Joeli 3 - KITABU KITAKATIFU

Nyasaye Alakakaragiri Izihiiri

¹ Yahova avoora, “Mu ing'inga yeyo ndiranyia vutugi vwi Ivuyuda na Jerusalemi.

² Ndavungiza zihiiri ziosi harara kandi ndazireta mu livona lia Jehoshafati liukukalagilwa. Hene yaho ndaavakalagira ku goosi agavakolera vandu vange. Vasalanyia Isiraeli muvivala vigeni kandi vagavulanyia Isiraeli, kivala change.

³ Vakuba ikura yokotovola oyo uvugura avahambe. Vaguliza avayaayi na vakana vinyu kuva avatugwa kutuunga vuguli vwa malaya ni iwaini.

⁴ “Mugerizaa kongolera kindu ki munyi avandu va Tiro, Sidoni na vandu vosi va Filisitia? Munyi mugerizaa kumbanza kisaalia? Nimukora ndio, ndiranyia kisaalia ku munyi vwangu!

⁵ Mwavugula ifeza nizahabu yange kandi mwaginga uvutugi vwange vwamavikiru nimuhila mu matemberi ginyu.

⁶ Mwavugula vandu vi Ivuyuda na Jerusalemi nimuvahila ihale kutura mu kivala chavo nukuvaguliza ku Avagureki.

⁷ Kalunu ndavaleta kutura havundu ha mwavaguliza. Na ndamukolera ligali kuli mwavakolera.

⁸ Ndaleka vayaayi vinyu na vakana vinyu vagulizwi ku vandu vi Ivuyuda; valagulizwa ihale wa Sabeanzi. Inzi, Yahova, mali kovora.

⁹ “Uhaane lilandiza yili ku zihiiri: ‘Mwetegeke vulwani; mulange avasikari vinyu vuvulwani; muvungizi avasikari vinyu harara na mutange ologendo!

¹⁰ Muturi magembe ginyu gave kuli vivavi ni zingonono zienyu zigwi amatimu. Muleke avadedekere vavoole, koveeye avuvulwani.

¹¹ Muuzi vwangu, Munyi vandu vosi avizihiiri ziahimbi, kandi mwivungize mu livona.’ ” O, Yahova, tuma amahi googo guvulwani gavingiliri.

¹² “Zihiiri kuduuka zietegeke kandi ziizi mulivoona lie likalaga. Hene yaho, inzi Yahova, ndikala nukukalagira zihiiri ziosi ziahimbi.

¹³ Ziveeye ziu vuchamu ligali, ndazitemagira hasi kuli vuswage mu ing'inga yiligesa; ndazishonolanyia kuli mizabibu jishonolanywa mulimiina lie iwaini yizuuye duu.”

¹⁴ Zihiiri zielefu ni zielefu ziveeye mulivoona liukukalaga. Ni hene yaho ahilidiku lia Yahova liizira vwangu.

¹⁵ Liuva nu mweli vilava kisundi, zing'ereng'ani sizirang'ereng'ana kandi mba.

Nyasaye Alakagasizi Avandu Veve

¹⁶ Yahova ahuumaa kutura mu kiguru cha Ziyoni; mwoyo gwigwe gwatuluruka kutura mu Jerusalemi; lirova ni ligulu videgera. Navuzwa alakinga vandu veve.

¹⁷ “Maku, munyi Isiraeli mulamanya ndi inzi mbeeye Yahova Nyasaye winyu. Menyaa mu Ziyoni, kiguru change Kitakatifu. Jerusalemi lilava lidaala Litakatifu; avageni sivalaliguuta kandi mba.

¹⁸ “Ku ing'inga yeyo, vigulu vilakunikwa ni milimi jimizabibu, kandi mitugu jilanyooleka kuvuli kiguru; mazi galavaho manyingi mumigera josi ji Ivuyuda. Mugera gulituluka kutura mu Litembeli lia Yahova, na gulasama livona lia Shitimu.

¹⁹ “Egebeti kilava kivala chi changalangwi, kandi Edomu kilava kivala chu mwigendinyama, kigira vingilira vandu vi Ivuyuda kandi ni vita vandu vacho avataali nimbala.

²⁰ Navuzwa avandu valamenya Ivuyuda mihiga ni mihiga na Jerusalemi lilavaho ku makura goosi.

²¹ Inzi ndatungiza kisaalia kigira yavo avamala kwitwa, kandi sindatulizaho mahiolo gaavo mba, kigira inzi Yahova menyaa mu Ziyoni.”