Joshua 24 - KITABU KITAKATIFU

Joshua yamoloma ku vandu va Isiraeli ha Shekemu

¹ Joshua yavuganyia harara zihiiri ziosi zia Isiraeli ha Shekemu. Yalanga avakulundu aviimiliri, avakalagi na vanene va Isiraeli kandi vaza imbiri wa Nyasaye.

² Maku Joshua yavolera avandu vosi, “Yiki nicho cha Yahova, Nyasaye wa Isiraeli, amuvoleraa: ‘Maziambiri avaguuga vinyu vamenya kolovega lundi lwu mugera gwa Efurate nivasigamira avanyasaye vandi. Mulala ku avaguuga yavo yaali Tera baba wa Aburahamu na Nahoro.

³ Ahene yaho, ndavugura Aburahamu, guuga winyu, kutura mu kivala engereka wa Efurate nimwimilira kuvitira mu kivala choosi cha Kanaani. Ndamuha muyaayi weve Isaka, kandi kuvitira mu Isaka, ndamuha visukululwi vinyingi.

⁴ Ndaha Isaka avayaayi vaviri, Yakobo na Esau. Ndaha Esau kivala chi vigulu kuva miandu jije, navuzwa guuga winyu Yakobo harara na vana veve vasulunguta kuzia Egebeti.

⁵ Lwinyima ndatuma Musa harara na Haruni kandi ndaaleeta kivi kenene ligali ku vandu va Egebeti. Navuzwa ndamwimilira kutura mu Egebeti.

⁶ Ndaaleeta avaguuga vinyu kutura Egebeti, kandi vandu va Egebeti vavalondelera namagare gu vulwani, na vasikari vu ku Zibarasi. Navuzwa lwa vaguuga vinyu vaduuka kunyanza Nzakanyu,

⁷ vanira ku inzi mbakonye; na inzi ndaviika lilesi limwamu hagati haavo na vandu va Egebeti. Ndakora inyanza niyiza ku vandu va Egebeti nukuvakunika. Munyi mumanya aga ndakora ku Egebeti. “ ‘Mwamenya muchangalangwe ku ing'inga indambi.

⁸ Ahene yaho, ndamuleeta mu kivala cha vandu va Amori, avamenyaa kolovega lwi Ivugwi wu mugera gwa Jorodani. Valwaana munyi, navuzwa ndahaana ku munyi liguuta. Mwavugula kivala chavo, na inzi ndavadiviza lwa mwavingilira.

⁹ Maku mwami wa Moabu, Balaki muyaayi wa Zipori, yamulwaana. Yatumana muporofeti Balaamu, muyaayi wa Beori, namuteeva aviiki kilaamo ku munyi.

¹⁰ Navuzwa sindavugilira Balaamu aviiki kilaamo kumunyi mba. Muvogono yivwo, ndaamukora naativula uvugasu ku munyi, na munzira yiyi, ndamuhonyia kutura ku Balaki.

¹¹ Mwambuka mugera gwa Jorodani nimuuza kuduuka Jeriko. Avasaza va Jeriko valwaana munyi, kuli vandu va Amori, Perezi, Kanaani, Hiti, Girigashi, Hivi, kandi Jebusi. Navuzwa ndamuha liguuta kuvo vosi.

¹² Ndaatuma amahalamba imbiri winyu, kuvadandanyia nukuvakuunga - kandi avami vaviri va Avaamori. Simwakola ndio ni vivavi anoho uvuta vwinyu. Sizia li zinguru zienyu anoho aveene mba.

¹³ Ni inzi uwahaana ku munyi kivala chavo kandi amadara gaavo. Simwataaga vitagwa ku viosi kandi simwumbaka madaala manene gacho mba. Kalunu mumenyi mukivala yiki cha ndamuha. Mulizaa makuyu gi mazabibu kandi Mizeituni ja mwavura kusimika.’ ”

¹⁴ Joshua yaazizagilira kovora “Kunangwa kalunu; mutie Yahova kandi mumutumikiri. Muve nagiligali kandi nu vusuuvirifu. Mutulizi avanyasaye va vaguuga vinyu vagira kusigamira mu Mesopotamia kandi mu Egebeti; kandi mutumikiri Yahova yeng'ine.

