Joshua 13 - KITABU KITAKATIFU

Joshua yavugula kivala chatigaraa

¹ Joshua yaali naveeye musakulu ligali. Yahova yamuvolera, “Oveeye musakulu ligali, navuzwa kikiri ho kivala kenene ligali icha ukikiri kuvugura:

² kivala choosi cha vandu va Filisitia na Geshuru,

³ kandi kivala choosi cha vandu va Vimu kolovega lwi savaalu. Kivala kutura kumugera gwa Shihori, ivugwi wu lwako lwa Egebeti kuduuka ivaale wu lwako lwa Ekironi, chaali kivala cha Kanaani. Avami va vandu va Filisitia vamenya Gaza, Ashidodi, Ashikeloni, Gazi, na Ekironi.

⁴ Gakuduukiraa uguuti kivala choosi cha vandu va Kanaani, kutura ku lidaala lia Meara iliali lidaala lia andu va Sidoni, kuduuka ku lidaala lia Afeki, ha lwako lwa Amori;

⁵ Ukikiri kuguuta kivala cha vandu va Gebali. Ukikiri kuguuta kivala cha Lebanoni kolovega lwi ivugwi, kutura ku lidaala linene lia Baaligadi, iliveeye isavaalu wi kiguru cha Herimoni, kuduukia kunzira ya Hamazi.

⁶ Yiki harara nikivala choosi cha vandu va Sidoni, avamenyaa mu kivala chi vigulu hagati hi vigulu via Lebanoni na Miresipozi Maimu. Ndakuunga avandu yava vosi vazie lwa avandu va Isiraeli visunda muvivala yivi.

⁷ Kunangwa kalunu ugavuli kivala yiki hagati hi zihiiri zindi tisa kandi inusu yi ihiiri ya Manase, kiduuki kuva miandu jaavo.”

Ligavulwa lie kivala keveeye Ivugwi wa Jorodani

⁸ Musa mutumikiri wa Yahova yaali ni yamala kugavura kivala ku zihiiri zia Rubeni, Gadi kandi inusu yi ihiiri ya Manase. Kivala chavo chaali kolovega lwi ivugwi wu mugera gwa Jorodani.

⁹ Kivala chi zihiiri yizi chaduuka kolovega lwi ivugwi wi Isavaalu mu lidaala linene lia Aroeri, kulwako lwi livona lia Arinoni; kandi lidaala linene hagati hi livona yilio, kandi harara ne kereremo choosi kutura mu lidaala lia Medeba, kuduuka Diboni.

¹⁰ Kivala chavo chaduuka ku lwako lwa Amoni. Chaali kandi harara na madaala goosi gu mwami Sihoni, mwami wa vandu va Amori uwamihaa kugo kutura mu lidaala linene lia Heshiboni.

¹¹ Chaali kandi harara na Gileadi, vivala via Geshuru na Maaka, kiguru choosi cha Herimoni, kandi Bashani yoosi kuduuka Saleka.

¹² Chaali harara kandi nu vwamihi vwosi vwa Ogu, wukumaliriza ku vandu va Refaimu, uwamiha mu Bashani, Ashitarozi na Edirei. Musa na avandu va Isiraeli vaali nivaguuti kandi kukuunga avandu yava,

¹³ nitali avandu va Geshuru na Maaka avakemenyi hagati ha avandu va Isiraeli kuduuka lero.

¹⁴ Musa siyahaana ku kivala choosi ku ihiiri ya Levi mba. Kuli Yahova yaali navoleeye Musa, venyeka vanyoore kedonye chi visiuviliru visambirwa ku vwali ku Yahova, Nyasaye wa Isiraeli kuva miandu jaavo.

Kivala cha haanwa ku Rubeni

¹⁵ Musa yaali nahaani kedonye chi kivala ku avizinyumba zia ihiiri ya Rubeni kuva miandu jaavo.

¹⁶ Kivala chavo chaduuka Aroeri, kuzindulu zie livona lia Arinoni kandi lidaala hagati lie livona yilio kandi harara ne kereremo choosi kukumberiza Medeba.

