Joshua 5 - KITABU KITAKATIFU

¹ Avami vanene va vandu va Amori vosi kolovega lwi imadioli wu mugera gwa Jorodani kandi avami vanene va vandu va Kanaani avivivala viavo viveeye himbi ninyaanza ya Meditareniani vahulira ndi Yahova ukaminyi Jorodani kuduuka lwa vandu va Isiraeli vaali nivakambuka. Vaatia ligali kandi nivagotiza uvuluviliri vwavo kigira avandu va Isiraeli.

Likevwa ha Giligali

² Maku Yahova yavolera Joshua, “Lomba mivano kutura ku magina madinyu na okeve avasaza va Isiraeli vosi.”

³ Kunangwa Joshua yakola kuli Yahova yaali naamulagi, kandi yaakevera vandu va Isiraeli havundu halangwa “Kiguru che Kekevo.”

⁴ Yiki nicho kivuni chagira Joshua naavakeva: Yavo vosi avaatura Egebeti avasaza vosi avaari vanyara kuzia muvulwani, vakuzira muchangalangwe inyima wu kutura Egebeti.

⁵ Avandu vosi avaatura Egebeti vaali nivamara kokevwa, navuzwa avayaayi vosi vivulirwa mu changalangwe, mu ing'inga yologendo kutura Egebeti, vaali nivakikiri kokevwa.

⁶ Avandu va Isiraeli vagendagenda mu changalangwe ku mihiga arubaini, kuduuka lwa vasaza vosi, avilikula liu kuzia muvulwani lwa vaatura Egebeti, vaali nivakakuza, kigira vavura kuhulira Yahova. Kuli Yahova yaali niyisuuhi, sivavugilirwa kolola kivala cha malova magunamu icha yaali niyamala kusuuviriza ndi alahaana kuvaguuga vaavo mba.

⁷ Avayaayi va vandu yava ava Yahova yasingiriza mu vogono vwavo vaali nivakikiri kokevwa, na ilikula lihia yili nilio lia Joshua yakeva.

⁸ Inyima we kekevo kutweeka, ihiiri yoosi vamenya hokososa kuduuka lwa vahona.

⁹ Yahova yavolera Joshua, “Lidiku lia kalunu ndi, mali kutuliza zisoni ziu kuva avatugwa mu Egebeti kutura ku munyi.” Yiki nicho chagira havundu yaho ni hagulikwa Giligali kuduuka kalunu.

¹⁰ Lwa avandu va Isiraeli vaali nivakemenyi mu hokososa ha Giligali, mu kereremo ahimbi Jeriko, vaali ni lilia lie Lipasaka hamugorova gwi lidiku lia komi na ine liu mweli.

¹¹ Lidiku lialonda ku liali lidiku liu kutanga lia valia chukulia ichataagwa mu Kanaani. Valia vuswage vukalange kandi mugadi gutaveeye mu namamera.

¹² Imaana yalekera kugwa lidiku lialonda ku, na vandu va Isiraeli sivanyoola imaana kandi mba. Kutura ing'inga yene yeyo kudura kalunu, valia chukulia ichataagwa mu Kanaani.

Joshua harara nu mundu wi kivavi

¹³ Lwa Joshua yaali ahimbi Jeriko, nonoho yalora, musaza mulala nasingiyi imbiri weve, nagumiyi kivavi mu mukono gwigwe. Joshua yazia kuye namuteeva, “Ivi oveeye mulala ku vasikari viitu vuvulwani, anoho umusigu?”

¹⁴ Musaza oyo yativura, “Awa,” simbeeye mulala kuvo mba. “Inzi mbeeye hano kuli munene wi liihe lia Yahova.” Joshua yagwa hasi mamumama naamusigamira navoora, “Inzi mbeeye mutumikiri woovo, mwami wange. Wenyaa ngole ki?”

¹⁵ Na munene wi liihe lia Yahova yamuvolera, “Tuliza vilato vivio; kigira usingiyi ku marova matakatifu.” Joshua yakola kuli yavolerwa.