Jeremia 49 - KITABU KITAKATIFU

Likalaga lia Yahova ku avandu va Amoni

¹ Yaga nigo aga Yahova yavoola kigira avandu va Amoni: “Avasaza va Isiraeli vaveeye hayi? Avulaho mundu kali mulala unyala kukinga kivala chavo? Kigira ki valeka avandu vasigamira Moleki kuvugura kivala chihiiri ya Gadi nokomenya yo?

² Navuzwa ing'inga yiza lwa nangore avandu vi lidaala linene lia Raba kuhulira liyoga liu vulwani, kandi lilava hazwa na amadara gayo galasambwa. Maku avandu va Isiraeli valavugula kivala chavo kutura ku avandu vaali nivakivugura.

³ Mukubi zikwiri munyi avandu va Heshiboni! Lidaala lia Ayi lidiviziywi! Avakali va Raba, musiome! Mwiviki zinguvu zia magunia kandi musiome. Munyaguli yiyi na yiyi muligoyana. Umunyasaye winyu Moleki alahirwa mulihaminywa harara navasaalisi veve na avanene veve.

⁴ Kigira ki munyi avandu vataveeye nilisuvira mwidayaa? Munyi muguutwa. Kigira ki musuuviraa mu zinguru zienyu kandi muvooraa siaveeyeho unyala kogeliza kumwingilira mba?

⁵ Ndamutiihiza kutura muzimbega ziosi. Munyi vosi muranyagula kuzia ihale. Vuli mundu alanyagula nukwesoola, kandi sinahaveho nu mundu kali mulala waza yiranyie avasikari vinyu vi liihi harara kandi mba.

⁶ “Navuzwa lwinyima nangaasizi avandu va Amoni. Inzi, Yahova mali kovora.”

Likalaga lia Yahova ku Edomu

⁷ Yaga nigo aga Yahova Wuvunyali yavoola kigira avandu va Edomu: Avandu va Edomu vagotiza likalaga liavo lilahi? Avahaani viziganagani vaavo vanyara kuvavolera chokokola? Vogeri vwavo vwosi vwagota?

⁸ Avandu va Dedani, mugirung'ane kandi munyaguli, mwivisi muzimbangaywa zwumuusi, kigira ndaleta kivi ku visukululwi via Esau ku ing'inga yanambahe amageri.

⁹ Lwa avandu vagesa Mazabibu valeka malala ku makuyu, kandi lwa avanuuli vaza vudiku vavugura vuzwa ichaveenya.

¹⁰ Navuzwa inzi mali kokora visukululwi via Esau kuva chahonyo ligali, kandi kulang'aminya havundu haavo hu kwivisa, kunangwa vavuli kwivisa kandi mba. Avandu vosi va Edomu vadivizwi. Siaveeye ho kali mulala utigaye mba.

¹¹ Muleke avavisandu vinyu, inzi ndavalinda kandi muleke avakunzakali vinyu veleede kuinzi.

¹² “Kali niiva yavo avataduukanaa vahevwe mageri, muganaganaa mulavula kohevwa mageri? Awa munyi kuduuka munyore mageri malala mere!

¹³ Inzi mwene mali kwisuha ndi lidaala lia Bozira lilava havundu hukutihiza kandi changalangwi; avandu valali kolera kehenyahenye nukutumikira lieta lialio kuli kilaamo. Amadara goosi gahimbi galava hazwa kazozo. Inzi Yahova mali kovora.”

¹⁴ Inzi ndaavoora, “Avandu va Edomu, Inzi mali konyoora makuva kutura ku Yahova. Yakutuma mutumwa kovoolera zihiiri vavungizi avasikari vaavo kandi vetegeke kwingilira munyi.

¹⁵ Yahova azizaa kumukola kuva vadedekere, kandi mundu kali mulala si alahaana liegehiza ku munyi mba.

¹⁶ Lielora liyinyu limali kumugaada. Avulaho mundu kali mulala utizanga munyi kali niiva muganaganaa vamutiizaa. Munyi mumenyaa muzimbangaywa ziezinyanda, igulu kukigulu; navuzwa kali niiva mwamenya igulu mwigulu kuli indizu, Yahova alamwikiza. Yahova amali kovora.”

¹⁷ Yahova yavoola, “Lidivizwa liaza liduuki ku vandu va Edomu na live liukutihiza vuli mundu ulivitira ho alakegose kandi alakatiihizwi.

¹⁸ Kindu kilala chere kilakekoleke ku Edomu kuli chekoleka ku Sodoma na Gomora, lwa ndagadiviza harara namadaala agaali himbi. Mundu kali mulala si namenye mu lidaala yili kandi mba. Inzi, Yahova mali kovora.

