Joshua 10 - KITABU KITAKATIFU

Avandu va Isiraeli vaguuta vandu va Amori

¹ Adonizedeki mwami wa Jerusalemi yahulira ndi Joshua, umali kugumira nukudiviza ligali lidaala lia Ayi, kandi umali kwita mwami walio, kuli yakola ku Jeriko harara numwami walio. Yahulira kandi ndi avandu va Gibeoni vamali kolomba lilagana lie mirembe na vandu va Isiraeli, kandi vamenyi hagati haavo.

² Avandu va Jerusalemi vagenya nukutia ligali ku makuva yaga, kigira Gibeoni liali lidaala linene ligali kuli lilala ku madaala manene agaali nu mwami; liali linene ligali kuvita Ayi, na avasaza valio vosi vaali avalwaani vizingulu avalahi.

³ Kunangwa Adonizedeki yatuma amakuva yaga ku mwami Hohamu wa Heburoni, na mwami Piramu wa Jaramuzi, mwami Jafia wa Lakishi kandi mwami Debiri wa Egiloni:

⁴ “Hambi mungonye kwingilira nu kulwaana Gibeoni kigira avandu valio vaalombi lilagana lie mirembe na Joshua kandi na vandu va Isiraeli.”

⁵ Avami vatano va vandu va Amori yavo, avami va Jerusalemi, Heburoni, Yaramuzi, Lakishi na Egiloni vahambanyia amahi gaavo, nivakumberiza Gibeoni kandi nivingilira kulilwana.

⁶ Avasaza va Gibeoni vatuma amakuva ku Joshua ahokososa ha Giligali: “Utakoleka kunyi, avatumikiri vovo mba, mwami! Hamba vwangu okokonye! Okohonyie Avami va Amori vosi avamenyaa mu kivala chi vigulu vamali kuhambanyia amahi gaavo, ma vazi kukulwaana!”

⁷ Kunangwa Joshua na iliihi lilie liosi, harara na vasikari vukulwaana valahi ligali, vaatura ha Giligali ukuzia Gibeoni.

⁸ Yahova yavolera Joshua, “Utavatia mba: inzi mali kuhaana kuivi liguuta. Sihaveeye ho numulala muvo unyala kusingira ku lihingira ivi mba.”

⁹ Uvudiku vwosi, Joshua na iliihi lilie vagenda kutura Giligali kuduuka Gibeoni kandi nonoho vingilira vandu va Amori vugira kumanya.

¹⁰ Yahova yakola vandu va Amori kuva nuvuti vonene ligali lwavaalola iliihi lia Isiraeli. Avandu va Isiraeli vavitira ha Gibeoni kandi nivavalondelera kuduuka kunzira isulungutaa kuvitira ku kiguru ha Bezi-horoni, nivazizagilira kuvingilira kuduuka Azeka na Makeda.

¹¹ Lwa vandu va Amori vaali ni virukaa kutura ku liihi lia vandu va Isiraeli kuvitira ha kivitiru cha Bezi-horoni kuduuka Azeka, Yahova yakola magina manene gimbula kukuba kuvo kutura mwigulu. Avanyingi kuvo vaakuza ligali kuvita aviitwa nivivavi via vandu va Isiraeli.

¹² Ku lidiku lia Yahova yaaha avasaza va Isiraeli iliguuta ku vandu va Amori, Joshua yamoloma ku Yahova. Imbiri wa vandu va Isiraeli, navoora, “Ivi, liuva, singira igulu wa Gibeoni; Ivi mweli, singira igulu wi livona lia Aijaloni.”

¹³ Kunangwa liuva liasingira, kandi mweli gwasingira kogenda kuduuka lwa vandu va Isiraeli vamala kuguuta avasigu vaavo. Yaga gang'odwa mu kitabu cha Yasharu. Liuva liasingira hagati hu mwigulu na siliayera vwangu, ku lidiku liosi mba.

¹⁴ Likikiri kuva ku ho lidiku kuli yili ku maziambiri anoho kutura yilwo lwa Yahova yahulira mundu mba. Yahova yalwaanira Isiraeli.

¹⁵ Inyima wa yaga, Joshua harara na iliihi lilie, virana ahokososa ha Giligali.

Joshua yagumira avami vatano va Amori

¹⁶ Avami vatano va Amori zana, vaali ni viiruki, kandi vaali ni viivisi mu luhangaywa ha Makeda.

¹⁷ Joshua yavoolerwa aha vaali nivivisi.

¹⁸ Joshua yavoola, “Gomagominyi magina manene mukuniki imbiri wu luhangaywa. Muviiki ho, valala ku valindi kulinda;

¹⁹ navuzwa mutaguunzi ho mba. Muzizagiliri kolondelera avasigu kandi mutavingiliri kutura inyima mba. Mutaleki vingiri mu madaala gaavo mba! Yahova Nyasaye winyu umali kumuha iliguuta kuvo.”

²⁰ Joshua harara navasaza va Isiraeli vosi vavita ligali, kali niiva avalala kuvo vanyaliza konyoora ahokohonera mugati mwa madigi gi lidaala liavo na sivitwa mba.

²¹ Maku avasaza vosi va Joshua virana kuye ni mirembe mu ahokososa ha Makeda. Sihaali ho numulala mu kivala yicho uwaluvilira komoloma likuva lidamanu ku Isiraeli kali hakuzu mba.

