Jeremia 50 - KITABU KITAKATIFU

Babiloni Lilagumilwa

¹ Yili ni likuva lia Yahova yambolera kigira lidaala lia Babiloni navandu valio:

² “Ovolere izihiiri amakuva malahi! Ugalandizi! Uhaane kelolero ma ulandizi makuva malahi! Utagaviika mu vwivisu mba! Babiloni ilakaguutwi! Umunyasaye wavo Mariduki umali kosekerizwa! Ivifananyi via Babiloni viveeye muzisoni, ivifananyi vialio viukuvihiliriza vidiviziywi!

³ “Ihiiri kutura Ivaale imali kuuza nukwingilira Babiloni kandi ilaliloomba kuva changalangwi. Avandu ni zinyama valiruka kandi siaveeyeho kali mulala ulimenyayo mba.”

Lirana lia Avandu va Isiraeli

⁴ Yahova avoora, “Lwing'inga yeyo iliduuka, avandu vombi va Isiraeli ni Ivuyuda valakaze nivalira, nivenya inzi, Nyasaye wavo.

⁵ Navalateeve inzira izizaa Ziyoni ma navazie mulovega lwene yilwo. Valalomba ninzi lilagana litaveeye nekeheri kandi sivaaza valivunanyie mba.

⁶ “Avandu vange vaveeye kuli magondi agavayi vamali koleka gagotele mu vigulu. Vamali kogendagenda kuli magondi kutura kukigulu kilala kuzia ku kindi, kandi vamali kwivilira yengo wavo.

⁷ Vosi avavanyooraa vavingilira. Vasigu vaavo vavoola, ‘Vaakolera Yahova uvwoni, kandi ndio, agakumali kokora sigaveeye amadamanu mba. Avaguuga vaavo vaasuuvira mu Yahova, na yavo aveene ngano vaali vasuuviri muye.’

⁸ “Avandu va Isiraeli mwiruki kutura ku Babiloni! Muturi mukivala! Muve avukutanga kutura!

⁹ Nziza koleta muganda gwizihiiri ziezingulu kutura Ivaale kandi ndazikola kwingilira avandu va Babiloni. Navalombe zimbaso muliihi nukwingilira kivala nukukiguuta. Vaveeye avahizi vuvusiza, mivano jukulasa sijizizaa halovega mba.

¹⁰ Babiloni lilaranywa, na yavo avalilanya navavuguli kindu choosi chavenyaa. Inzi, Yahova mali kovora.”

Liigwa lia Babiloni

¹¹ Yahova avoora, “Avandu va Babiloni, munyi mwalanya kivala change. Munyi muveeye nuvuyanzi kandi nuvusangali, muzizaa yiyi na yiyi kuli eng'ombe esenasena vuswage anoho kuli muliviti gwi zibarasi,

¹² navuzwa lidaala lienyu linene lilagehizwa kandi lilava muzisoni. Babiloni ilava ihiiri yinyima ku ziosi; lilava liumu kandi lilagwa changalangwi.

¹³ Kigira uvutima vwange siaveeyeho nu mundu kali mulala ulimenya mu Babiloni mba; nalitigale amang'anye, kandi vosi avaliviitira ahimbi kulio navegose kandi navagenye.

¹⁴ “Vasaza vukulasa uvuta, muzie mulwaane avandu va Babiloni kandi muvakumbilizi. Muvalase mivano jinyu josi, kigira vamali kokora uvwoni ku inzi, Yahova.

¹⁵ Mukubi zikwiri zie liihi mu lidaala linene liosi! Kalunu Babiloni imali kwiyama. Madigi galio gamali kuduyanywa nukugwa. Inzi mbanzaa kisaalia change ku vandu va Babiloni. Kunangwa munyi muvanze kisaalia kuvo, kandi muvakolere kuli vaakolera avandi.

