Jona 3 - KITABU KITAKATIFU

Jona Yahulira Yahova

¹ Kandi Yahova yamoloma ku Jona, lwa kaviri.

² Yavoola, “Zia Nineve, lidaala linene yilio, wilwaziri avandu zana likuva liamali kukuha.”

³ Kunangwa, Jona yahulira Yahova kandi nazia Nineve kolondekana ni likuva lia Yahova. Lidaala lia Nineve liali linene ligali; kali liavugula madiku gavaga kogenda kuvitira mulio vugika.

⁴ Jona yaatanga kuvitira mu lidaala, kandi inyima wokogeenda lidiku liosi, yilwaza navoora, “Inyima wa madiku arubaini, Nineve liradivizwa.”

⁵ Avandu va Nineve vasuuvira likuva lia Nyasaye. Kunangwa valandiza ndi, mundu woosi kuduuka ahonge lilia; kandi avandu vosi, kutura ku munene kuduuka ku mukekeeke, viviiki zinguvu zia magunia kumanyia ndi, vamali kwiganira.

⁶ Lwu mwami wa Nineve yahulira goosi agaali nigekolekaa, yatura kondeve yu vwami, natuliza iganza yeye yu vwami, ni yiviika zinguvu ziamagunia, ma niyikara mu ligoke.

⁷ Kunangwa, yaatuliza lilago kulandizira avandu va Nineve ndi, “Yili liveeye lilaga kutura ku mwami kandi ku vatumikiri vaveeye hasi hehe. Mundu woosi atazazama kindu choosi kali hakuzu mba; avandu vosi, noho zing'ombe, noho magondi: vitalia noho kunwa amazi mba.

⁸ Avandu vosi kandi zinyama ziosi kuduuka viviiki zinguvu zia magunia. Avandu vosi, vaaniri ku Nyasaye nu mwoyo gwosi. Vagirung'ane sa mulala nokoleka miima midamanu, nivikolwa vidamanu.

⁹ Hawundi Nyasaye alagirung'anyia zing'anagani zizie. Hawundi alalekela uvutima, na kunyi kulavula kukuza!”

¹⁰ Nyasaye yalora icha vakora. Yalora ndi vamali kuleka miima jaavo midamanu. Kunangwa yagilung'anyia zing'anagani zizie, kandi siyamanya nahaana mageri kuvo kuli yaali navatihiizi mba.