¹⁵ Niiva simwenya kutumikira Yahova, mutovole kalunu ndi ni munyasaye ki wa vanyasaye va avaguuga vinyu vasigamira mu Mesopotamia na vanyasaye va vandu va Amori vasigamira mu kivala cha mumenyi mu kalunu. Navuzwa inzi harara na vandu vinyumba yange, kumali kotovola kutumikira Yahova.”

¹⁶ Avandu vaativura, “Sikulaleka Yahova ukutumikira avanyasaye vandi kandi mba.

¹⁷ Yahova Nyasaye witu yaleeta avababa viitu nikunyi kutura Egebeti uwakwaali avatugwa, kandi kwalola vilolekizu via yakola uwene yeyo. Yakulinda vulahi hoosi ha kwazia hagati he zihiiri zia kwavitira mu.

¹⁸ Lwa kwazia kutura havundu harara hikivala yiki kuduuka ahandi, Yahova yakunga vandu va Amori avamenyaa hano. Kunangwa, kunyi kandi kulatumikira Yahova; oyo yeng'ine aveeye Nyasaye wiitu.”

¹⁹ Joshua yavolera avandu zana, “Navuzwa mutaganagani ndi voveeye vodoto kutumikira Yahova mba. Aveeye Nyasaye Mutakatifu. Yenya mumusigamiri yeng'ine. Niiva musigamira avanyasaye vandi, sialamusamiiha uvwoni vwinyu mba.

²⁰ Nimumuleka kuzia kusigamira avanyasaye vageni, alamugirung'ana nukumuha amageri. Alamudiviza, kali ni yaali mulahi ku maziambiri.”

²¹ Avandu vavoolera Joshua, “Awa! Kulasigamira Yahova!”

²² Joshua yavavolera, “Muveeye avalolekizi ku munyi aveene. Mutovooye kutumikira Yahova.” Vavoola, “Yee, yago gaveeye agiligali, ndi koveeye avololekizi.”

²³ Joshua yavalaga, “Kunangwa muleke avalala ku munyi vakikiri na vanyasaye vageni avamuveeye navo, na musuuviri Yahova, Nyasaye wa Isiraeli.”

²⁴ Kunangwa avandu zana vavoolera Joshua. “Kunyi kulasigamira Nyasaye wiitu, yeng'ine vuzwa. Kulahulira malago geege goosi.”

²⁵ Kunangwa Joshua yalomba lilagana na avandu va Isiraeli ha Shekemu lidiku yilio. Lilagana yilio liali mu na malago kandi miima ja vandu vaduukana valonde.

²⁶ Joshua yang'oda malago yaga mu kitabu chi Lilaga lia Nyasaye. Maku yavugula ligina linene nukuliviika isi wu musaala munene mutakatifu ugwali ahimbi ni lisandugu lie lilagana.

²⁷ Yavolera avandu vosi, “Ligina yili lilava mulolekizi wiitu. Limali kuhulira amakuva goosi ga Yahova amali komoloma. Kunangwa lilava mulolekizi ku munyi kumwizuliza kwibaala ku Nyasaye winyu.”

²⁸ Ahene yaho Joshua yahaana ku vandu munwa vazie, mundu vuli mulala yirana mukivala chiche mwene.

Joshua na Elieza Vaakuza

²⁹ Inyima wa yaga, mutumikiri wa Yahova Joshua, muyaayi wa Nuni, yakuza naveeye ni mihiga 110.

³⁰ Avandu va Isiraeli vamuyavira mu mulimi gwigwe ha Timunazi Sera mu kivala chi vigulu cha Efuraimu kolovega lwa Ivaale wi kiguru cha Gaashi.

³¹ Ku madiku goosi ga Joshua yaali mwoyo, avandu va Isiraeli vatumikira Yahova, na inyima wi likuza lilie vazizagilira kokora ndio lwa viimiliri yavo avaari nivelolera vindu viosi via Yahova yaali niyaakolera Isiraeli.

³² Vigumba via Josefu, avandu va Isiraeli vaali nivaleeta kutura Egebeti, viayavilwa mu mulimi gwa Yakobo yaagula kutura ku vayaayi va Hamori, baba Shekemu ku vidonye 100 viefeza. Mulimi yigu gwavugulwa ni visukululwi via Josefu.

³³ Lwa Elieza muyaayi wa Haruni yakuza, avandu va Isiraeli vaamuyavira mu lidaala lia Gibe. Lidaala yili liali mu kivala chi vigulu cha Efuraimu, ichaali ni chahaanwa ku muyaayi weve Finiasi.