Joshua 21 - KITABU KITAKATIFU

Amadara manene agahaanwa ku vandu vi ihiiri ya Levi

¹ Aviimiliri va vandu vi ihiiri ya Levi vazia ku musaalisi Elieza, Joshua muyaayi wa Nuni kandi ku vimiliri va vandu vi zihiiri ziosi zia Isiraeli.

² Ha Shilo mu kivala cha Kanaani vavavolera “Yahova yalaga kuvitira ku Musa ndi kunyi kove nikohevwa amadara manene agokomenya mu, harara ni kivala chu vwayiru vwi mitugu jietu ichavodong'ana madaala manene zana.”

³ Kunangwa kolondekana na malago ga Yahova, avandu va Isiraeli vahaana ku vandu vi ihiiri ya Levi madaala malala manene, harara nivivala viuvwayiru iviavodong'ana avandu kutura muvivala viavo aveene.

⁴ Avandu vi ihiiri ya Levi na Kohazi vaali avukutanga koheevwa madaala manene ku likuba ikura. Avandu vi kisukururwi chu musaalisi Haruni vahevwa madaala manene komi na tatu kutura muvivala vie zihiiri zia Yuda, Simioni na Benjamini.

⁵ Avandu vi ihiiri ya Kohazi avatigara vosi vahevwa madaala manene likomi kutura muvivala vie zihiiri zia Efuraimu, Dani na Imadioli wa Manase.

⁶ Ihiiri ya Gerishoni vahevwa amadara manene komi na tatu kutura muvivala vie zihiiri zia Isakari, Asheri, Nafutali, kandi na Ivugwi wa Manase.

⁷ Avandu vi ihiiri ya Merari vahevwa amadara komi na mbiri kutura muvivala via Rubeni, Gadi, na Zabuloni.

⁸ Kunangwa ku likuba zikuura, avandu va Isiraeli vahaana madaala manene yaga harara ni vivala viu vwayiru viago ku vandu vi ihiiri ya Levi, kuli Yahova yaali nalagi kuvitira mu Musa.

⁹ Yaga nigo amita ga madaala manene kutura muvivala vie zihiiri zia Yuda na Simioni agahaanwa

¹⁰ ku visukululwi via Haruni avaari vi Ihiiri ya Kohazi, uwaali kisukururwi kutura ku Levi. Kedonye chavo nicho chaali chukutanga kugavulwa.

¹¹ Vahevwa lidaala linene lia Ariba, Ariba yaali baba wa Anaki, na kalunu lilangangwa Heburoni, mu kivala chi vigulu chi Ivuyuda, harara nikivala chuvwayiru ichalikumbiriza.

¹² Nitali milimi ji lidaala linene zana, na madaala galio gaali nigamala kuhaanwa ku Kalebu muyaayi wa Jefune kuva miandu jije.

¹³ Komeeda ku Heburoni, iliali lilala ku madaala guvuhaliru, amadara yaga gahaanwa ku visukululwi viu musaalisi Haruni: Libuna,

¹⁴ Jatiri, Eshitemoa,

¹⁵ Holoni, Debiri,

¹⁶ Aini, Juta, kandi Bezi-shemeshi, harara ni vivala viuvwayiru viago. Amadara tisa kutura mu zihiiri zia Yuda na Simioni.

¹⁷ Vahevwa kandi madaala manene gane kutura mu kivala cha Benjamini. Madaala yaga gaali: Gibeoni, Geba,

¹⁸ Anazozi, na Alimoni, harara ni vivala viu vwayiru viago.

¹⁹ Avasaalisi visukululwi via Haruni vahevwa madaala manene goosi komi na tatu harara nivivala viu vwayiru viago.

²⁰ Avandu vi zihiiri zindi kutura mu Ihiiri ya Levi vi Ihiiri ya Kohazi vagavulirwa malala ku madaala manene kutura mu kivala chi ihiiri ya Efuraimu.

²¹ Vahevwa madaala manene gane nago ni yaga: Shekemu harara na kivala chuvwayiru vwalio mu kivala chi vigulu cha Efuraimu, iliali kandi lilala ku madaala manene guvuhaliru Gezeri,

²² Kibuzaimu, na Bezi-horoni harara ni vivala viu vwayiru viago.

