Jeremia 7 - KITABU KITAKATIFU

Jeremia Yilwaza mu Litembeli

¹ Yili nilikuva liazia ku Jeremia kutura ku Yahova navoora,

² “Zia usingili mu vwingiliru vwi kirivwa chi Litembeli ma ulandizi likuva yili: Muhuliri Likuva lia Yahova, munyi vosi avandu vi Ivuyuda avingiraa mu virivwa yivi nu kusigamira Yahova.

³ Yahova Wuvunyali, Nyasaye wa avandu va Isiraeli avoora ndi, mugirung'anyie liiva lie limenya lienyu, kandi muleke vikolwa vienyu, na ndaleka mumenye havundu hano.

⁴ Mutasuuvira amakuva gu vugadi yaga mba: ‘Yili ni Litembeli lia Yahova, yili ni Litembeli lia Yahova!’

⁵ “Mugirung'anyie liiva lie limenya lienyu, kandi muleke vikolwa vienyu vidamanu muhaane likalaga liveeye lirungi ku mundu mulala nu wache.

⁶ Niiva mulaleka kudambiza avageni, avavisandu kandi avakunzakali, anoho kwita avandu vatali nimbala mukivala yiki, kandi nimuleka kusigamira avanyasaye vandi ku lisalira lienyu aveene,

⁷ Niiva mulagirung'ana, ndamuvugirira mumenye havundu hano, mu kivala cha ndahaana ku avaguuga vinyu mihiga ni mihiga.

⁸ “Henza, munyi musuuviraa mu amakuva gu vugadi.

⁹ Munyi mwivaa, mwitaa, mukoraa ovoheyi, muvooraa ovovehi mu liesuha, muhaana visiuviliru ku Baali, kandi musigamira avanyasaye vandi avamwavula kumanya maziambiri.

¹⁰ Munyi mukoraa vindu yivi via inzi suraa maku muzaa kusingira imbiri wange mu Litembeli liange nimuvooraa, ‘Kunyi kwahonywa!’

¹¹ Muganaganaa ndi Litembeli liange liveeye kuli luhangaywa lwa avanuli vivisamu? Inzi mali kolola aga munyi mukoraa.

¹² Kalunu muzie Shilo, havundu haali hukutanga inzi kotovola kuva ahukusigamira; na mulole agandakola kigira uvwoni vwa avandu vange Isiraeli.

¹³ Munyi mumali kokora uvwoni yivu vwosi, kali niiva ndamoloma ku munyi haali kanyingi, navuzwa mwasuura kuhulira. Si muhugilaa lwa inzi mulangaa mba.

¹⁴ Kunangwa agandakola ku Shilo, ndakora ku Litembeli liange yili, iliamwali ni mwasuuvira mulio. Havundu yaaha ahandahaana ku avaguuga vinyu kandi ni munyi, ndakora kindu kilala chere cha ndaakola ku Shilo.

¹⁵ Ndamukunga muturi imbiri wange kuli ndakunga aviiko vinyu, avandu va Isiraeli. Inzi Yahova mali kovora.”

Livula Kutia lia Avandu

¹⁶ Yahova yavoola, Jeremia, “Utasaalira avandu yava mba, utavalirira kinga kusaalira kuinzi mu vogono vwavo mba; utavagoonyera ku inzi mba, utagonya inzi kigira yavo mba, kigira si ndakuhulira mba.

¹⁷ Ivi si ololaa agavakolaa mu madaala manene gi Ivuyuda kandi mu zinzira zia Jerusalemi?

¹⁸ Avana vatenya iziingu, na avasaza valomba umuliru na avakali vaduvula uvusie vaduuki kolombera munyasaye wi kikali migadi - ulangangwa ‘Mwami wi kikali wu mwigulu.’ Kandi vahaana vihaanwa vie iwaini ku avanyasaye vandi, kunangwa vaduuki kusinyikiza.

¹⁹ Navuzwa inzi niyee wavasinyikizaa? Awa, visinyikizaa aveene kandi vivikaa aveene muzisoni.

