Jeremia 9 - KITABU KITAKATIFU

¹ Ndakayanzi niiva mutwi gwange gwakaveeye kidaho cha mazi, kandi zimoni ziange kisinukiru chamaliga, kunangwa ndakaliri mbasu nu vudiku, kigira avandu vange vamali kwitwa.

² Nzegomba ndava na havundu ho komenya muchangalangwe, handali nyalakuva ihale kutura ku avandu vange. Vosi sivaveeye avasuuvirifu mba, vaveeye umuganda gwa vazami.

³ Vaveeye avetegeku vuli ing'inga kovora ovovehi. Kuvula kuvaho nu vusuuvirifu vwamihi ikivala kuvita uvusuuvirifu. Yahova avoora, “Avandu vange vakora uvudamanu ku vundi, kandi sivambugilira kuli Nyasaye wavo mba.”

⁴ Mugelihi ku avalina vinyu; mutasuuvira avamwavo vinyu mba. Vuli amwavo aveeye umuvehi, kandi vuli mundu aginaa nu mulina weve.

⁵ Vuli umundu aveheraa mutende weve, kandi siaveeyeho kali mulala ovola agiligali mba; vayiga okovoola vugadi vakoolaa uvudamanu kandi varuha kwiganira.

⁶ Yahova avoora vakora uvugadi vuli ing'inga; kigira uvugadi vwavo vasuura kumanyiriza inzi, Yahova avoora.

⁷ Kigira yaga Yahova Wuvunyali avoora, “Inzi ndatakasa avandu vange kuli kivia kandi ndavageriza Avandu vange vamali kokora uvudamanu, nikindiki kindi ichanyala kokora?

⁸ Zinimi ziavo ziveeye kuli mivano juvuta; zivoolaa ovovehi vuli ing'inga. Vuli mundu amolomaa amang'ana malahi kumutende weve, navuzwa mugiligali amutegaa mutego.

⁹ Nyara kuvula kuvaha amageri kigira ivindu yivi? Kandi nyara kuvanza kisaalia ku ihiiri kuli yiyi? Inzi, Yahova mali kovora.”

¹⁰ Ndaavoora, “Ndasiomera ivigulu kandi ndalilira iviayiru. Kigira vimali kwuma kandi umundu siavitaa mu mba ilihulirika lie mitugu lihulirika mba; amanyonyi kandi zinyama ziu muvulimu zimali kuburuka nu kuzia.”

¹¹ Yahova avoora, “Ndakora Jerusalemi ikitumi cha mang'anye, ahavundu hivivwi vimenya; amadara givuyuda galagwa viangalangwe, havundu hu mundu atamenyi.”

¹² Inzi ndaateva, “Yahova, kigira ki kivala chasambwa kandi chayumba kuli changalangwi, kunangwa umundu kali mulala sianyala kuvitiramu mba? Nivwaha oveeye umugeri kumanyiriza yaga? Nivwaha wawavoolera yaga kunangwa aduuki kovoolera avandi?”

¹³ Yahova yativura, “Yaga gamali kokoleka kigira avandu vange valeka amigizu gandaavaha. Sivatia inzi anoho kokora gandavavoolera mba.

¹⁴ Muvogono yivwo vamali kuva avahindagirizi nukusigamira ivifananyi via Baali kuli avaguuga vaavo vavigiza vakole.

¹⁵ Kunangwa huliri aga inzi Yahova Wuvunyali, Nyasaye wa avandu va Isiraeli nziza kokora: Inzi ndaha avandu vange ivitagwa vilulu valie kandi isumu vanwi.

¹⁶ Ndavasalanyira muzihiiri ziayavo kali avaguuga vaavo vakiri kuzihulira ku, kandi ndavatumira amahi gavingiliri kuduuka lwambadiviza ligali.”

Avandu va Jerusalemi Vanira Ovokonyi

¹⁷ Yahova Wuvunyali yavoola, “Muganagane ku agekolekaa! Mulange avasiomi vaze, mulange avakali avimbaa zinyimbu zielikuza.”

¹⁸ Avandu vavoola, “Vavooleri vakole vwangu vakwimbiri zinyimbu zielikuza, kuduuka lwizimoni zietu zizura maliga, kandi kuduuka lwi zimoni zietu ziituruka maliga. ”

¹⁹ Hulira ilihulirika lielilira mu Ziyoni, “Kwadivizwa! Koveeye muzisoni ligali! Kuduuka kutuli mukivala chiitu; zinyumba zietu zimali kusambulwa.”

²⁰ Inzi ndaavoora, “Avakali munyi, muhuliri Yahova, kandi muhulirize amakuva geege. Mwigizi vakana vinyu kuli vasioma, kandi avalina vinyu kuli vimba lwimbu lwi likuza.

²¹ Likuza liayingira kuvitira mumadirisia kandi liziiyi muzinyumba zietu ziuvwami; liiti avana kuzinzira, kandi avasaza vasoleri liviti.

²² Miviri jiavakuzu jiasalanywa havundu hoosi, kuli vitumi vie isiina mumirimi, kuli uvuswage votemeywi nukungarwa numugesi, kuli uvuswage vumundu atavungizi. Yaga nigo aga Yahova amboleeye mbore.”

²³ Yahova avoora, “Avandu vageri vatigingira kigira ovogeri vwavo mba, anoho avandu vizingulu kigira zinguru ziavo mba, noho avandu vatugi kigira uvuhinda vwavo mba.

²⁴ Niiva mulala yenya kwigingira, gamuduukira yigingiri ndi yamanya kandi amanyirizaa inzi, kigira uvuyanzi vwange vutaveeye nekeheri, kandi ngolaa agaveeye malungi kandi malahi. Yivi nivio vindu viyanziza. Inzi Yahova mali kovora.”

²⁵ Yahova avoora, “Madiku gaaza, lwa ndihaana mageri ku yavo vosi avakevwa vuzwa kuligodo -

²⁶ Avandu va Egebeti, Ivuyuda, Edomu, Amoni, Moabu kandi avandu avamenyaa muchangalangwe nivivala vie ihale. Kigira izihiiri yizi ziosi nagiligali siziakevwa mba, kandi kali avandu vosi va Isiraeli sivakevwa mumwoyo mba.”