Jeremia 5 - KITABU KITAKATIFU

Uvwoni vwa Avandu va Jerusalemi

¹ Munyi avandu va Jerusalemi, munyaguli yiyi ni yiyi mu zinzira! Muhenze vuli muzimbega na mwelolere aveene! Mwenyelerizi mu vilitu! Munyala konyoora mundu mulala okolaa agaveeye amalungi, kandi ogerizaa kuva musuuvirifu ku Nyasaye? Niiva mulamunyoola, Yahova alamusamiiha.

² Kali niiva muvooraa musigamira Yahova, simukola agagiligali mulimusigamira liinyu mba.

³ Gaveeye agiligali ndi Yahova ahenzaa vusuuvirifu. Yamuha amageri, navuzwa si mwenya kuhulira mba; yaamuduvulanyia, navuzwa mwasuura kwiga. Mwaali nikilage kuli ligina kandi mwasura kwiganira uvwoni vwinyu.

⁴ Maku ndaavoora, “Yava vaveeye vuzwa avadaka kandi si vamanyi ikindu mba. Si vamanyi aga Yahova yenya mba, kandi si valoondanga lilago lia Nyasaye wavo mba.

⁵ Ndazia ku avandu vaveeye nuvunyari, kandi ndamoloma navo; kigira vamanya aga Nyasaye wavo yenya, kandi aga Yahova yenya vakole.” Navuzwa vosi vamali kusura zinguru zia Yahova, kandi si venya kumuhulira mba.

⁶ Kulwayago avasigu valaza kutura mu militu kuli zisimba nukuviita, kandi valaza kulia vivwi kutura mu changalangwi nu kuvatandulanyia mu vidonye. Avasigu yava valavagoneka kuli zingo mu madaala gaavo. Niiva avandu yava valatura ichova, valatandulanywa mu vidonye kigira uvwoni vwavo voveeye uvunyingi. Vuli ing'inga vagirung'ana kutura ku Nyasaye.

⁷ Yahova yateeva, “Kigira ki samiihi uvwoni vwa avandu vange? Vamali kondeka kandi vamali kusigamira avanyasaye vataveeye va agiligali. Ndaavalihiza kuduuka niviguta ligali, navuzwa vaakora ovoheyi, kandi vatumikira vwiyangu vwavo kokora ovoheyi.

⁸ Vaali kuli zibarasi zing'omeru ni likayirwa lia vakali. Vuli mundu samulala yaali ni lienya kuva nu mukali wu mutende weve.

⁹ Nyara kuvaha amageri kigira kokora vindu kuli yivi, kandi kuvanza kisaalia ku ihiiri kuli yiyi?

¹⁰ Ndatuma avasigu kotema mizabibu ja avandu vange, navuzwa vavuli kujidiviza ligali mba. Ndavavolera vahaluliri zisia kigira si ziveeye ziange mba.

¹¹ Avandu va Isiraeli na Ivuyuda si vaveeye avasuuvirifu ku inzi mba. Inzi Yahova mali kovora.”

Yahova Umali kusura avandu va Isiraeli

¹² Avandu va Yahova vamali kumusura kandi vavoola, “Yahova sianyala kokora kindu kukunyi mba. Uvudamanu sivulaza kukunyi mba, kandi si kulava nu vulwani anoho inzara mba.”

¹³ Avaporofeti vaveeye vuzwa kuli imbuza; Likuva lia Yahova si liveeye muvo mba. Na ndio yaga galakoleka kuvo.

¹⁴ Yahova Nyasaye Wuvunyali yambolera, “Kigira vamali kovora makuva yaga, ndakora makuva gange gave kuli muliru mu minwa jiinyu, na avandu valava kuli zingu, na muliru gulavasamba ligali.”

¹⁵ Avandu va Isiraeli, Yahova aletaa ihiiri kutura ihale kumwingilira. Eveeye ihiiri yizingulu kandi iyakale ligali, lulimi lwavo simulumanyi mba:

¹⁶ Avasaza vaavo vukulasa uvuta vaveeye avasikari vizingulu ligali avitaa vugira kovererera.

¹⁷ Valononyia vitagwa vienyu kandi viukulia vienyu; valiita avayaayi na avakaana vinyu. Valasinza mitugu jinyu kandi valononyia mizabibu ni mikuyu jinyu. Liihi liavo liladiviza amadara ginyu gizimbinga agamwasuuvira.

¹⁸ Yahova avoora, “Navuzwa kali mu madiku gene yago, si ndadiviza ligali avandu vange mba.

¹⁹ Lwa avandu yava vateva kigira ki ndaakola vindu yivi viosi, uvavoolere ndi, kuli vagirung'ana kutura ku inzi, nivatumikira avanyasaye vandi avageni mukivala chavo aveene, nandio valatumikira avageni mukivala kitaveeye ichaavo.”

Nyasaye yiganihiza avandu veve

²⁰ Yahova avoora, “Muvoolere visukululwi via Yakobo kandi avandu vi Ivuyuda:

²¹ Muhuliri, munyi avandu vasiru kandi avataveeye ni limanya. Muveeye ni zimoni, navuzwa si munyala kolola mba. Muveeye na matuyi, navuzwa si munyala kuhulira mba.

²² Inzi mbeeye Yahova; kigira ki simunyala kundia? Kigira ki si munyala kodegera imbiri wange mba? Ndaviika muyeke kuva kuli lwako lwi inyanza, love ludinyu ligali kali mazi gavuli kuvita. Kali viguvuli nivihinulanyia, amazi siganyala kuvita mba; kali inyanza nihuuma, navuzwa amazi si ganyala kuvunaga lwako yilu mba.

²³ Navuzwa vandu munyi! Muveeye ni mioyo midinyu kandi avibaali; mumali kugirung'ana nukuzia halovega kandi muleki inzi.

²⁴ Simwaganagana kuhaana luyali ku inzi mba, kali niiva ndaamuha imbura mu zing'inga ziokosembera, kandi mu zing'inga ziechuvwi kandi nimunyoola amasiza gi ligesa vuli muhiga.

²⁵ Uvudamanu vwinyu vumali kugirung'anyia vindu yivi viosi, kandi uvwoni vwinyu vumali kwigalira ivindu vilahi viosi kutura ku munyi.

²⁶ “Avandu vadamanu vamenyaa hagati ha avandu vange; viivisi nukulindilira kuli avasaza vategi umutego vagumiri amanyonyi, navuzwa vamali kotega mitego jaavo kugumira avandu.

²⁷ Kuli umuhimi yizuliza amasera geege namanyonyi, nandio avandu yava vamali kwizuliza zinyumba ziavo nivindu via vamali kulanya. Yiki nicho kigira avandu yava nivava nizinguru kandi avatugi,

²⁸ kandi kigira vaveeye avakomeru ligali kandi avanifu. Si vaveeye nekeheri ku vikolwa viavo vidamanu mba. Sivahaana ku avavisandu agadukanaa navo mba, anoho si vamanyia likalaga lirungi ku avadambi mba.

²⁹ “Navuzwa inzi Yahova, ndahaana amageri kuvo kigira vindu yivi; ndavanza kisaalia ku ihiiri yiyi.

³⁰ Likuva liokogenyia kandi kutihiza limali kokoleka mu kivala:

³¹ Avaporofeti vavoola makuva guvugadi vuzwa; avasaalisi vamiiha kolondekana nilienya lia avaporofeti, na avandu vange si vagaya ivindu yivi mba. Navuzwa munyi, mulakola ki lwa vindu yivi viosi viduuka ku keheri?”