²⁰ Kulwayago, inzi Mwami Munene Yahova, ndaviika vutima vwange vululu ku Litembeli yili. Ndaviika kandi ku avandu harara ni zinyama, kali ni misaala harara ni vitagwa viu mumilimi. Vutima vwange vulava kuli muliru gutanyala kusiminywa nu mundu.

²¹ “Munyi avandu vange, visiuviliru vilala musaambiraa ku vwali, ni vindi mwavugilirwa kulia. Navuzwa inzi Yahova Nyasaye mbolandi, munyala kali kuvilia viosi.

²² Ing'inga ya ndaaleeta avaguuga vinyu kutura mukivala cha Egebeti, si ndavaha amalago kigira vihaanwa viu kusaamba mba, anoho visiuviliru vindi viosi mba.

²³ Navuzwa ndaavalaga vaduuki kutia inzi, kunangwa inzi nduuki kuva Nyasaye wavo navo vaduuki kuva avandu vange; kandi ndaavavoolera vamenye kuli wandaali nindaavalaga, kunangwa vaduuki komenya vulahi.

²⁴ Navuzwa si venya kutia anoho kuhulira inzi mba. Mu vogono vwene yivwo, vaakora goosi agavaganaganaa mu mioyo jaavo kokora amadinyu kandi amadamanu. Vaagwa avadamanu ligali havogono hukuva avalahi ligali.

²⁵ Kutura ing'inga ya avaguuga vinyu vatura mukivala cha Egebeti kuduuka ing'inga yene yiyi, ndaazizagilira kutuma avatumikiri vange avaporofeti ku munyi.

²⁶ Navuzwa si yaliho kali mulala uwatia anoho uwahulira mba. Muvogono yivwo, mwagwa avadinyu ligali kandi avibaali kali kuvita avaguuga vinyu.

²⁷ “Kunangwa, Jeremia, ulamoloma amakuva yaga goosi ku avandu vange, navuzwa si valakuhulira mba; ulavalanga navuzwa si valakutivulira mba.

²⁸ Ulavavolera ndi, ihiiri yaavo si eveeye ni liitia ku inzi mba, Yahova Nyasaye wavo mba, anoho si veenyanga kwiga kutura ku lihevwa amageri mba. Uvusuuvirifu si vuveeye muvo mba, sivunyala komolomwa ku kali hakuzu mba.

Vikolwa viu vwoni mu Livona lia Hinomu

²⁹ “Musiome, munyi avandu va Jerusalemi, muvege liisu lienyu na mulisiuvi ihale. Mwimbi zinyimbu zie likuza ku zindongozi zie vigulu, kigira inzi Yahova mbeeye nu vutima, mali kusuura avandu vange.

³⁰ “Avandu vi Ivuyuda vamali kokora vindu vidamanu imbiri wange. Vamali kuviika vifananyi viavo via inzi ndasuura mu Litembeli liange kandi vamali kuliononyia.

³¹ Vamali kwumbaka uvwali vulaangwa ‘Tofezi’ mu livona liu mwana wa Hinomu, kunangwa vaduuki kuhaana avayaayi vaavo na avakaana vaavo vasambwe mu muliru kuli visiuviliru. Inzi si ndaavalaga vakore yaga mba, anoho si gaali mu zing'anagani ziange mba.

³² Kulwayago, ing'inga ilakaaze lwa uvwali yivu navuvuli kulangwa Tofezi, anoho Livona lia Hinomu, navuzwa halalangwa Livona liu kusinza. Livona yili lilava liu kuyaviramu avandu vakuzu, kigira sihaveeye ho na havundu handi hukuyavira avakuzu mba.

³³ Miviri ja vakuzu yiji jilava viukulia via manyonyi kandi vie zinyama ziu muvulimu, si halavaho nu mundu mulala ulinyala kuzitiihiza mba.

³⁴ Kivala yiki kilagwa ichangalangwe. Mu madaala amanene gi Ivuyuda kandi mu zinzira zia Jerusalemi, ndaheriza uvusangari kandi uvuyanzi vwa oyo osererwa kandi osereranga.