Joshua 2 - KITABU KITAKATIFU

Joshua atumaa avatunyirizi mu Jeriko

¹ Maku Joshua, muyaayi wa Nuni, yatuma avatunyirizi vaviri kutura mu ahokososa ha Akakia naavalaga ndi vazie katunyiriza mu vwivisu mu kivala cha Kanaani, na ligali kuvita, lidaala linene lia Jeriko. Lwa vaduuka mu lidaala linene, vazia kogona munyumba yu mukali mulaaya uwalangwa Rahabu.

² Mwami wa Jeriko yahulira ndi vandu va Isiraeli valala vamali kuuza uvudiku yivwo ukutunyiriza kivala,

³ kunangwa yatuma amakuva ku Rahabu: “Avasaza vaveeye munyumba yooyo vazi kutunyiriza kivala. Valeete ichova yinu!”

⁴ Navuzwa mukali oyo yaali navuguyi avasaza vaviri zana yavo kandi navavisi. Yavoola, “Yee, avasaza zana yavo vazi ku inzi, navuzwa sindakumanya wa vaali nivatuli mba.

⁵ Lwi iliuva liali niliyeraa, kirivwa nikikiri kuhanwa, avasaza yavo vamanyi ni vazia. Simanyi ni inzira ki ya valondeeye ku mba; navuzwa nimutanga livalondelera vwangu, munyala kuvanyoola.”

⁶ Navuzwa Rahabu yaali navahili kwigulu kwinyumba na vavisi mu mavivi gayaali navungizi ku.

⁷ Kunangwa avandu vumwami yavo vatanga kolondelera avatunyirizi zana, kunzira izizaa kunyambuku yu mugera gwa Jorodani, kandi nonoho lwa avalondeleri yavo vaali nivakatula ichova wi lidaala, ikirivwa chahaanwa.

⁸ Avatunyirizi yavo nivakikiri kogona, Rahabu yazia ku inyumba igulu,

⁹ navavoolera, “Inzi manya ligali ndi Yahova umali kuhaana ku munyi kivala yiki. Mundu sa mulala omenyi mu kivala yiki atiihiziywi ligali ni munyi.

¹⁰ Kumali kuhulira kuli Yahova yuminya inyanza inzakanyu imbiri winyu lwa mwaali nimutulaa Egebeti. Kwamala kuhulira kuli mwita Sihoni na Ogu, avami vanene va vandu va Amori vaviri Ivugwi wu mugera gwa Jorodani.

¹¹ Kwaali nuvuti ligali nonoho lwa kwahulira amakuva yaga; kwosi kumali kogotiza uvuluviliri vwitu kigira munyi. Yahova Nyasaye winyu aveeye Nyasaye mu ligulu igulu kandi hano mu lirova.

¹² Kalunu nzisuuhili ku Yahova winyu ndi mulakolera avandu vinyumba yange vulahi kuli inzi mali kumukolera na mumbe kimanyiru chiligali ndi nyara kumusuuvira.

¹³ Suuvirizi ndi mulahonyira baba na mama wange, avamwavo na vavoozo vange, harara na vandu avizinyumba ziavo! Mutaleka kwitwi mba!”

¹⁴ Avasaza yavo vamuvolera, “Nyasaye akwiti niiva sikulakola kuli kovora! Niiva uvula kovoolera mundu woosi icha kwakolangi, kukusuuviriza ndi, lwa Yahova akuha kivala yiki, kulakokolera vulahi nu vusuuvirifu.”

¹⁵ Rahabu yamenya munyumba yumbakwa mu lidigi liu lugaga lwi lidaala linene; kunangwa yatulizira avasaza zana mu lidirisha naavikizira hasi ku mugoye.

¹⁶ Yavavolera, “Muzie mu kivala chi vigulu, gase avasaza valondeleri vu mwami yatuma valamunyoola. Mwivisi yo ku madiku gavaga kuduuka lwa viranaa. Lwinyima munyala kuzia wamwenyaa.”

¹⁷ Avatunyirizi yavo vamuvolera, “Kunyi kulaliinda lisuuviriza lia ivi umali kukwisuuhiza.

¹⁸ Yiki nicho cha gakuduukiraa okole. Lwa kwingira mukivala chienyu, voha mugoye mwakanyu yigu ku lidirisha liukwikiziyi mu hasi yili. Leeta harara munyumba yooyo yinu baba na mama woovo, avamwavo vovo, na avinyumba ya baba woovo vosi.

¹⁹ Niiva mundu woosi alatula ichova winyumba, aladulwa ku likuza lilie umwene; na kunyi sikuladurwa kulio mba; navuzwa niiva mundu woosi uliva harara niivi munyumba alasalirizwa, hene yaho kunyi kuladurwa.

²⁰ Navuzwa niiva uvuulaku mundu woosi icha kwakolangi, maku si kulaliinda liesuuha lietu lia umali kukwisuuhila mba.”

²¹ Mukali zana yavoola, “Mbugiliyi. Leki gave kuli muvooye.” Yavatuliza ichova ni vazia. Nivakazia, yavoha mugoye mwakanyu ku lidirisha zana.

²² Avatunyirizi yavo vazia mu vigulu niviivisa yo. Avandu vu mwami yatuma ku valondelera vavenyeleriza kunzira mu kivala yicho choosi ku madiku gavaga, navuzwa sivavanyoola mba kunangwa vamanya nivirana mu lidaala linene Jeriko.

²³ Maku, avatunyirizi vaviri yavo vasulunguta ku vigulu, nivambuka mugera gwa Jorodani ma, nivirana ku Joshua. Vamuvolera vindu viosi iviali niviekoleki,

²⁴ vavoolera Joshua, “Koveeye nagiligali ndi Yahova umali kukuha kivala choosi. Avandu vaveeye yo vosi vaali nuvuti ligali kigira kunyi.”