Jeremia 51 - KITABU KITAKATIFU

Lizizagilira Kukalagira Babiloni

¹ Yahova avoora, “Henza, ndaleta imbuza yu kudiviza ku kivala cha Babiloni kandi ku avandu vamenyi mu.

² Ndatuma avageni kuuza kudiviza kivala cha Babiloni kuli imbuza ihuuzanga amavululi. Lwi lidiku liu kudiviza yilio liduka, valingilira kivala cha Babiloni ku zimbega ziosi nokoleka kivala chere.

³ Mutahaana vwiyangu ku avasikari vaavo kulasa uvuta vwavo mba, anoho viviiki zisalamba ziavo mba! Mutahonyia avasoleri vaavo mba. Mudivizi liihi liavo liosi!

⁴ Valatozwa nukugwa hasi mu zinzira zia amadara gaavo amanene, kandi valakuzira mukivala cha Babiloni.

⁵ Inze Yahova Nyasaye Wuvunyali, sindaaleka avandu va Isiraeli kandi avandu vi Ivuyuda mba; navuzwa avandu va Babiloni vaveeye namahiolo manyingi ku inzi, Mutakatifu wa Isiraeli.

⁶ Mwiruki kutura mukivala cha Babiloni! Vuli mundu yehonyie umwene! Mutitwa kigira uvwoni vwa avandu va Babiloni mba. Kalunu mbanzaa kisaalia kandi mbana amageri ku vandu yava kuli gavadukiraa.

⁷ Avandu va Babiloni vaali kuli kekombe chi zahabu mu mukono gwange, ichaloomba kivala choosi kuhambika. Zihiiri zianwa iwaini ma nivararuka.

⁸ Nonoho avandu va Babiloni vamali kugwa kandi kudivizwa! Muvasiomele! Muhenze zinyasi ku vulwaye yivu, hawundi vanyara kohonywa.

⁹ Avageni vamenyi mu kivala yicho vavoola, ‘Kwageliza kokonya Babiloni, navuzwa sikwanyala mba. Gendi kuvaleke kalunu na kwilane mukivala chiitu. Nyasaye amali kuhaana amageri ku vandu va Babiloni ni zinguru zizie ziosi kandi umali kuvadiviza ligali.’ ”

¹⁰ Yahova avoora, “Avandu vange vahanzuka, ‘Yahova amali kumanyia ndi kunyi koveeye mu vulungi. Gendi kuzie kovolere avandu mu Jerusalemi aga Yahova Nyasaye wiitu amali kokora.’ ”

¹¹ Yahova amali kusinyikiza avami va Media, kigira asaaviyi kudiviza Babiloni. Alakola ndio kuvanza kisaalia kigira vayononyia Litembeli lilie. Avanene vi Liihi liukwingilira vamali kulaga ndi, “Muhiagale mivano jinyu ju vuta! Mwetegekizi zinguva zienyu!

¹² Muhaane kimanyiru chu kwingilira amadigi ga Babiloni. Mukore avasikari kuva ni zinguru! Muvatumi vazie kogoneka nu kuvingilira!” Yahova amali kokora aga yavoola alakola ku avandu va Babiloni.

¹³ Kivala yicho keveeye ni migera minyingi kandi amaviikiru guvutugi, navuzwa ing'inga yacho imali kuduuka, kandi livamwoyo liacho limali kohera.

¹⁴ Yahova Wuvunyali umali kwisuuha mwene ndi, alaleeta avasaza avanyingi kwingilira Babiloni kuli muganda gwi zisigi, na valava ni lihanzuka lie liguuta.

Lwimbu lwu Kwizominya Nyasaye

¹⁵ Yahova yalomba lirova kuzinguru zizie mwene; Yalomba kivala novogeri vwivwe mwene kandi navambura ligulu.