¹⁶ Mutaleka vamizi uvumwu mukivala yicho anoho vagesa mba. Vuli umundu mugeni omenya mu kivala yiki alatia kigira liihi kandi alirana mu kivala chiche mwene.”

Lirana Lia Avandu va Isiraeli

¹⁷ Yahova avoora, “Avandu va Isiraeli vaveeye kuli magondi gakungwa kandi gasalanywa nizisimba. Vingilirwa mulitanga nu mwami wa Asiria, kandi mwami Nebukadineza wa Babiloni yamenena ivigumba viavo.

¹⁸ Kigira yaga, Inzi, Yahova Wuvunyali, Nyasaye wa avandu va Isiraeli ndahaana mageri ku mwami Nebukadineza nikivala chiche, kuli ndahaana mageri ku mwami wa Asiria.

¹⁹ Inzi ndiranyia avandu va Isiraeli mukivala chavo. Navalie viukulia viviruka ku kiguru cha Karimeli kandi numukivala cha Bashani. Navalie viosi viaveenya kutura ku vitagwa viviruka muvivala via Efuraimu na Gileadi.

²⁰ Lwa ing'inga yeyo iduuka, uvwoni sivulinyolekaku mukivala cha Isiraeli anoho uvuchamu mukivala chi Ivuyuda mba, kigira ndakasamihi avandu va Inzi mali kohonyia. Inzi, Yahova mali kovora.”

Likalaga lia Nyasaye ku vandu va Babiloni

²¹ Yahova avoora, “Wingilira avandu va Merazaimu na Pekodi. Uviti kandi uvadivizi. Okole goosi agangulagaa. Inzi Yahova mali kovora.

²² Liyoga lie liihi lihulirika mukivala, kandi lidivizwa linene liveeyeho ligali.

²³ Babiloni yaduyanyia lirova liosi muvidonye, kandi kalunu inyundu yene yeyo imali kuvunika! Zihiiri ziosi zimali kwegosa ku agaamali kwekoleka ku kivala.

²⁴ Avandu va Babiloni, munyi mwalwana inzi, na mumali kugumirwa mumutego gwa ndamutega, kali niiva simwamanya mba.

²⁵ Inzi mali kukunula havundu hi viugi viange viavikwa, kandi mali kuvituliza ichova mu vutima vwange, kigira Inzi, mwami munene Yahova Wuvunyali mbeeye nimiyinzi jokokola mu Babiloni.

²⁶ Mwingiliri lidaala yili kutura muzimbega ziosi na mwingiri havundu ahuvuswage vwaviikwa! Muvungizi vitumi vialanywa kuli vitumi vwuvuswage! Mudiviza kivala! Mutaleka ku kindu kali kilala mba!

²⁷ Mwiti avasikari vaavo vosi! Muvasinzi! Avandu va Babiloni vadiviziywi! Ing'inga imali kuduuka iyavahevwa mageri!”

²⁸ Avahaali virukanga kutura Babiloni kuzia Jerusalemi, ma vavoola kuli Yahova Nyasaye wiitu yaavanza kisaalia ku aga vandu va Babiloni vaali nivakoli ku Litembeli.

²⁹ “Vooleri avasaza vukulasa vuta vingiliri avandu va Babiloni. Mutumi vuli mundu uwamanya kutumikira vuta ni mivano. Mukumbilizi lidaala linene kandi mutaleka mundu kali mulala yiruki mba. Muvanze kisaalia ku avandu valio ku goosi aga vamali kokora, kandi muvakolere kuli vaakolera avandi, kigira vaakolera inzi mu lierora, Mutakatifu wa Isiraeli.

³⁰ Kunangwa avayaayi vasoleri valio navitirwi muzinzira zie lidaala, kandi vasikari valio vosi navadivizwi kulidiku yilio. Inzi, Yahova mali kovora.

