Joshua 6 - KITABU KITAKATIFU

Avandu va Isiraeli vagumira lidaala linene lia Jeriko

¹ Virivwa via Jeriko viahanwa kandi vialindwa vudinyu ligali ukwigalira avandu va Isiraeli.

² Sihaali ho nu mundu kali mulala uwaali unyala kwingira mu anoho kutura ichova wi lidaala linene lia Jeriko mu makono googo, harara nu mwami walio kandi na vasikari valuviliri valio mba.

³ Ivi harara na vasikari vi liihi vovo mulagenda kovodong'ana lidaala linene liosi lulala vuli lidiku ku madiku sita.

⁴ Avasaalisi saba, vuli mulala nagiingi kisiriva che zinziga zie ugoondi limigu, valimilira imbiri wi Lisandugu lie Lilagana. Ku lidiku lia saba, ivi harara na vasikari vi liihe vovo, mulagenda kovodong'ana lidaala yilio haali saba, avasaalisi navo nivakubaa visiliva.

⁵ Maku valakuba visiliva vie zinziga zie ugoondi limigu lulala ku vutambi. Nonoho lwa muhulira lilangilira lie visiliva yilio avasaza vosi valahanzuka nu mwoyo munene, ligali, na amadigi gulugaga lwi lidaala linene galagwa hasi. Maku liihi liosi lilazia vulungi mu lidaala linene.

⁶ Joshua muyaayi wa Nuni yalanga avasaalisi navavoolera, “Vuguli Lisandugu lie Lilagana, na saba ku munyi mwimiri imbiri walio; nimugingi visiliva vie zinzigazia magoondi manigu.”

⁷ Kunangwa yalaga avandu veve vatange ligenda kovodong'ana lidaala linene yilio; harara na vasikari vukulinda nivimiyi imbiri wi Lisandugu lie Lilagana.

⁸ Lwa Joshua yaali niyakamara komoloma ku avandu va Isiraeli, avasaalisi avakubaa visiliva saba vie zinziga zia magondi manigu imbiri wa Yahova, vimila kuzia imbiri, kandi Lisandugu lie Lilagana lia Yahova liavalonda inyima.

⁹ Avasikari vi liihi vukulinda vimila kuzia imbiri wa avasaalisi avakubaa visiliva kandi avasikari vukulinda inyima valonda Lisandugu lie Lilagana. Ing'inga yiyi yoosi, visiliva viali nivikuba.

¹⁰ Navuzwa Joshua yaali nalagi avandu, “Mutakuba luku lwi liihi, mutavooli likuva kuduuka lidiku lia ndimuvoolera mukore ndio kunangwa mulahanzuki!”

¹¹ Kunangwa Lisandugu lie Lilagana liagingwa kovodong'ana lidaala linene zana lulala. Maku avandu yavo nivirana hokososa nivagona mu.

¹² Joshua yavuka mugambazuri na avasaalisi vaginga Lisandugu lie Lilagana lia Yahova.

¹³ Avasaalisi saba avagingaa visiriva saba vie zinziga ziamagoondi mamiguni vimila, nivagenda imbiri wi Lisandugu lielilagana lia Yahova, nivakuba visiliva. Avasikari vi liihi vimila kuzia imbiri wavo kandi avasikari vi liihi va valonda inyima wi Lisandugu lie Lilagana; zing'inga yizi ziosi, visiriva viali nivikubwaa.

¹⁴ Ku lidiku lia kaviri, vavodong'ana kandi ku lidaala linene haali lulala, ma kandi nivirana hokososa. Vaakora ndio ku madiku sita.

¹⁵ Ku lidiku lia saba, vavuuka mumavwevwe ligali kandi nivavodong'ana lidaala linene zana haali saba munzira ndala nzere. Yili lieng'ine liali nilio lidiku lia vavodong'ana lidaala yilio haali saba.

¹⁶ Ku ing'inga ya saba, lwa vasaalisi vaali ahimbi kukuba visiriva, Joshua yalaga avandu vasaza veve vosi vahanzuki, kandi yavoola, “Yahova umali kuha munyi lidaala linene yili.”

¹⁷ Lidaala yili harara ni vindu viosi Iviveeye mu kuduuka vidivizwi vive kihanwa ku Yahova. Natali vuzwa, Rahabu liraya yeng'ine, harara naviiko veve avamenyaa naye munyumba valahonywa, kigira yaavisa avatunyirizi viitu va kwatuma.

¹⁸ Navuzwa mutavuguli kindu ku viosi ivienyekaa viononywe mba. Nimuva nimukora ndio mulaleeta kivi hokososa ha vandu va Isiraeli.

¹⁹ Vuli kindu ichalombwa ku ifeza, izahabu, umugasa ni ikivia kuduuka kiviikwi halovega kulwa Yahova. Kuduuka kiviikwi mu livikiru lia Yahova.

²⁰ Kunangwa avasaalisi vaakuba visiliva. Nonoho lwa vasaza zana vahulira mwoyo gwi visiliva, nigukuba ku lohono, vahaanzuka nu mwoyo munene ligali, na amadigi gulugaga gaagwa hasi. Maku iliihi liosi lia Isiraeli vanigira kiguru vulungi nokwingira mu lidaala linene nivaligumira.

²¹ Vita avandu vosi ligali mu lidaala nivivavi, avasaza na vakali na vana navasakulu. Vita zing'ombe, amagondi ni zibunda.

²² Kunangwa Joshua yavolera avayaayi vaviri yavo avatumikaa kuli avatunyirizi, “Muzie munyumba yu mulaya na mumutulizi ichova harara na vandu vinyumba yeeye, kuli mwamusuuviriza.”

²³ Kunangwa vazia nivatuliza Rahabu ichova, harara na baba na mama weve, avamwavo veve kandi vandu vinyumba yeeye vandi vosi. Vavavugula vosi, vandu vinyumba na avatugwa nivavahila havundu hi mirembe ahimbi na ahokososa ha Isiraeli.

²⁴ Maku vahambiza muliru ku lidaala linene liosi, ma nivalisamba liosi harara nivindu viosi vialimu; nitali ivindu vialombwa ku zahabu, ifeza, mugasa kandi kivia, nivaviviika mu livikiru lia Yahova.

²⁵ Navuzwa Joshua yahonyia livamwoyo lia Rahabu liraya na aviiko veve vosi harara na viosi via yaali navio, kigira yaavisa avatunyirizi vaviri ava Joshua yaali natumi Jeriko visukululwi vivie vamenya mu Isiraeli kuduuka ku ing'inga ya kalunu.

²⁶ Ing'inga yeyo, Joshua yahaana lieganihiza lie liesuuha. “Umundu woosi ogeriza kwumbaka vuhia lidaala linene lia Jeriko alaanwe imbiri wa Yahova!” “Mundu woosi uva naasingiriza misingi jalio alagotiza muyaayi weve wukutanga. Mundu woosi uwumbaka virivwa vialio alagotiza muyaayi weve mukogoti.”

²⁷ Kunangwa Yahova yaali harara na Joshua, kandi ulusuma lwu luyali lwilwe lwalanda mu kivala choosi.