Jona 4 - KITABU KITAKATIFU

Vutima vwa Jona ni Zimbavasi zia Nyasaye

¹ Zimbavasi zia Nyasaye ku Nineve ziavereriza nukusinyikiza Jona ligali.

² Kunangwa yasaala ku Yahova navoora, “O, Yahova, sindavoola ningikiri kutura yengo ndi, yiki nicho icha umanya okole vuzwa? Yicho nicho chagira ningora zinguru ziosi ukwirukira mu kivala cha Tarishishi. Ndaamanya vulahi ndi, ivi oveeye Nyasaye wuvuyanzi, kandi wizimbavasi, umwikuziri ku vutima, kandi umwetegeke kugirung'ana muziganagani, kandi kuvula kuhaana mageri.

³ Kunangwa O, Yahova, ngogonya oleke inzi nguzi nivulahi inzi nguzi kuvita kuva mwoyo.”

⁴ Navuzwa Yahova yamuteeva, “Kigira ki oveeye nu vutima?”

⁵ Jona yatura mu lidaala, nazia kolovega lwivugwi niyikara hasi. Yelombera lidiri, niyikara haasi mu chiriri chacho; nalindilira kolola kumanyaa chekoleke ku lidaala lia Nineve.

⁶ Maku Yahova Nyasaye yalomba kitagwa chiliungu naakekola kilande igulu, kikole ichiriri ku mutwi gwa Jona, kumulomba yiituliri mu liverera lilie lidamanu. Jona yayanzizwa ligali ni kitagwa yicho.

⁷ Navuzwa mumavwevwe, lidiku lialonda ku, Nyasaye yalaga engeeza ilie iliungu yilio, ma niliniaala.

⁸ Lwiliuva liatura, Nyasaye yatuma imbuza yivugwi isambaa. Liuva liasamba ku mutwi gwa Jona naye yaali ahimbi kukinda. Yegomba likuza navoora, “Nivulahi inzi nguzi kuvita kuva mwoyo.”

⁹ Navuzwa Nyasaye yavolera Jona, “Oveeye na kivuni ki ivi usinyiki kigira kitagwa?” Jona yativura, “Ndio, kuduuka sinyiki; mbeeye nuvunyari vwosi kusinyika kali kuduuka ku likuza!”

¹⁰ Yahova yamuvolera, “Ivi overereraa kitagwa cha wavula kokora ku muyinzi kali mulala, kandi kokekola kiviruki. Kitagwa yiki chaviruka vudiku vulala, kandi chaniala vudiku vwalonda ku.

¹¹ Ninzi, sigaanduukiraa kovererera Nineve, lidaala linene yilio! Kali ndio vaveeye mu navana kuvita 120,000 avataveeye nimbala yoosi kandi ni mitugu minyingi mu.”