¹⁹ Kuli isimba itulaanga mu mulitu munene ahimbi ku mugera gwa Jorodani nukuzia mukivala chuvwayiru vuvisi, nonoho inzi ndaaza nzize nokokola avandu va Edomu kunyagula kuzia ihale kutura mukivala chavo. Maku mwimiliri wa nditovoola alakamiihi ihiiri. Nivwaha unyala kufwananywa na inzi? Nivwaha wakaagelani na inzi? Ni mwami ki wakahing'ani ni inzi?

²⁰ Maku hulira lilohiza lia mali kolomba kigira avandu va Edomu, kandi chang'anagana kokolera avandu vi lidaala lia Temani. Kali avana vaavo navahilwi ihale kandi vuli mundu natiihizwi.

²¹ Ku lihulirika lieliigwa liavo, kivala choosi na kedegere; mwoyo gwi lilira liavo gulakahuliriki ku Inyanza inzakanyu.

²² Musigu na yingiliri avandu va Bozira kuli indizu yika hasi nivavambalizi zimbaha. Ku lidiku yilio avasikari va Edomu navatihizwi kuli mukali oveeye mulilumwa liu mwana.”

Likalaga lia Yahova ku Damasiko

²³ Yaga nigo aga Yahova yavoola kigira Damasiko: “Avandu mu madaala ga Hamazi na Aripadi vaveeye mulihenda mioyo kandi mulinyangizwa kigira vamali kuhulira amakuva madamanu. Vakukuza mioyo nukunyangizwa kuli inyanza itaveeye novosoosi.

²⁴ Avandu va Damasiko vaveeye vadedekere kandi vamali kwiruka mu uvutihizi. Vaveeye muvuzunu kandi mu kivi kuli mukali oveeye mulilumwa liu mwana.

²⁵ Lidaala liamanyikana lialange nuvuyanzi limali kung'anywa ligali.

²⁶ Ku lidiku yilio avayaayi vasoleri valio navitirwi muzinzira zie lidaala, kandi vasikari valio vosi valadivizwa.

²⁷ Ndasamba madigi ga Damasiko kandi ndasambura zinyumba ziuvwami zio mwami Benihadadi. Inzi Yahova Wuvunyali, mali kovora.”

Likalaga ku ihiiri ya Kedari kandi lidaala linene lia Hazori

²⁸ Yaga nigo aga Yahova yavoola kigira ihiiri ya Kedari kandi kivala kisingilirwa na Hazori chiaguutwa nu mwami Nebukadineza wa Babiloni: “Yingilira avandu va Kedari kandi udivizi ihiiri yene yeyo ya avandu vi Ivugwi!

²⁹ Gumira zinyumba ziavo ni viayo viavo, zinguvu ziumuzinyumba nivindu viosi muzinyumba ziavo. Muvuguli zing'amia ziavo kandi muvoolere avandu, ‘Uvutihizi vumukumbilizi!’

³⁰ “Avandu va Hazori, Inzi Yahova mwiganihizaa munyaguli muzie ihale na mwivisi. Mwami Nebukadineza wa Babiloni umali kolohiza zing'anagani muvwivisu ku munyi, na yaga nigo agaavoola,

³¹ ‘Hambi! Kunyi kulingilira avandu vaganagana vaveeye mu mirembe kandi mulikingwa! Lidaala liavo si liveeye ni virivwa anoho makafuri mba, kandi liveeye ligali vugira vulindi.’

³² “Vuguli zing'amia ziavo kandi mitugu jaavo josi! Inzi ndasalanya muzimbega ziosi avandu vavega masu gaavo ku zinduru, kandi ndaleta kuvo kivi kutura muzimbega ziosi.

³³ Lidaala lia Hazori lilakolwa changalangwi mihiga ni mihiga, havundu hi vivwi vimenya vieng'ine. Mundu si alamenyayo kandi mba. Inzi Yahova mali kovora.”

Likalaga lia Yahova ku Elamu

³⁴ Nonoho inyima wa Zedekia yaali niyakava mwami wi Ivuyuda, Yahova Wuvunyali yamoloma ninzi kigira kivala cha Elamu.

³⁵ Yavoola, “Inzi ndiita avasaza vosi vukulasa uvuta avamali kokora Lidaala lia Elamu kuva nizinguru.

³⁶ Ndakora imbuza kuhuuza ku Elamu kutura mu zimbega ziosi, kandi ndasalanyira avandu veve havundu hoosi, kuduuka avahaali vaavo navazie muvivala viosi.

³⁷ Inzi ndalomba avandu va Elamu kutia avasigu vaavo, avenya kuvadiviza. Muvutima vwange vonene ndadiviza avandu va Elamu kandi ndatuma amahi kuvo kuduuka lwa mbadiviza vosi.

³⁸ Ndadiviza avami na aviimiliri vaavo kandi ndasingiliza yo endeve yange yu vwami.

³⁹ Navuzwa ing'inga yiza inzi ndakagasizi avandu va Elamu. Inzi Yahova mali kovora.”