Jeremia 8 - KITABU KITAKATIFU

¹ “Ku ing'inga yene yeyo, vigumba via avami vi Ivuyuda kandi vigumba via avanene, avasaalisi, avaporofeti kandi na avandu vandi vosi avamenyaa mu Jerusalemi, vilakatulizwi mu virindwa.

² Vigumba yivi vilakavagalwe ku muvasu kandi ku mweli ni zing'ereng'ani via vayaanza kandi via vatumikira, kandi via venya zing'anagani kutura ku vio, kandi via vasigamira. Vigumba yivi sivilakavungizwi nu kuyavirwa mba, navuzwa vilakave kuli isiina kumalova.

³ Avandu vi ihiiri indamanu yiyi avatigara, valakamenye havundu aha ndavasalanyira hoosi ahamali kuvahila; valakenye kukuza muvogono vwu kuzizagilira komenya. Inzi Yahova Wuvunyali mali kovora.”

Uvwoni na Amageri

⁴ Yahova yambolera mbolere avandu veve ndi, “Lwa vandu vagwiza hasi, sivasingira kandi? Niiva mundu alagota inzira, siamanya yirana kandi?

⁵ Kigira ki munyi avandu vange mugirung'anaa kutura ku inzi navuzwa simwirana kuinzi mba. Mwahanda ku vifananyi vienyu kandi mwasuura kwirana ku inzi.

⁶ Ndaahuliriza vulahi ligali, navuzwa si mwavoora agiligali mba. Kali mundu mulala kumunyi siyaverera kigira uvuchamu vwivwe mba; kandi mundu mulala siyeteeva ku ndi, ‘Kindiki kidamanu cha inzi mali kokora?’ Vuli mundu azizaa kunzira yeeye umwene, kuli ibarasi inyagura zimbiru kuzia mu vulwani.

⁷ Kali amagungu gaamanya ing'inga yu kwirana; kali amakuulu, ziminyi na amang'oani gaamanya ing'inga yu kung'anya. Navuzwa avandu vange munyi, si mwamanya amalago gange aga mwamiihiraa mba.

⁸ Munyi munyalandi kovora muveeye avageri, kandi mwamanya amalago gange? Henza, avang'odi avataveeye avasuuvirifu vamali kugirung'anyia amalago kugwa ovovehi.

⁹ Avandu vovogeri valaviikwa mu zisoni, kohenda mioyo kandi valagumirwa; vamali kusuura makuva gange. Kalunu vogeri ki vwa vaveeye navwo?

¹⁰ Kulwayago ndahaana milimi jaavo ku avandu vandi kandi avakali vaavo valahevwa avasaza vandi. Vuli mundu, munene kandi mukekeeke alageriza kolomba amabesa munzira itaveeye isuuvirifu. Kali avaporofeti na avasaalisi vagada avandu.

¹¹ Vakora kuli zingwagu zia avandu vange ziveeye vuzwa lwiyago. Vavoola, ‘Goosi gaveeye amalahi,’ lwa goosi gataveeye amalahi mba.

¹² Avandu vange, mwaali ni zisoni kigira mwakora vindu viukuvihiliriza yivi? Awa, simwali nisoni mba sivahendaa mioyo jaavo kali hakuzu mba; si mwamanya kali lwa mwaali mu zisoni mba. Kulwayago, mulagwa kuli avandi vamali kugwa. Lwa mbana amageri ku munyi, yicho kilava keheri chienyu. Inzi Yahova mali kovora.

¹³ “Ndeenya kuviika avandu vange harara kuli umulimi avungiza ligesa lilie harara navuzwa vaveeye kuli mizabibu vugira amakuyu; kali amatu gene gamali kuniara. Kulwayago, mali kuvugilira avageni kuvugura kivala chavo.”

¹⁴ Avandu va Nyasaye vateva, “Kigira ki kwikali hano makiriri? Gendi kunyaguli kuzie mu madaala manene gi zimbinga, na kukuziri uwene yeyo. Yahova Nyasaye wiitu umali kukukalagira likuza; umali kukuha isumu kunwi, kigira kumali kokora uvwoni kuye.

¹⁵ Kwahenzelera kove mu mirembe, navuzwa uvulahi sivwaali ho mba; kandi kwahenzelera kove mu mirembe nilihonywa, navuzwa kwaali mu litihizwa.

¹⁶ Avasigu viitu vadukikale mu lidaala linene lia Dani; kuhuliraa lihuuma lie zibarasi ziavo. Kivala choosi kedegeraa lwi zibarasi ziavo zifuumaa. Avasigu viitu vazi kudiviza kivala chietu kandi ni vindu viosi viveeye mu, lidaala lietu linene harara na avandu vamenyi mu.”

¹⁷ Yahova avoora, “Henza, ndatuma avasigu kuli zinzoka ni vihirigoma hagati hinyu, si zilakolerwa ku uvusegetiri mba, navuzwa zilamuluma.”

Ovovereri vwa Jeremia ku avandu va Nyasaye

¹⁸ Ovovereri vwange si vunyala kohonywa mba; mwoyo gwange gulwaye.

¹⁹ Muhulirizi! Mbulira avandu vange nivalira mukivala choosi: “Yahova yatura mu Ziyoni? Mwami wa Ziyoni yatura yo kandi naye?” Yahova, mwami wavo yativura, “Kigira ki mwakora inzi kuva nu vutima ku lisigamira vifananyi viinyu! Kandi linamira avanyasaye vinyu avageni avataveeye kindu?”

²⁰ Avandu valira ni vavoola, “Ing'inga yi ligesa eheri, umbasu gufeye, navuzwa sikwanyoola vokonyi mba!”

²¹ Mwoyo gwange gulwaye, kigira avandu vange vakuzi; inzi siomaa kandi mbeeye mu lihenda mwoyo ligali.

²² Lunyasi luvulaho mu Gileadi? Avaahi vi zinyasi vavulayo? Kigira ki avandu vange sivanyooye lihona mba?