¹⁶ Amazi gahuumaa mu ligulu ku lilaga lilie; aleetaa amalesi kutura ku keheri chi lirova. Alombaa lihemahema lie zimbeni mu imbura, kandi atumaa imbuza kutura mu kedeera chiche.

¹⁷ Muliiva kuli yili, avandu valoreka kuva avasiru kandi vugira limanyiriza; yavo avalomba vifananyi vaveeye mu zisoni, kigira avanyasaye vavalomba sivaveeye avagiligali mba kandi sivaveeye ni livamwoyo mba.

¹⁸ Vaveeye vuzwa kandi kuduuka valeganywe; lwa Yahova ahaanaa amageri kuvo, vosi valadivizwa ligali.

¹⁹ Nyasaye wa Yakobo siaveeye kuli yavo mba; niye walomba vuli kindu, kandi umali kotovola Isiraeli kuva vandu veve mwene. Lieta lilie ni Yahova Wuvunyali.

Inyundu ya Yahova

²⁰ Yahova avoora, “Babiloni, ivi oveeye kuli inyundu yange, kandi ichugi chi iliihi liange. Ndaakutumikira kuduvuranyia zihiiri kandi kudiviza uvwami,

²¹ ndaakutumikira kwatanyia zibarasi harara na avahili vazio, ndaavunanyia amagare gu vulwani, harara na avahili vago.

²² Ndaakutumikira kwiita avasaza na vakali, ndaasinza avasaakulu na avasoleri, avayaayi kandi avakaana.

²³ Ndaakutumikira kusinza avayi harara ni viayo viavo, kusinza vasaza avalimi harara ni zigiriki ziavo ziu kuliminya; ndaakutumikira kuduvuranyia avamihi kandi avanene vaavo.”

Amageri ku Babiloni

²⁴ Yahova avoora, “Mulalora inzi nimbanza kisaalia ku Babiloni harara na vandu valio kigira uvwoni vwosi vwa vaakora ku Jerusalemi.

²⁵ Babiloni, ivi oveeye kuli kiguru ikidivizanga kivala choosi, navuzwa Inzi, Yahova mbeeye musigu woovo. Ndakuvugura, ngusisuli kuduuka kumalova, ma ngoleke noveeye kuli ligoke.

²⁶ Sililavaho ligina kali lilala kutura ku mang'anye googo ililakatumikilwi kwumbaka mba. Ulakave kuli changalangwi mihiga ni mihiga. Inzi Yahova mali kovora.

²⁷ “Muhaane kimanyiru chu kwingilira! Mukubi kisiriva kunangwa zihiiri zihuliri! Mwetegekizi zihiiri kulwaana Babiloni! Muvoolere uvwami vwa Ararati, Mini, na Ashikenazi vingiliri Babiloni. Mutovole munene ave mwimiliri wi liihi. Muleete zibarasi kuli muganda gwi zisigi.

²⁸ Mwetegekizi zihiiri kulwana Babiloni. Mutumane avami va Media, aviimiliri vaavo harara navanene vaavo kandi amahi goosi gi vivala via vamiiha mu.

²⁹ Kivala kedegeraa kandi chisungusikaa kigira Yahova adukizaa lilohiza lilie kokora Babiloni changalangwi, wu mundu avula komenya.

³⁰ Avasikari va Babiloni vamali kolekera kulwaana, vatigaye mu zimbinga ziavo. Liluvirira liavo ligehi kandi vamali kugwa kuli avakali. Virivwa vie lidaala linene vivunanyiywi, ni zinyumba zimali kusambwa.

³¹ Avatumwa vanyagura zimbiru kuzia kovoolera mwami wa Babiloni ndi, lidaala lilie linene limali kwingilirwa kutura ku zimbega ziosi.

³² Avasigu vamali kugumira uvwambukiru vwi migera kandi vamali kusamba zimbinga. Avasikari va Babiloni vaveeye nuvuti.

