Jeremia 52 - KITABU KITAKATIFU

Liigwa lia Jerusalemi

¹ Zedekia yaali ni mihiga 21 lwa yagwa mwami wi Ivuyuda, na yamiha mu Jerusalemi ku mihiga 11. Mama weve yaali Hamutali, mukaana wa Jeremia kutura mu lidaala linene lia Libuna.

² Mwami Zedekia yakola uvwoni imbiri wa Yahova, kuli mwami Jehoyakimu yakola.

³ Yahova yaali nu vutima ligali navandu va Jerusalemi ni Ivuyuda, na yavakunga kutura imbiri weve. Zedekia yibaala ku mwami Nebukadineza wa Babiloni,

⁴ kunangwa Nebukadineza yaza harara navasaza vi liihi lilie vosi kwingilira Jerusalemi ku lidiku lie likomi mu mweli gwi likomi ku muhiga gwa tisa gwiliamiha lia Zedekia. Vumbaka amahema gu vulwani ichova wi lidaala, vumbaka madigi agu kukumbiriza lidaala nukulikinga,

⁵ niliva hasi huvulindi kuduuka muhiga gwa 11 gwi liamiiha lia Zedekia.

⁶ Ku lidiku lia tisa, mu mweli gwa kane mu muhiga gwene yigwo, lwi nzara yaali inyingi na sihaali ho ni chukulia ku avandu,

⁷ amadigi gilidaala linene gafudulanywa mu. Kali niiva avandu va Babiloni vaali ni vakumberizi lidaala linene, avasikari vosi viruka ing'inga yu vudiku. Vavitira mu inzira yu mulimi gwu vwami, nivavitira mu kirivwa chahambanyia amadigi, kandi ni virukira mulovega lwilivona liumugera gwa Jorodani.

⁸ Navuzwa iliihi lia avandu va Babiloni valonda mwami Zedekia, nivamugumilira mu kereremo ahimbi na Jeriko, na avasikari veve vosi viiruka nivamuleka.

⁹ Mwami Zedekia yahilwa ku mwami Nebukadineza, uwaali mu lidaala linene lia Ribula mukivala cha Hamazi, kandi wene yeyo mwami Nebukadineza yakalagira Zedekia.

¹⁰ Ha Ribula Nebukadineza yita avana va Zedekia na Zedekia nalora kandi yakalagira avanene vi Ivuyuda.

¹¹ Inyima wa yago, yaatuliza Zimoni zia Zedekia, naamuvoha niminyororo ma naamuhira Babiloni. Zedekia yaatigara muvuhambe mu Babiloni kuduuka lidiku lia yakuza.

Liononywa lie Litembeli

¹² Ku lidiku lie likomi, mweli gwakatano, mu muhiga gwa 19 gwi liamiiha liu mwami Nebukadineza wa Babiloni, Nebuzaradani mwani wi zing'anagani wu mwami kandi mwimiliri wi liihi lilie, yaza Jerusalemi.

¹³ Yasamba Litembeli, inyumba yu vwami, harara ni zinyumba ziosi zia avandu vanene mu Jerusalemi;

¹⁴ na avasikari veve vaduya nukusambula madigi gi lidaala linene ga Jerusalemi.

¹⁵ Maku Nebuzaradani yavugula avandu vaali nivatigaye mu lidaala linene, avasaza vatigara avaari ne limanya linene, avasiza na avatuli kandi yavo avaari niviluki kutura ku mwami wa Babiloni, naavahira mu lihaminywa.

¹⁶ Navuzwa yaleka mu Ivuyuda avandu valala avaari avadaka ligali, avataveeye ni miandu, naavavika kuyinzira mu milimi ji mizabibu.

¹⁷ Avandu va Babiloni vaavunanyia zitiru zii migasa mu vidonye, na magare gu kuginga vindu agaali mu Litembeli, harara ni lidangi linene liumugasa, kandi vaahira migasa josi mu Babiloni.