³¹ “Munyi avandu va Babiloni muveeye niliegingira, kunangwa Inzi, Mwami munene Yahova Wuvunyali mali kumudunyira! Ing'inga imali kuduuka ya inzi namuhe mageri.

³² Ihiiri yinyu yeliegingira niyikigatili ma nigwi, kandi sinaveho mundu kali mulala waza agivukizi mba. Inzi nasambe madaala ginyu, kandi nandivizi kindu choosi keveeye ahimbi.”

³³ Yahova Wuvunyali avoora, “Avandu va Isiraeli na vandu vi Vuyuda vadambizwa. Vosi avavagumila vavalinda vudinyu ligali kandi sivanyala kuvavoholola mba.

³⁴ Navuzwa mulala uwaza avasoole aveeye nizinguru wi lieta lilie liveeye Yahova Wuvunyali. Mwene alavakolera kekolwa nokoleta milembe ku kivala, navuzwa uvudinyu vulava ku vandu va Babiloni.”

³⁵ Yahova avoora, “Likuza ku Babiloni! Likuza ku vandu valio, ku vimiliri valio, ku vasaza valio vovogeri.

³⁶ Likuza ku avaporofeti vaavo vovovehi, vaveeye avasilu! Likuza kuvasikali vaavo, vaveeye nuvuti ligali!

³⁷ Mudivizi zibarasi ziavo namagare gaavo gu vulwani! Likuza kuvasikali vaavo vukutungwa, vaveeye avadedekere ligali! Mudivizi mavikiru gaavo; kandi mulanye.

³⁸ Muleete kemeyi mukivala chavo kandi mwuminyi migera jaavo. Babiloni nikivala keveeye nivifananyi viukutihiza, iviamala kokora avandu kugwa avasilu.

³⁹ “Kunangwa zinyama ziu mbulimu, zimbiti na mahudu vilamenya mu Babiloni. Avandu makura goosi sivalamenya mu kivala yiki mihiga ni mihiga mba.

⁴⁰ Kindu kilala chere kilakekoleke ku Babiloni kuli chekoleka ku Sodoma na Gomora lwa ndaadiviza harara namadaala ga himbi. Siaveeyeho kali mundu mulala ulimenya mu kandi mba. Inzi, Yahova mali kovora.

⁴¹ “Avandu vaza kutura mukivala chi Ivaale, ihiiri yizingulu yihale; avami vanyingi vetegekera vulwani.

⁴² Vamali kuvugura uvuta vwavo nivivavi; vaveeye avalulu kandi vugira zimbavasi. Vahulirika kuli inyanza ihuuma, lwa vahiraa zibarasi ziavo. Vaveeye avetegeke kulwaana vandu va Babiloni.

⁴³ Mwami wa Babiloni uhuliyi makuva mageni, kandi makono geege sigaveeye nizinguru kali hakuzu mba. Umali kugumirwa muvuzunu, uvuzunu kuli vwumukali oveeye mu lilumwa liu mwana.

⁴⁴ “Kuli isimba itulaa mu mulitu munene ahimbi nu mugera Jorodani nukuzia mukivala chuvwayiru vuvisi, Inzi, Yahova ndaaza kandi ndakora avandu va Babiloni nonoho kunyagula nu kuzia ihale kutura mu lidaala liavo. Maku mwimiliri wa Inzi nandovole alakamiihi ihiiri. Nivwaha unyala kufwananywa ninzi? Nivwaha wakaagelani ninzi? Mwami ki wakahing'ani ninzi?

⁴⁵ Kunangwa hulira lilohiza liamali kolomba kigira lidaala linene lia Babiloni, kandi chang'anagana kokolera avandu valio. Kali avana vaavo navakungwi, kandi vuli mundu naave nuvuti ligali.

⁴⁶ Lwa Babiloni iligwa, nalive liyoga iliaza likore kivala choosi kodegera, kandi mwoyo gwi lilira liavo gulakahuliriki hagati hi zihiiri.”