³³ Nonoho avasigu valavatuula hasi nukuvaduvagiraho kuli uvuswage koloze. Inzi, Yahova Wuvunyali, Nyasaye wa vandu va Isiraeli mali kovora.”

³⁴ Nebukadineza, mwami wa Babiloni amali kwononyia Lidaala linene lia Jerusalemi kandi kuliduvuranyia. Alikoli kuva hazwa kuli ikiju; alamili vugara kuli ogoyoka ogonene. Avuguyi viosi via yenya kandi asiuvi ivindi viosi vitigaye ihale.

³⁵ Leki avandu va Ziyoni vavoole, “Vwakaveeye vulahi avandu va Babiloni vadulwi ku vutindi vwakoleka ku kunyi!” Leki avandu va Jerusalemi vavoole, “Vwakaveeye vulahi avandu va Babiloni kudulwa ku uvusaaliri vwitu!”

Yahova Alakonya Avandu va Isiraeli

³⁶ Kunangwa, Yahova yavolera avandu va Jerusalemi ndi, “Ndavugura lienya lienyu, na ndavanza kisaalia ku avasigu vinyu ku goosi gavakolaa ku munyi. Nduminyaa ivisenukiru via mazi ga Babiloni kandi ndakora migera josi kwuma.

³⁷ Kivala yicho cha Babiloni kilagwa kitumi cha mang'anye, havundu hi zinyama ziu muvulimu zilakamenye. Kilakave kivala chu vuti; mundu sialakamenye mu mba, kandi vosi avalolaa kivala yiki, valakave nuvuti ligali.

³⁸ Avandu va Babiloni vosi valahuuma kuli zisimba, kandi valakenya kuli mwana wi simba.

³⁹ Lwavava ni vaveeye ni nzara, ndavalombera lilia, kandi ndavakora valie kandi vanwi ni vasaangala. Valagona na sivalavuka kandi mba.

⁴⁰ Ndavahila vasinzwi kuli amagondi, vimeme kandi zimburi. Inzi, Yahova Wuvunyali mali kovora.”

Lidivizwa lia Babiloni

⁴¹ Yahova avoora yaga kigira Babiloni, “Lidaala linene lie kivala choosi chiizominyaa limali kugumirwa! Limali kugwa havundu hukutihiza ku zihiiri ziosi!

⁴² Inyanza imali kusunduka mu Babiloni kandi igikuniki kuli iviguvuli vihuumaa.

⁴³ Tudaala twalio tumali kugwa litihiza, toveeye kuli changalangwi chumu, havundu hu mundu anyala kuvula komenya kandi kali kogenda mba.

⁴⁴ Inzi ndahaana amageri ku Beli, umunyasaye wa Babiloni, kandi ndamukora ahaane vindu viosi via yavugula. Zihiiri si ziramusigamira kandi mba. “Madigi gi lidaala lia Babiloni gamali kugwa.

⁴⁵ Avandu va Isiraeli, mwiruki kutura mu lidaala yili! Mwesoole kutura ku vutima vwange vululu!

⁴⁶ Mutakuza mioyo mba anoho mutatia kigira amakuva ga muhulira mba. Vuli muhiga amakuva guvutindi galalanda mu kivala kandi avami valalwaana avami vandi.

⁴⁷ Kulwayago, ing'inga yiza lwa nambane amageri ku vifananyi via Babiloni. Ndaviika kivala choosi mu zisoni; kandi ndiita avandu vosi avamenyi mukivala yiki.

⁴⁸ Vindu viosi viveeye muligulu kandi mu lirova, viliimba nuvusangali lwa Babiloni igumilwa nu kudivizwa na vandu, kutura Ivaale!

⁴⁹ Babiloni yaleeta likuza ku avandu vanyingi vi lirova, na kalunu Babiloni ilagwa kigira yaleeta likuza ku avandu va Isiraeli. Inzi, Yahova mali kovora.”