²² Maku Joshua yavoola, “Kunuli vwingiliru vwuluhangaywa mundeetere hano avami vatano yavo.”

²³ Kunangwa luhangaywa lwakunulwa, na vami va Jerusalemi, Heburoni, Jaramuzi, Lakisu na Egiloni valetwa.

²⁴ Lwa vaali nivakaleetwa ku Joshua, Joshua yalanga avasaza vosi va Isiraeli vaze kuye, kandi yalaga vimiliri vi liihi vazie harara naye, “Hambi imbiri yinu na muviiki virenge vienyu ku magoti ga vami yava.” Kunangwa vaza imbiri, kandi nivaviika zinduvatiru zie virenge viavo ku magoti gaavo.

²⁵ Ahene yaho Joshua yavolera vimiliri vi liihi veve, “Mutatia anoho kukuza mioyo mba. Muve avagulu kandi avaluviriri, kigira nindio Yahova naakole ku vasigu vinyu ava muzizaa kulwaana navo.”

²⁶ Maku Joshua yita avami vatano yavo kandi yasuunga miviri jaavo ku misaala jitano, navo veelera ku misaala kuduuka hamugorova.

²⁷ Ing'inga liuva liayera, Joshua yahaana lilago kandi viikiza miviri yijo hasi, kandi nivajisiuva mu luhangaywa umwa vaali niviivisangi. Ha vwingiliru vwu luhangaywa, vaviika ho magina manene ligali, na gakikiri ho kuduuka lidiku lia lero.

Joshua Yagumiraa vivala vindi via vandu va Amori

²⁸ Joshua yagumira madaala gandi manyingi ga Amori. Lidiku yilio, Joshua yingilira nagumira Makeda nu mwami walio. Yita avandu vosi mu lidaala yilio. Siyaali ho numulala uwatigala mwoyo mba. Yakola ku mwami wa Makeda aga yaali naakori ku mwami wa Jeriko.

²⁹ Inyima wa yaga, Joshua harara na iliihe lilie vazizagilira kutura Makeda kuzia kuduuka Libuna kandi nivalitulira.

³⁰ Yahova yahaana ku vandu va Isiraeli uvuguuti kandi ku lidaala yilio kandi ku mwami walio sivaleka livamwoyo liu mundu kali mulala mba, navuzwa vita mundu woosi waali mulio. Vaakora ku mwami walio aga vaakora ku mwami wa Jeriko.

³¹ Inyima wa yaga, Joshua harara na iliihe lilie vazizagilira kutura Libuna kuduuka Lakishi, nivalikumbiriza kandi ni valilwaana.

³² Yahova yahaana iliguuta ku vandu va Isiraeli, ku Lakishi ku lidiku lia kaviri liu vulwani. Kuli vaali ni vakoli ha Libuna, sivatigaliza mundu kali mulala, navuzwa vita vosi mu lidaala linene yilio.

³³ Mwami Horamu wa Gezeri yaza kokoonya Lakishi; navuzwa Joshua yamuguuta harara na iliihi lilie liosi kandi siyaaleka kali mulala kuvo mwoyo mba.

³⁴ Komeeda ku, Joshua harara ni iliihi lilie liosi visunda kutura Lakishi kuduuka Egiloni; nivalikumberiza kandi nivalingilira.

³⁵ Valigumira lidiku zana yilio, niviita vandu vosi, kuli vaali nivakoli ku lidaala lia Lakishi.

³⁶ Inyima wa yaga, Joshua harara ni iliihi lilie vaanigira kutura Egiloni kuduuka mu vigulu mu lidaala lia Heburoni, kandi nivalingilira.

³⁷ Kandi valigumira, vita mwami walio harara na avandu vandi vosi mu lidaala kandi mutudaala twalio twosi. Joshua yakalagira lidaala yilio kudivizwa ligali, kuli yakola ku Egiloni. Sihaali ho nuwatigala mba.

³⁸ Kunangwa Joshua harara na iliihi lilie vagirung'ana ku Debiri kandi valingilira.

³⁹ Yaligumira harara nu mwami walio, kandi amadara goosi agaali ahimbi kulio. Vita avandu vosi. Joshua yakola ku Debiri nu mwami walio aga yaali naakori ku Heburoni na Libuna harara na avami vago. Si yaali ku nu mundu walekwa atigale mwoyo mba.

⁴⁰ Kunangwa Joshua yaguuta kivala choosi. Yaguuta avami vi kivala chi vigulu, zinyanguluku zia ivugwi, kandi vivala vidiguluku vie madioli, kuduuka kali yavo avumukivala chumu olovega lwi isavaalu. Siyatigaliza kali mulala mba; vuli mundu yitwa. Yaga nigo aga Yahova, Nyasaye wa Isiraeli yaali nalagi.

⁴¹ Joshua yavaguuta kutura Kadeshi Barinea mu isavaalu kuduuka Gaza ahimbi ku lujinga lwi inyanza; harara ni kivala choosi cha Gosheni kandi kuduuka Gibeoni mu lovega lwa ivaale.

⁴² Joshua yaguuta avami yava vosi harara ni vivala viavo mu ing'inga ndala ya yatura kuzia kulwaana mu liihi kigira Yahova, Nyasaye wa Isiraeli yaali naalwaaniraa vandu va Isiraeli.

⁴³ Inyima wa yaga, Joshua harara ni iliihi lilie viirana mu ahokososa ha Giligali.