Joshua 20 - KITABU KITAKATIFU

Amadara manene guvuhaliru

¹ Yahova yavolera Joshua

² ovoolere avandu va Isiraeli, “Mutovole madaala manene guvuhaliru aga ndaalaga Musa amuvolere amakuva gago.

³ Mundu uwiita wundi ku matava anoho vugira kumanya, anyala kuzia yo na ahononoke kutura ku mwiko wa uwitiywi uwenyaa amwiite mu livanza kisaalia.

⁴ Anyala kwirukira mu lilala ku madaala manene yaga, azie havundu hukukalagirwa ha vwingiliru vwi lidaala linene yilio, ma yiivaaliri aviimiliri gamali kwekoleka. Ahene yaho vanyara koleka yingiri mu lidaala linene zana, kandi vamuhe havundu hokomenya kunangwa aduuki komenya yo.

⁵ Niiva mundu wenyaa kuvanza kisaalia cha masahi amulondelera weneyeyo, avandu vi lidaala liene yilio vatahaana mundu wirukira mu lidaala liavo yehonyie, ku mundu uwaza ku aduuki kumwiita mba. Kuduuka vamukingi kigira yamwita ku matava na sigaveeye kigira uvutima mba.

⁶ Alamenya mu lidaala linene yilio kuduuka lwa ayalizwa imbiri wi livugana lia vandu vosi vi kiyaalo kukalagirwa niiva aveeye nilihiolo anoho siaveeye nalio. Ahene yaho, kuduuka atigale mu lidaala yilio kuduuka lwu mundu uva naveeye Musaalisi munene ku ing'inga yeyo akuza.”

⁷ Kunangwa, kolovega lwi imadioli wa Jorodani avandu va Isiraeli vaviika halovega amadara manene ga Kedeshi, mu Galilaya, mu kivala chi vigulu cha Nafutali; Shekemu, mu kivala chi vigulu cha Efuraimu, kandi Heburoni mu kivala chi vigulu cha Ivuyuda.

⁸ Ivugwi wu mugera gwa Jorodani, ku kereremo cha changalangwe ivugwi wi lidaala linene lia Jeriko, vatovora Bezeri mu kivala cha Rubeni; Ramozi mu Gileadi, mu kivala cha Gadi, kandi Golani mu Bashani, mu kivala cha Manase.

⁹ Yaga nigo agaali madaala manene guvuhaliru agatovolwa kigira avandu va Isiraeli vosi kandi kigira mugeni ku vosi omenyi hagati haavo. Mundu woosi, uwiita mundu ku matava yaali anyala kwirukira mu lilala ku madaala manene yaga aduuki konyoora likingwa kutura ku mundu wenyaa kuvanza kisaalia cha masahi si yaali unyala kwitwa nakikiri kuyaalizwa imbiri wi kiyaalo cha vandu vosi kutanga mba.