Joshua 1 - KITABU KITAKATIFU

Nyasaye yalaga Joshua azie kulwaana nukuguuta kivala cha Kanaani

¹ Inyima wi likuza lia Musa, umutumikiri wa Yahova, Yahova yamoloma ku Joshua, muyaayi wa Nuni mukonyeleri wa Musa.

² Yavoola, “Mutumikiri wange Musa ukuzi Ivi harara na avandu vosi va Isiraeli, mwetegeke kalunu, mwambuki mugera gwa Jorodani nukwingira mu kivala cha muheezaa.

³ Kuli ndasuuviriza Musa, mali kuha ana ku ivi harara na avandu vange vosi ikivala choosi ichamuzizanga koseena mu.

⁴ Zinzako zienyu zilatula ku changalangwe mu lovega lwi Isavaalu kuduuka ku vigulu via Lebanoni mu lovega lwa Ivaale; kutura ku mugera munene gwa Efurate mu lovega lwi Ivugwi, kuvitira mu kivala cha vandu Vahiti, kuduuka kunyanza ya Meditareniani mu lovega lwi imadioli.

⁵ Joshua, mundu kali mulala sialakakuguuti mu livamwoyo liilio liosi mba. Ndava harara niivi kuli ndaali na Musa. Ndava niivi kazozo; sindakoleka kali hakuzu mba.

⁶ Ove mugulu kandi muluviliri, kigira ivi ulava mwimiliri wa vandu yava lwa vava nivavugura kivala yiki icha ndasuuviriza avaguuga vaavo ndi ndavaha.

⁷ Ove vuzwa mugulu, ove muluviliri; kandi olole ndi uhuliraa nu kugumira lilaga liosi liu mutumikiri wange Musa yahaana ku ivi. Utaleka kedonye choosi chalio mba, na ivi ulaguuta vulahi hoosi aha uzia.

⁸ Olole ndi kitabu chi Lilaga yiki kesomwaa kazozo mu lisigamira liilio. Okesome mbasu nuvudiku, kandi olole ndi olondaa nukugumira vindu viosi iviang'odwa mucho. Maku yaho ulava nilizizagilira imbiri ligali kandi ulagasizwa.

⁹ Wizulizi ndi inzi mali kukulaga ove mugulu kandi muluviliri! Utatia kandi utakuza mwoyo mba, kigira Inzi, Yahova Nyasaye woovo, mbeeye harara nivi hoosi aha uzia.”

Joshua Yahaana malago ku vandu va Isiraeli

¹⁰ Kunangwa Joshua yalaga aviimiliri vosi

¹¹ vazie kuvitira hagati mu hokososa hoosi na vavoolere avandu, “Mwetegikizi chukulia, kigira mu madiku gavaga muzizaa kwambuka mugera gwa Jorodani kwidikira mu kivala cha Yahova Nyasaye winyu amuhezaa.”

¹² Joshua yavolera zihiiri zia Rubeni, Gadi ni inusu yi ihiiri ya Manase,

¹³ “Mwizurizi kuli Musa, mutumikiri wa Yahova, yamuvolera ndi Yahova Nyasaye winyu alamuha kivala yiki ko lovega lwi ivugwi lwu mugera gwa Jorodani kuli hango hinyu.

¹⁴ Avakali vinyu, avana vinyu kandi mitugu jinyu vilamenya hano, navuzwa avasikari vi liihi vinyu, niviviiki viuma mulietegekera vulwani, valambuka kuzia imbiri wa vandu va Isiraeli vache vaavo, kunangwa vaduuki kuvakonya

¹⁵ kuduuka lwa vamala kwidikira mu kivala keveeye imadioli wu magera gwa Jorodani icha Yahova Nyasaye winyu amali kuhaana ku munyi. Lwa ava niyakahaana mirembe ku zihiiri ziosi zia Isiraeli, ahene yaho munyala kwirana hano nokomenya hano mu kivala chienyu ivugwi wu mugera gwa Jorodani, icha Musa, mutumikiri wa Yahova, yahaana ku munyi.”

¹⁶ Vaativulira Joshua, “Kulakola kindu choosi cha umali kokovoolera kandi kulazia havundu hoosi aha ukutuma.

¹⁷ Kulahulira ivi, kuli vuzwa kwahulira Musa kazozo, kandi Yahova Nyasaye woovo ave harara nivi kuli yaali na Musa!

¹⁸ Mundu woosi mundu uhing'ana nuvunyari vuvwo kandi uvula kuhulira lilala ku malago aga uhaana, aliitwa. Ove mugulu kandi muluviliri!”