¹⁷ Chaali harara na Heshiboni, kandi madaala manene goosi gu kukereremo; Eiboni Bamozibaali, Bezi, Baalimeoni,

¹⁸ Jahazi, Kedemozi, Mefaazi,

¹⁹ Kiriazaimu, Sibima, Zerezishanari mu livona lie kiguru,

²⁰ Bezi-peoru, visulungutu vie Kiguru cha Pisiga na Bezi Jesimozi.

²¹ Chaali kandi harara ni kivala choosi ichamiifwa kutura mu lidaala linene lia Heshiboni nu mwami Sihoni, mwami wa vandu va Amori. Aviimiliri vi zihiiri vatano ku amita ga Evi, Rekemu, Zuri, Huri, na Reba vaali nivamihaa kivala yiki muvogono vwu umwami Sihoni. Navuzwa Musa yaguuta mwami Sihoni harara na viimiliri vandi yava, kandi navugura kivala chavo.

²² Harara na yavo ava avandu va Isiraeli vita, yaali Balaamu Musigitiri. Yaali muyaayi wa Beori.

²³ Ihiiri ya Rubeni yaali yahevwa mugera gwa Jorodani kuli lwako lwi madioli lwayo. Amadara manene yaga goosi harara nutudaala twago gahevwa vandu vi ihiiri ya Rubeni. Madaala manene kandi utudaala gaali miandu jaavo mihiga ni mihiga.

Kivala chahaanwa ku Gadi

²⁴ Musa yaali nahaani kandi kedonye chi kivala ku vandu vi ihiiri ya Gadi kuva miandu jaavo.

²⁵ Kivala chavo chaali harara ni lidaala linene lia Jazeri kandi madaala goosi mu kivala cha Gileadi. Chaali harara kandi ni kivala cha Amoni, kuduuka ku lidaala lia Aroeri, iliveeye kolovega lwi ivugwi wi lidaala linene lia Raba.

²⁶ Kivala chavo chaali kutura Heshiboni kuduuka Ramozi Mizipa kandi Betonimu; kutura Mahanaimu kuduuka ku lwako lwa Lodebari.

²⁷ Mu livona lia Jorodani, kivala chavo chaali harara na madaala ga Bezi Haramu, Bezinimura, Sukozi, kandi Zafoni nu uvwami vutigalaa vwosi vwu mwami Sihoni wa Heshiboni. Lwako lwavo kolovega lwa imadioli lwali mugera gwa Jorodani kuduuka kunyanza ya Galilaya.

²⁸ Yaga nigo gaali madaala manene nu tudaala, agahaanwa ku avizinyumba va ihiiri ya Gadi kuva miandu jaavo.

Kivala chahaanwa ku ihiiri ya Manase yi Ivugwi

²⁹ Musa yaali nahaani kedonye chi kivala ku inusu yi ihiiri ya Manase yi Ivugwi kuva miandu jaavo

³⁰ kivala chavo chaduuka ivaale kutura ku vwami vwosi vwi lidaala linene lia Mahanaimu kandi chaali harara nu vwamihi vwa Bashani vwa Ogu, mwami wa Bashani, harara nutudaala 60 twa Jairi mu Bashani.

³¹ Ku inusu yi ihiiri ya Manase, iyaatula ku kisukururwi chaali harara ni inusu ya Gileadi, harara na Ashitarozi kandi Edirei, madaala manene gu vwamihi vwa Ogu mu Bashani. Kivala yiki choosi chahaanwa ku ihiiri yi kisukururwi cha Makiri muyaayi wa Manase.

³² Nindio Musa yagavulira avandu va Isiraeli kivala choosi cha Moabu ekeveeye Ivugwi wa Jeriko mu livona lia Jorodani.

³³ Navuzwa Musa siyaahana ku ihiiri ya Levi kivala choosi mba. Yavavolera ndi miandu jaavo jilava vuzwa lisanga kedonye chi vihaanwa viletwaa ku Yahova Nyasaye wa Isiraeli mu Litembeli.