Amakuva ga Nyasaye ku avandu va Isiraeli mu Babiloni

⁵⁰ Yahova avooreraa avandu veve mu Babiloni ndi, “Munyi mumali kohononoka kutura mu likuza! Kalunu muzie, na mutalindagira mba! Kali niiva muveeye ihale kutura yengo, muganagane inzi, Yahova winyu, kandi mwizurizi Jerusalemi.

⁵¹ Munyi muvooraa, ‘Kunyi kumali konyegwa kandi kuvikwa mu zisoni; si koveeye ni liekonya liosi mba kigira avageni vamali kuvugura havundu hatakatifu mu Litembeli.’

⁵² Kunangwa inzi mboraa ndi ing'inga yiza lwa nambane amageri ku vifananyi via Babiloni, kandi yavo avaazaa vatozwe valakaliri mukivala choosi.

⁵³ Kali niiva avandu va Babiloni valakanine muligulu, nu kwumbakayo zimbinga zie zinguru ligali, navuzwa ndakatumi avandu kuvadiviza. Inzi Yahova mali kovora.”

Lizizagilira Kudiviza Babiloni

⁵⁴ Yahova avoora, “Hulirizi umwoyo gwi lilira mu Babiloni, gwi lisioma kigira lidiviza lie kivala cha Babiloni.

⁵⁵ Inzi ndivizaa Babiloni kandi ndichiling'anyia ligali. Amahi galadidikana kwingira mu Babiloni kuli lihuuma lie viguvuli via mazi nu kuvingilira ni liyoga lie lihanzuka.

⁵⁶ Avasigu vamali kuza kudiviza Babiloni; avasikari valio vamali kugumirwa, kandi vamali kuvunanyia mivano jaavo ju vuta. Inzi mbeeye Nyasaye uhaanaa amageri ku vudamanu. Ndakolera Babiloni kuli gavadukiraa.

⁵⁷ Ndakora avanene vaavo kandi avasaza vovogeri, avamihi vaavo kandi aviimiliri vaavo, na avasikari vaavo vahambiki. Valazia kogona na si valavuka kandi mba. Inzi, mwami, Yahova Wuvunyali, mali kovora.

⁵⁸ Amadigi amadinyu gi lidaala lia Babiloni galavunguluka, virivwa vialio vitambi vilasambwa. Miyinzi midinyu ja vandu jilava hazwa, miyinzi ji zihiiri jirava kuli jolomemo lwu muliru. Inzi, Yahova wuvwami mali kovora.”

Jeremia ahaanaa Likaratasi Lilingiywi ku Seraya kuhila Babiloni

⁵⁹ Yaga na makuva ga inzi Jeremia ndahaana ku Seraya mwana wa Neria, mwisukulu wa Mahiseya, lwa yazia Babiloni nu mwami Zedekia wi Ivuyuda mu muhiga gwa kane gwi liamiiha lilie.

⁶⁰ Inzi Jeremia ndaang'oda mu karatasi ilingiywi uvudamanu vwosi uvwaza vuduuki mukivala cha Babiloni, kandi vindu viosi iviang'odwa kigira Babiloni.

⁶¹ Ndaamuvolera, “Lwa uduuka Babiloni, olole ndi osomi vudinyu ku vandu makuva goosi agang'odwa mu karatasi ilingiywi yiyi.

⁶² Maku usaale ndi, ‘O, Yahova, ivi umali kovora ndi, uladiviza kivala yiki, kunangwa kindu kali kilala si kilamenya kucho mba, mundu anoho inyama. Kilava kuli changalangwi mihiga ni mihiga.’

⁶³ Lwa umala kosoma ikaratasi ilingiywi yiyi, maku ogevohe ku ligina ma usiuvi mu mugera gwa Efurate.

⁶⁴ Maku ovoole, ‘Kivala cha Babiloni kilagwa, na si kilasingila kandi mba, kigira lidiviza lia Yahova azizaa koleta kucho.’ ” Makuva ga inzi Jeremia gaheri yaaha.