Joeli 2 - KITABU KITAKATIFU

Zisigi Kuli lieganihiza ku Lidiku lia Yahova

¹ Kuba kisiriva; kuba ulwanga ku avandu va Ziyoni, kiguru cha Nyasaye Kitakatifu. Mudegere, avandu vi Ivuyuda! Kigira lidiku lia Yahova lizaa vwangu.

² Na live lidiku lie kisundi kandi liovovereri, lidiku lia malesi kandi kisundi kenene. Zisigi zinyingi ziza kuli kisundi kenene kufumaa vigulu. Sihaalikuho ni kindu kuli yiki mba, kandi sikilivaho mba.

³ Ziliizaa vitagwa kuli muliru. Imbiri wazio kivala keveeye kuli mulimi gwa Edeni, navuzwa inyima wazio keveeye ichangalangwi kigumba. Sikeveho kinyala kohononoka mba.

⁴ Zihenza kuli zibarasi; zinyagula kuli zibarasi ziu vulwani.

⁵ Lwa zitumatuma ku zindongozi zie vigulu, zinyagura kuli muliviti gwa magare gu vulwani; zihumaa kuli vulimu vwumu vusambwa. Zilomba zimbaso kuli amahi manene gu vulwani getegeki kulwana.

⁶ Lwa ziesunda himbi, vuli mundu atizaa; mumoni mwosi mugirung'anaa mamubuhera.

⁷ Zingiliraa kuli avasikari vu vulwani; zinina kumadigi kuli vasikari. Ziosi zigenda ma zizia imbiri na sizigirung'ana nu

⁸ kuzia kunzira yizindi mba. Zivitira mu viugi viukukinga, navuzwa kindu sikiziigalira mba.

⁹ Ziziza vwangu nukutulira lidaala linene; zinyagulira ku madigi; zinina igulu ku zinyumba nukwingilira mumadirisia kuli aviivi.

¹⁰ Lirova lidegera imbiri wazio; ligulu lidegera. Liuva nu mweli vimwaminyiywi, zing'ereng'ani sizing'ereng'ana kandi mba.

¹¹ Yahova ahaanaa malago ku avasikari veve. Amahi gu vulwani agamuhuliraa gaveeye manyingi kandi agizingulu. O, lidiku lia Yahova liveeye liukutihiza ligali! Ivwaha ulihononoka kulio?

Mulango Kigira Lieganira

¹² Yahova avoora, “Navuzwa kali kalunu mwiganiri mugiligali na mwirane ku inzi mu lihonga lilia, lilira ni lisioma.

¹³ Leka mwoyo gugwo gwiliegehiza gumanyie ovovereri; kutandura zinguvu zienyu sigadukira mba.” Mwirane ku Yahova Nyasaye winyu. Aveeye wilivererera ligali kandi wizura zimbavasi; aveeye umwikuziri kandi lilagana lilie; aveeye mwetegeku inyinga yoosi kusamiha nukuvula kuhana amageri.

¹⁴ Nimutia Yahova Nyasaye winyu alagirung'anyia zing'anagani zizie na amugasizi nivitagwa vinyingi. Kunangwa mulava nu vuswage ni iwaini yukuhaana isadaka kuye.

¹⁵ Mukubi kisiriva ku kiguru cha Ziyoni; muhaane lilago lio kohonga lilia na mulange livugana!

¹⁶ Vungiza vandu harara; uvetegekize kulivugana litakatifu; oleete avakulundu; vungiza avana kandi nizindanya. Kali aviha vaserereywi valeke zinyumba ziavo vaze.

¹⁷ Avasaalisi avatumikiri va Yahova hagati hu vwali kandi nuvwingiliru vwi Litembeli, kuduuka valiri, vasaale na vavoole: “Yahova, overerere avandu vovo. Utaleka izihiiri zindi zikulege nokokokolera kehenyahenye nokovoora, ‘Aveeye hayi Nyasaye winyu?’ ”

Nyasaye Yiranyia Ovonolu mu Milimi

¹⁸ Kunangwa Yahova yavererela kivala chiche; yaali ni zimbavasi ku vandu veve.

¹⁹ Yavativulira: “Kalunu ndamuha vuswage, iwaini na maguta ga muzeituni, na muliigutizwa ligali. Zihiiri zindi siziramulegeriza kandi mba.

²⁰ Ndatulizaho Zisigi zinyingi ziatula ivaale ndakunga zindala kuzio kuzia mu changalangwi. Zisigi iziezidaraja ziembiri zilakungwa kuzia mu inyanza yi jumbi, zidaraja ziazio zitahulirika ligali mu Meditareniani mba. Imiviri jiazio mikuzu jilafunya vugundu. Ndazidiviza kigira goosi agazimali kumukolera.

²¹ “Milimi, mutatia mba, navuzwa musangare kandi muyanze kigira goosi aga Yahova amali kumukolera.

²² Zinyama, mutatia mba. Uvwayiru vusivuki; misaala jamaa makuyu gajo, mikuyu na mizabibu jiveeye ho muvunyingi.

²³ “Muyanze, avandu va Jerusalemi musangare ku aga Yahova Nyasaye winyu amali kumukolera. Umuheeye imbura induukiru mu ing'inga yi litaga; amukubiziiyi imbura yu vukindu kandi imbura yi limera kuli zing'inga ziavita.

²⁴ Oloze lulizura vuswage; amaliina gukuminira mu iwaini na maguta ga Muzeituni ga liizula.

²⁵ Ndamwiranyira via mwagotiza ku mihiga je kiduma chi zisigi lwa zialia vitagwa vienyu. Yaali inzi uwatuma amahi gu vulwani kumwingilira.

²⁶ Kalunu murava ni viukulia muvunyingi, kandi muliiguta. Mulizominya Yahova Nyasaye winyu, uwamukolera vindu viokogenyia. Avandu vange sivalachaywa kandi mba.

²⁷ Maku, Isiraeli, mulamanya ndi inzi mbeeye harara ni munyi, kandi inzi, Yahova, mbeeye Nyasaye winyu, kandi siaveeyeho na Nyasaye wundi mba. Na vandu vange sivalachaywa kandi mba.

Lidiku lia Yahova

²⁸ “Lwinyima ndaleta Roho wange ku avandu vosi: avana vinyu vayaayi na vakana valaporofeta avakulundu vinyu valalota amalooto, kandi vasoleri vinyu valalola malola.

²⁹ Ku ing'inga yeyo ndavika Roho wange kali ku avatugwa, vasaza na vakali harara.

³⁰ “Ndakahaana lieganihiza lie lidiku yilio mumalesi kandi ku lirova; naliveho litahiza lia masahi, muliru, kandi malesi gu mwoki.

³¹ Liuva lilamwaminywa, kandi mweli gulava mwakanyu kuli masahi lidiku linene liukutihiza lia Yahova likikiri kuduuka.

³² Navuzwa vosi avaaniraa Yahova, valahonywe. Kuli Yahova yavoola ‘Avalala mu Jerusalemi valahononoke; yavo avandatovola valahone.’ ”