Jeremia 6 - KITABU KITAKATIFU

Jerusalemi Ikumbiriziywi Navasigu

¹ Avandu va Benjamini, mwiruki munyore lihonywa! Muhononoke kutura ku avandu va Jerusalemi! Mukubi kisiriva mu Tekoa kandi mwumbake kimanyiru chu muliru mu Bezi Hakeremi. Kivi ni liononyia viveeye ahimbi kuuza kutura Ivaale.

² Lidaala lia Ziyoni liveeye lilahi navuzwa lilakadivizwi;

³ avami valaza yo harara na mahi gaavo. Valakumbake amahema gaavo agaza gakumbirizi lidaala, navuli mundu samulala namenye humwoyo gwigwe guyaanzaa.

⁴ Navavoole, “Mwetegeke kwingilira avandu va Jerusalemi! Mwetegeke! Kulingilira mbasu hagati!” Kunangwa valavoora, “Ing'inga yakuvita, lidiku liveeye ahimbi kufa, kandi mugolova guduuki.

⁵ Kulingilira havudiku; kuladiviza zimbinga zielidaala.”

⁶ Yahova Wuvunyali umali kuhaana lilago ku avami vateme misaala kandi vumbake vitumi kunangwa vakumbirizi Jerusalemi. Umali koroola, “Ndaha lidaala yili amageri kigira avadambizi vaveeyemu avanyingi.

⁷ Kuli kidaho kilinda mazi gacho vulahi, nindio avandu va Jerusalemi valinda uvudamanu vwavo vulahi. Mbulira kilage ligali niliononyia mu lidaala; ndolaa uvulwaye nizingwagu.

⁸ Avandu va Isiraeli leki linyangiza yili live chukwiganihiza ku munyi, anoho inzi ndamuleka; ndagirung'anyia lidaala lienyu kuva changalangwi, havundu humundu kali mulala atamenyaa.”

Avandu va Isiraeli Vukwibaara

⁹ Yahova Wuvunyali yamboolera, “Avandu va Isiraeli valalekwa vuzwa kuli mulimi gwi kizabibu, ugwa mazabibu gagwo gamali kwagurwa. Kunangwa gamuduukira musoole mundu siamulala lwa ing'inga ikikiriho.”

¹⁰ Inzi ndaativura, “Ivwaha unyala kuhulira inzi niiva ndamoloma kuvo nukuviganihiza? Vaveeye avahindagirizi kandi vasuura kuhulira amakuva googo; vasekeriza aga ombolela mbavoolere.

¹¹ Uvutima vuvwo kuvo vwaka kandi mu inzi, Yahova sinyala kuvuviika kandi mba.” Maku Yahova yambolera, “Manyia uvutima vwange ku avana muzinzira kandi kuviduma via vasoleri. Avasaza na vakali valahirwa ihale kandi avakulundu sivalahononoka mba.

¹² Zinyumba ziavo kandi imilimi, navakari vaavo, vilahaanwa kuvandi. Nziza kuhaana amageri ku vandu vikivala yiki.

¹³ Siavuli mundu, mukuzuzu ku munene agerizaa kwenyolera mabese muinzira itaveeye yuvusuvilifu; kali kuli avaporofeti navasaalisi vagada avandu.

¹⁴ Vakolavuzwa zingwagu zia avandu vange ziveeye vuzwa uvwiyago. Vavoola, ‘Goosi gaveeye amalahi,’ ulwa goosi gataveeye amalahi.

¹⁵ Vaali nizisoni kigira vakora ivindu viukuvihiliriza yivi? Awa, sivali nizisoni kali hakuzu mba; sivaheendaku mwoyo mba. Kulwayago valagwa kuli avandu vandi vamali kugwa; lwanambahe amageri, yilio nalive limaliriza liavo. Inzi Yahova, mali, kovora.”

Isiraeli vasuura inzira ya Nyasaye

¹⁶ Yahova yavolera avandu veve, “Musingiri muvwavukaniru vwizinzira na muhenze. Muvateeve zinzira ziakale kandi winzira indahi eveeye. Mugeendeku kandi muramenya mumirembe.” Navuzwa vavoola, “Awa kokora mba!”

¹⁷ Maku Yahova yatovola avalindi avukuhuliriza kisiriva chukwiganihiza. Navuzwa vavoola, “Sikulahulira mba.”

¹⁸ Kunangwa Yahova yavoola, “Muhuliri munyi zihiiri, kandi mwigi kukizizaa kwekoleka ku avandu vange.

¹⁹ Huliri, avandu! Kuli amageri kigira lilohiza liavo ndaleta lidivizwa ku avandu yava, kigira vasuura amigizu gange kandi sivahulira amakuva gange mba.

²⁰ Simbugilira ku kimuli chamundetera kutura Sheba anoho ivindu vifunya umwayu kutura mukivala chihale mba? Sindavugilira zisadaka ziavo anoho sindayanzilira ivisiuviliru viavo mba.

²¹ Kunangwa ndakora avandu yava visigatiri nu kugwa. Avababa, avana, avalina kandi avatende vosi valakuza.”

Kwingilirwa kutura Ivaale

²² Yahova avoora, “Avandu vazaa kutura mukivala cha Ivaale; ihiiri enene eveeye yihale yetegekiza vulwaana.

²³ Vavuguyi uvuta na amatimu; vaveeye avalulu kandi sivaveeye nizimbavasi mba. Vahulirika kuli inyanza ihuuma lwahiraa zibarasi ziavo. Vazaa kuli avasaza muliihi nivalohizi kwingiira munyi, O, avandu va Jerusalemi.”

²⁴ “Kumali kuhulira amakuva amageni,” avandu va Jerusalemi vavoola, “Kandi amakono giitu gavula zinguru; koveeye nuvuzunu vululu kuli mukali oveeye mulilumwa liu mwana.

²⁵ Kutazia ichova mumilimi anoho kogende kuzinzira, kigira avasigu vaveeye nivivavi kandi litihiza liveeye muzimbega ziosi.”

²⁶ Yahova avooreraa avandu veve, “Mwiviki zinguvu ziamagunia na mugalagale muligoke. Musiome vululu kuli unyala kusioma mwana muderwa, kigira oyo uzaa kudiviza munyi nonoho alamwingiira.

²⁷ Jeremia, ogerizi avandu vange, kuli unyala kogeriza kivia, kandi wenyelerizi kuli vaveeye.

²⁸ Vaveeye vosi avibaali vahindagirizi, avadinyu kuli mugasa nikivia. Vosi vaveeye avuvwoneku vazizaa yiyi nayiyi nivalandiza vovehi.

²⁹ Muliru gusambaa vululu, navuzwa lisasi silisaluluka nokotonyatonya mba. Navuzwa kuzizagilira kutakasa avandu vange, kigira yavo avaveeye avadamanu sivatulizwa ho mba.

³⁰ Kunangwa valalangwa ifeza yasuulwa kigira inzi, Yahova mali kuvasuura.”