Joshua 11 - KITABU KITAKATIFU

Joshua Yaguuta Jabini na Avami vandi va Ivaale

¹ Lwa mwami Jabini wa Hazori, yahulira makuva gu vuguuti vwa Joshua yatuma likuva ku Jababu wa Madoni, ku vami va Shimuroni na Akishafu,

² kandi ku vami vanene vaveeye mu kivala chi vigulu kolovega lwa ivaale, mu kivanda cha Jorodani, isavaalu winyanza ya Galilaya nu muvivala vidiguluku kandi kulujinga ahimbi na Dori.

³ Yatuma kandi ka makuva vandu va Kanaani avaveeye ku zimbega ziosi zia Jorodani kuduuka ku vandu va Amori; Hiti, Perezi kandi Jebusi mu kivala chi vigulu; kali kuduuka ku vandu va Hivi avamenyaa hasi hi kiguru cha Herimoni mu kivala cha Mizipa.

⁴ Vaza na vasikari vi liihi vaavo vosi iliihi liali na vasaza vanyingi kuli muyeke ku lujinga lwinyanza. Vaali kandi ni zibarasi zinyingi kandi magare gu vulwani manyingi.

⁵ Avami yava vosi vahambanyia amahi gaavo harara kandi valomba ahokososa haavo ha Mazi ga Meromu kulwaana avandu va Isiraeli.

⁶ Yahova yavolera Joshua, “Utavatia mba. Ku ing'inga yiyi mugamba, ndava ninziiti yavo vosi kigira Isiraeli. Gakuduukiraa oleminye zibarasi ziavo ku litema machi gazio nokusamba magare gu vulwani gaavo nomuliru.”

⁷ Kunangwa Joshua harara na vasaza vi liihi veve vosi vingilira Jabini na vami va Ivaale ha Mazi ga Meromu.

⁸ Nyasaye yakola vandu va Isiraeli kuguuta kuvo. Avandu va Isiraeli vavingilira kandi nivavalondelera kali kuduuka Misirefozimaimu, na Sidoni kolovega lwa ivaale, kandi kuduuka mu livona lia Mizipa ku lovega lwa ivugwi.

⁹ Joshua yakola kuvo icha Yahova yalaga: Yaaleminya zibarasi ziavo kandi nasamba magare gaavo gu vulwani.

¹⁰ Joshua yagirung'ana nagumira lidaala lia Hazori niyiita mwami walio. (Ku ing'inga yeyo, Hazori liali lidaala lie zinguru ligali ku vwami yivwo vwosi.)

¹¹ Vita vandu vosi avaari yo; mulala siyatigala mwoyo mba, kandi lidaala liasambwa nu muliru.

¹² Joshua yagumira madaala yaga goosi harara na vami vago, niyiita avandu vosi, kuli Musa, mutumikiri wa Yahova, yaali niyalaga.

¹³ Nitali, vandu va Isiraeli sivasamba lilala ku madaala gumbakwa ku tugulu twavo mba, nitali Hazori lieng'ine ilia Joshua yasamba.

¹⁴ Avandu va Isiraeli vavugura vindu viosi iviali viuvuguli kandi mitugu kutura mu madaala yaga nivaviviika vive viavo. Navuzwa vita vuli mundu; sivatigaliza kali mulala kuvo mwoyo mba.

¹⁵ Yahova yaali nahaani malago geege ku mutumikiri weve Musa, Musa naye yaali nagahaani ku Joshua, na Joshua naye yagalonda. Yakola kindu choosi cha Yahova yaali nalagi Musa.

Joshua Yagumira kivala choosi

¹⁶ Joshua yagumira kivala choosi, kivala chi vigulu kandi hi vigulu viatangiraa, viombi via ivaale ni isavaalu, kivala choosi cha Gosheni kandi kivala chumu isavaalu wacho, kali kuduuka mu livona lia Jorodani.

¹⁷ Kutura ku kiguru cha Halaki, ikisinukaa kuduuka Edomu, kuduuka Baali Gadi mu livona lia Lebanoni hi kiguru cha Herimoni kitangiraa. Yagumira avami vavio vosi kandi naviita nikivavi.

¹⁸ Joshua yalomba vulwani ku vami yavo ku ing'inga indambi.

¹⁹ Siliai ho ni lidaala linene kali lilala ilialomba lilagana lie mirembe na vandu va Isiraeli mba; nivataveeye vandu va Hiivi avamenyaa mu lidaala lia Gibeoni. Avandi vosi vaguutwa mu vulwani.

²⁰ Yahova yaali navakoli avagulu kulwaana Avaisiraeli, kunangwa vaduuki kukalagirwa lidivizwa ligali kandi vosi vaduuki kwitwa vugira liverererwa. Yaga nigo aga Yahova yaali nalagi Musa.

²¹ Ku ing'inga yiyi, Joshua yazia naadiviza ihiiri ya Avaanaki avamenya mu kivala chi vigulu mu Heburoni, Debiri, Anabu kandi mu kivala choosi chi vigulu cha Yuda, ma Isiraeli. Joshua yavadiviza ligali harara na madaala manene gaavo.

²² Mundu wi hiiri ya Anaki kali mulala siyaalekwa mu kivala cha Isiraeli mba; nitali avalekwa vuzwa mu Gaza, Gazi, na Ashidodi.

²³ Kunangwa Joshua yagumira kivala choosi kuli Yahova yaali niyalaga Musa. Joshua yakihaana ku vandu va Isiraeli kuva imiandu jaavo; kandi yakigavula mu vidonye, kedonye kilala ku vuli ihiiri. Kunangwa avandu vasoosa kutura ku vulwani.