Joshua 18 - KITABU KITAKATIFU

Kivala Chatigaraa Chagavulwa

¹ Inyima wa vandu va Isiraeli vaali nivakaguuta kivala, avandu vosi vavunga ha Shilo, kandi vumbakayo Lihema liukuvuganira mu na Yahova.

² Ziali zihiiri saba zia vandu va Isiraeli avaari nivakikiri kohevwa kidieli chavo chi kivala.

³ Kunangwa Joshua yateeva avandu va Isiraeli, “Ilava kuduuka ing'inga ki ya muzizaa kulindilira muvugata nimukikiri kwingira kuvugura kivala cha Yahova, Nyasaye wa vaguuga vinyu, amali kumuha?

⁴ Ndeteri avasaza vavaga kutura mu vuli ihiiri. Ndavatuma vazie ichova mu kivala choosi vang'ode livaala lie kivala choosi icha venya vanyoore kuva miandu jaavo. Maku valirana ku inzi.

⁵ Kivala kilagavulwa hagati haavo mu vidonye saba. Yuda alatigala mu kivala chiche kolovega lwisavalu, na Josefu mu kivala chiche kolovega lwa ivaale.

⁶ Ng'odi hasi livaala lie vidonye saba yivi na mundeetere hano. Maku ndavakubiza zikuura kwenya kumanya ni havundu haliha aha Yahova Nyasaye yenya sia vuli ihiiri enyoore.

⁷ Avandu vihiiri ya Levi sivalanyora kedonye chi kivala chavo harara ni munyi mba; kigira kidieli chavo keveeye kutumika kuli avasaalisi va Yahova. Kandi zihiiri zia Rubeni, Gadi na Manase vi Ivugwi vamala yavokonyoora kivala chavo Ivugwi wa Jorodani; icha Musa, Mutumikiri wa Yahova, yavaha.”

⁸ Avasaza yavo vatura ni vazia kunzira yaavo kuzia kong'oda ilivaala lie kivala zana inyima wa Joshua yaali ni yakamala kuvaha amalago yaga: “Muzie mu kivala yicho choosi, mung'ode livaala liacho kuli keveeye, kandi mwirane yinu ku inzi. Kandi hano mu Shilo ndamutevera Yahova ku likubiza ikura.”

⁹ Kunangwa avasaza zana yavo vazia ku kivala yicho choosi kandi nivang'oda kuli vakigavula mu vidonye saba, nivang'oda amita ga madaala gaveeye mucho goosi. Nivirana ku Joshua mu hokososa ha Shilo.

¹⁰ Joshua yakuba ikura kwenya kumanya kuli Yahova yenya kivala zana kigavulwi, kandi yaaha kivala chatigaraa ku vuli ihiiri yaatigaraa ya Isiraeli.

Kivala chahaanwa ku Benjamini

¹¹ Kivala cha vandu vi ihiiri ya Benjamini chaali chukutanga kugavulwa. Lwako lwi kivala chavo lwali hagati hi ihiiri ya Yuda kolovega lwi isavaalu na visukululwi va Josefu kolovega lwi ivaale.

¹² Kolovega lwa ivaale, lwako lwavo lwatangira ha mugera gwa Jorodani ma kandi ni lwanigira ku visulungutu viveeye ivaale wa Jeriko kandi kuzia imadioli kuvitira mu kivala chi vigulu kuduuka ku changalangwe cha Bezaveni.

¹³ Lwako zana lwamanya niluzia ku kisulungutu keveeye kolovega lwi savaalu wa Luzi ililangangwa kandi Bezeli, ma niluzia imuunzi kuduuka Atarozi Adari, ku kiguru Isavaalu wa indangu wa Bezi-horoni.

¹⁴ Lwako lwazizagilira komeedwa kolovega lundi, kovodong'ana kohenza Isavaalu kutura kolovega lwi imadioli wi kiguru yiki kandi kuzia kuduuka Kiriazi Baali anoho Kiriazi-Jearimu iliveeye lidaala linene lie ihiiri ya Yuda. Yilu lwali lwako lwimadioli.

¹⁵ Lwako lohenza Isavaalu lwatangira kutura kundulu wi lidaala linene lia Kiriazi-Jearimu kandi niluzia kuduuka ku visinukiru via mazi via Nefutoa.

¹⁶ Lwamanya nilusunguta kuduuka ku lwali hasi hi kiguru olohenzaa Livona lia Hinomu, kundulu lwa ivaale chi Livona lia Refaimu. Maku lwazia isavaalu kuvitira mu Livona lia Hinomu, isavaalu wo losoma lwa vandu va Jebusi, olohenzaa kolovega lwa Enirogeli.

¹⁷ Lwagirung'ana Ivaale kuzia kuduuka Enishemeshi ma kandi kuzizagilira kuduuka Gelilozi, kolovega lundi kunzira ya Adumimu. Lwako lwamanya nilwika kuduuka ku Ligina lia Bohani iligulikwa mu lizuliza uwaali muyaayi wa Rubeni.

¹⁸ Lwavitira ivaale wolosoma lohenza Livona lia Jorodani. Lwazizagilira kwika mu livona,

¹⁹ kuvitira ivaale wolosoma lwa Bezi-hogula, kandi niluduuka ha vwingiliru vwa Ivaale wu mugera gwa Jorodani gwingilira munyanza yi jumbi. Yilu lwali lwako lwa ivaale.

²⁰ Mugera gwa Jorodani gwaali lwako lwivugwi. Yizi nizio ziali zinzako ziakumbiriza kivala cha vandu vi ihiiri ya Benjamini vanyoola kuva miandu jaavo.

²¹ Amadara manene aga vandu vi ihiiri ya Benjamini gaali Jeriko, Bezi-hogula, Emeki kezizi,

²² Bezi Ariba, Zemaraimu, Bezeli,

²³ Avimu, Para, Ofura,

²⁴ Kefaramoni, Ofini, na Geba; yaga na madaala manene komi na mbiri harara na madaala gago agagakumbiriza.

²⁵ Gaali ho kandi madaala manene gandi komi na ine harara na madaala gago agagakumbiriza, nago ni yaga: Gibeoni, Rama, Beerozi,

²⁶ Mizipa, Kefira, Moza,

²⁷ Rekemu, Iripeli, Tarala,

²⁸ Zela, Haelefu, Jebusi anoho Jerusalemi, na Gibea, Kiriazi-Jearimu, yaga na madaala manene komi na ine harara na madaala gagakumbiriza. Yiki nicho kivala cha vandu vi ihiiri ya Benjamini vanyoola kuli miandu jaavo.