Jona 2 - KITABU KITAKATIFU

¹ Kutura musi, munda mwisuzi, Jona yasaala ku Yahova Nyasaye weve:

² “Mu kivi change, O, Yahova, ndaanira ku ivi, kandi ivi waandivulira. Kutura musi mwi kihadisi, ndaanira nyoore ovokonyi, na ivi wambulira.

³ Ivi wasiuva mu luliva kulwaalo lwinyanza. Amazi manene gangumbiriza; viguvuli vivio ni viihi viosi viavitira ku inzi.

⁴ Ndaganagana ndi ndeveeywe ichova, ihale kutura imbiri wi zimoni zizio; simbeeye olola litembeli liilio litakatifu kandi mba.

⁵ Amazi gangumbiriza nigasesera; inyanza yululiva yangumbiriza ligali, indiva yu munyanza yilingirwa ku mutwi gwange.

⁶ Ndiyina musi kuduuka hi vigulu vitangira, mu kivala chi virivwa viacho viahanwa mihiga ni mihiga. Navuzwa ivi O, Yahova Nyasaye wange, waanzilanyia kutura mu vogo nimbeeye mwoyo.

⁷ Lwi livamwoyo liange liali nilitura mu inzi, ndasaara ku ivi, O, Yahova, kandi ivi wahulira lisaala liange, mu litembeli liilio litakatifu.

⁸ Yavo avasigamiraa vifananyi via vuzwa vamali koleka uvusuuvirifu vwavo ku ivi.

⁹ Navuzwa ndimba zinyimbu zie lizominywa ku ivi; ndahaana ku ivi kisiuviriru, kandi ndakora agaamali kulaga. Ovohonyi vuturaa ku Yahova!”

¹⁰ Yahova yalaga isuze iluki Jona ku lujinga lwinyanza. Naye yakola ndio.