¹⁸ Vavugura kandi ivijiko viosi, kandi iviju viviika ligoke ilitumikaa kunihiza uvwali, iviju vitumikaa kulinda zitaya, iviju vitumikaa kukinga masahi kutura ku ivisiuviliru, iviju vitumikanga kusamba vimuli viumwayu, harara ni viju vindi viosi viumugasa ivitumikaa mu Litembeli.

¹⁹ Vaavugura kindu choosi chalombwa ku izahabu anoho ifeza: Zisahani zinguzuzu, vifulia vitumikanga kuginga amanda gumuliru, zisahani zitumikanga kukinga amasahi kutura ku ivisiuviliru, iviju vivika iligoke, itiiru yi itaya, iviju vitumikaa kusamba vimuli viumwayu, kandi nizisahani zitumikaa kusundura isadaka yi iwaini.

²⁰ Vindu viu mugasa viu mwami Solomoni yaali nalombi mu Litembeli - zitiru ziviri, magare gukuginga vindu, lidangi linene, kandi nizigiriki komi na mbili ziakonyelera, viali vilitu ligali kogera.

²¹ Zitiru ziviri ziafanana: na vuli indala yaali zimita munane uvutambi, nizimita 5.3 vuvambalaru. Ziali zifuduranyie ni ikivia chaali zimilimita 75 uvulitu.

²² Na kondongozi kwa vuli itiiru kwaali nu mugasa zimita 2.2 uvutambi. Vuli kumutwi gwosi gwi itiru gwakumbirizwa na amangirinya gu mugasa na amakuyu gu musaala gwu mukomamanga na ziosi zialombwa nu mugasa.

²³ Mukomamanga gialiho 96 muzimbega ziosi; imikomamanga giosi giali 100 ku amangirinya gakumbiriza.

Avandu vi Ivuyuda vaahirwa mu Babiloni

²⁴ Komeeda Nebuzaradani, munyabara munene wi liihi, yaahira muvuhambe Seraya musaalisi munene, Zefania musaalisi olondeleri wumusaalisi munene, na avanene vaduukiru vandi vavaga vumu Litembeli.

²⁵ Kutura mu lidaala linene yaahira munene mulala waali munene wa mahe, avahaani viziganagani saba vo mwami avaari nivatigara mu lidaala linene, mulondeleri wu munene waavikaa mang'oda gu vulwani, harara na avasaza vandi vaduukiru 60.

²⁶ Nebuzaradani yavahila ku mwami wa Babiloni, waali mu lidaala linene lia Ribula

²⁷ mukivala cha Hamazi. Hene yaho, mwami yalaga vakuywi ma viitwi. Kunangwa avandu vi Ivuyuda vaahirwa ihale mu vuhambe kutura mukivala chavo.

²⁸ Yili nilivaliza lia avandu va Nebukadineza yaahira muvuhambe: Muliamiha lilie liu muhiga gwa saba yaahira avandu 3,023;

²⁹ mu muhiga gwigwe gwa komi 18 yaahira avandu 832 kutura Jerusalemi;

³⁰ kandi mumuhiga gwigwe gwa 23 Nebuzaradani yaahira avandu 745. Vosi harara avahilwa mulihaminywa vaali avandu 4,600.

³¹ Mu muhiga gwa Evili-Merodaki yagwa mwami wa Babiloni, yamanyia zimbavasi ku mwami Jehoyakini wi Ivuyuda ku limuvoholola kutura muvuhambe. Yaga gekoleka ku lidiku lia 25 liu mweli gwa 12 gwu muhiga wa 37 inyima wa Jehoyakini yaali navuguliywi kuli muhambe.

³² Evili-Merodaki yamukolera vulahi, kandi naamuha uvwiyangu vwu luyali lonene ligali, kuvita vwa yaaha avami vandi avaari mu vuhambe harara naye mu Babiloni.

³³ Kunangwa Jehoyakini yaavugilirwa kugirung'ana kutura mu zinguvu zizie ziu vuhambe kandi kuzia kulia harara nu mwami kazozo mu livamwoyo lilie liatigala liosi.

³⁴ Vuli lidiku ku madiku goosi ga yaali mwoyo, yahevwa mabesa kigira uvutumiki vwa kazozo vwi lienya lilie.