakase munyi aveene mu lietegekera mugamba, kigira Inzi, Yahova Nyasaye wa Isiraeli, mbeeye na yaga kovora; “ ‘O, Isiraeli, muveeye ni vindu vilala hagati mu vindu vienyu via ndamulaga viononywe! Simunyala kusingira kulwaana avasigu kuduuka lwa mutuliza vindu yivi hagati hinyu.

¹⁴ Kunangwa uvavoolere ndi mugambazuri, valaletwa imbiri wange, ihiiri ku ihiiri. Ihiiri yandovola kutura muvo valaza imbiri, luhia ku luhia. Luhia lwi ihiiri ya ndovora valaza imbiri wange, inyumba ku inyumba. Inyumba ya ndovora kutura muvo valaza imbiri wange, mundu mulala sa mulala.

¹⁵ Uyu otovolwa na anyoleke naveeye nivindu viakalagirwa alasaambwa harara na vandu vinyumba yeeye kandi nivindu vivie viosi viaveeye navio, kigira umali koleta zisoni ku Isiraeli kandi umali kuvunaga Lilagana liange.’ ”

¹⁶ Mugamba gwalonda ku mumavwevwe, Joshua yaleeta vandu va Isiraeli vosi imbiri wa Yahova, ihiiri ku ihiiri, kandi ihiiri ya Yuda yatovolwa kutura mu zindi.

¹⁷ Yaleeta ihiiri ya Yuda imbiri wi Lihema, uluhia ku luhia, na luhia lwa Zera lwatovolwa. Maku yaleeta imbiri luhia lwa Zera, Avinyumba ku Avinyumba, na avinyumba ya Zabadi yatovolwa.

¹⁸ Maku kandi yaleeta imbiri avinyumba ya Zabadi, mundu sa mulala na Akani, mwana wa Karimi na umwisukulu wa Zabadi yatovolwa.

¹⁹ Joshua yamuvolera, “Mwana wange, mbolera agiligali, hano imbiri wa Yahova, Nyasaye wa Isiraeli, kandi wiganiri. Mbolera kalunu icha umali kokora. Utageriza kukivisa kutura ku inzi mba.”

²⁰ Akani yativura, “Gaveeye agiligali, ndamala kokora vwoni ku Yahova, Nyasaye wa Isiraeli, na yiki nicho cha ndaakola.

²¹ Ku vindu via kwalaanya ndaalora likoti lilahi ligali lia Babiloni, ahimbi zikilo ziviri zie ifeza, kandi kedonye chi izahabu chuvulitu uvuvitaa inusu yi kilo. Ndaavikayirwa ligali ma nimbivugula. Ulavinyoola niviayavilwa musi mu lihema liange, ifeza neveeye ku lwaalo.”

²² Kunangwa Joshua yatuma avandu valala, avanyagura mu lihema yilio nivanyoora ndi ivindu viakalagirwa kugimwa zana viayavilwa ligali mu harara na ifeza ku lwaalo.

²³ Vaavituliza mu lihema, nivavihila ku Joshua harara na vandu va Isiraeli vosi, niviviikwa hasi imbiri wa Yahova.

²⁴ Joshua harara na vandu vosi va Isiraeli, vagumira Akani, ifeza, likoti, kandi kedonye chi izahabu harara na vana va Akani avayaayi navakaana, zing'ombe, zibunda kandi amagondi geege, lihema lilie, kandi ivindu viosi via yaali navio, imiandu jije, kandi vavihila kuduuka mu Livona lia Akori.

²⁵ Joshua yavoola, “Kigira ki oleeti kivi yiki choosi ku kunyi? Yahova alaleeta ikivi ku ivi mwene kalunu!” Avandu vosi vamulasa na magina nakuza kandi valasa vandu vinyumba yeeye na magina kandi nivavasamba harara ni miandu jije josi.

²⁶ Vavungiza kuye kitumi kenene cha magina, ekeveeye yo kuduuka lidiku lia kalunu, yiki nicho chagira havundu yaho nihalangwa Livona lia Akori. Maku Yahova siyaazizagilira kuva nu vutima kuvo mba.