²³ Vahevwa madaala manene gane kutura mu kivala chi Dani. Madaala yaga gaali: Eliteke, Gibezoni,

²⁴ Aijaloni, na Gazurimoni, harara nivivala viu vwayiru viago.

²⁵ Vahevwa kandi madaala manene gaviri kutura mu kivala cha imadioli wa Manase: Tanaki, na Gazurimoni, harara ni vivala viu vwayiru viago.

²⁶ Avandu vi ihiiri ya Kohazi vanyoola madaala manene goosi likomi, harara nivivala viu vwayiru viago.

²⁷ Muganda gundi gwi Ihiiri ya Levi avi ihiiri ya Gerishoni vanyoola madaala manene gaviri mu kivala chi Ivugwi wa Manase. Lilala kugo liali Golani mu Bashani, liali lilala ku madaala guvuhaliru kandi Beeshetera, harara ni vivala viu vwayiru viago.

²⁸ Vanyoola madaala gandi gane kutura mu kivala chi ihiiri ya Isakari. Madaala yaga gaali: Kishioni, Daberazi,

²⁹ Jaramuzi na Enganimu, harara ni vivala viu vwayiru viago.

³⁰ Kutura mu kivala cha Asheri vanyoola madaala manene gane harara nivivala viu vwayiru viago. Madaala manene yaga gaali Mishali, Abudoni

³¹ Helikazi na Rehobu.

³² Kutura mu kivala cha Nafutali vanyoola madaala manene gavaga harara ni vivala viuvwayiru viago. Lilala ku madaala manene yaga liali Kedeshi mu Galilaya iliali lidaala liu vuhaliru. Madaala gandi yago gaali Hamozi Dori, na Karitani.

³³ Avandu vi zihiiri lugano lugano vi ihiiri ya Gerishomu vanyoola madaala manene goosi komi na tatu harara nivivala viuvwayiru viago.

³⁴ Avandu vi ihiiri ya Levi vatigara kutura mu ihiiri ya Merari vahevwa madaala manene gane kutura mu kivala cha Zabuloni, madaala manene yaga gaali Jokineamu, Karita,

³⁵ Dimuna kandi Nahalali.

³⁶ Vanyoola madaala manene gane kutura mu kivala cha Rubeni. Madaala manene yaga gaali Bezeri, Jahazi,

³⁷ Kedemozi, na Mefaazi harara nikivala chu vwayiru vwago.

³⁸ Vanyoola madaala gane kutura mu kivala chi ihiiri ya Gadi. Madaala manene yaga gaali Ramozi mu Gileadi. Iliali lilala ku madaala guvuhaliru, Mahanaimu

³⁹ Heshiboni, na Jazeri harara na madaala guvwayiru vwago.

⁴⁰ Kunangwa ihiiri ya Merari vagavulirwa madaala manene goosi komi na mbiri harara nivivala viu vwayiru viago.

⁴¹ Amadara manene gi ihiiri ya Levi harara ni vivala viu vwayiru muvivala via vandu va Isiraeli gaali goosi arubaini.

⁴² Vuli lilala ku amadara yaga goosi liali ni vivala viu vwayiru viago ivialikumbiriza.

Vandu va Isiraeli Vavugura Kivala Kuva Chavo

⁴³ Kunangwa Yahova yahaana ku vandu va Isiraeli kivala choosi cha yaali niyasuuviriza avaguuga vaavo ku chisuuhu ndi alavaha. Lwa vaali nivakavugula kivala yicho vamenya mu.

⁴⁴ Yahova yavaha mirembe mu kivala chavo choosi kuli yaali niyasuuviriza avaguuga vaavo. Siyaali ho numundu kali avasigu vaavo waali unyala kuhingana navo mba, kigira Yahova yahaana ku vandu va Isiraeli iliguuta.

⁴⁵ Yahova yaali niyalomba lisuuvirizwa linyingi ku vandu va Isiraeli, kandi siyavunaga kali lilala kugo mba.