Jeremia 48 - KITABU KITAKATIFU

Lidivizwa lia Moabu

¹ Yaga nigo aga Yahova Wuvunyali, Nyasaye wa Isiraeli yavoola kigira avandu vikivala cha Moabu: “Avandu va Nebo vaveeye mukivi, Lidaala liavo limali kudivizwa! Lidaala lia Kiriazaimu limali kugumirwa, zimbinga zialio zie zinguru zimali kwononywa; kandi avandu valio vamali kuvikwa mu zisoni.

² Lizominywa lia vandu va Moabu si liveeye ho kandi mba. Avasigu vamali kugumira lidaala lia Heshiboni, kandi valohizi mu vwivisu kudiviza ihiiri ya Moabu. Lidaala lia Madimeni lilachiring'anywa; amahi galazia kulilwana ni kivavi.

³ Avandu va Horonaimu valalira nu kuhanzuka, ‘Kilage! Kandi Lidivizwa!’

⁴ “Kivala cha Moabu kimali kudivizwa; hulirizi lilira lia avana vakekeeke.

⁵ Hulirizi mwoyo gwi lisioma liavo kunzira izizaa Luhizi. Hulirizi lilira lie lidivizwa, kunzira izizaa Horonaimu;

⁶ vavoola, ‘Koli vwangu, mwiruki mwehonyie aveene! Munyaguli kuli ibunda yu mu vulimu kandi inyagura mu changalangwi!’

⁷ “Munyi avandu va Moabu, mwasuuvira mu zinguru zienyu kandi mu vutugi vwinyu, navuzwa kalunu kali mulaguutwa; munyasaye winyu Kemoshi alahirwa mu lihaminywa, harara na avanene veve kandi avasaalisi veve.

⁸ Vuli lidaala liradivizwa, si lilavaho kali lilala ilihona mba; livona kandi kereremo viombi vilava amanganye. Inzi Yahova mali kovora.

⁹ Musoole kivala cha Moabu; kigira keveeye ahimbi kudivizwa. Amadara manene gacho galatigala amang'anye, kandi mundu kali mulala si alamenya mucho mba.”

¹⁰ Alaamwe mundu utakola miyinzi ja Yahova nu mwoyo gwigwe gwosi! Kandi alaamwe mundu utiita ni kivavi.

Amadara ga Moabu Gamali Kudivizwa

¹¹ Yahova avoora ndi, “Avandu va Moabu vamenya mu likingwa kazozo, na sivahilwaku mu vuhambe mba. Vaveeye kuli iwaini iviikiywi mu kiju kilala vujira kwituruka kutura mu kiju kilala kuzia mu kiju kindi. Ovonolu vwayo si vwayononywa mba, kandi lizazama liayo liveeye lilahi kazozo.

¹² “Kunangwa kalunu ing'inga yiza lwa nandumi avandu kusuundura avandu va Moabu kuli iwaini. Viju vie iwaini vilava vujira iwaini kandi vilatanywa mu vidonye.

¹³ Maku avandu va Moabu valaviikwa mu zisoni nu munyasaye wavo Kemoshi, kuli avandu va Isiraeli vaviikwa mu zisoni na Bezeli, munyasaye wa vasuuvira muye.

¹⁴ “Munyi avandu va Moabu, kigira ki muganaganaa ndi muveeye avaluviriri, kuli avasikari vi zinguru mu liihi?

¹⁵ Kivala cha Moabu harara na amadara gacho gamali kudivizwa, avasoleri vaavo avalahi vamali kusinzwa. Inzi mbeeye umwami, Yahova Wuvunyali, kandi inzi mali kovora.

¹⁶ Kivi keveeye ahimbi kuduuka ku kivala cha Moabu; kandi lidivizwa liacho lizaa vwangu.

¹⁷ “Musiomere ihiiri ya Moabu, munyi avandu vamenyi ahimbi, kandi munyi vosi avamanyi ulusuma. Muvoore, ‘Liamiiha liezingulu lie ihiiri yiyi limali kutulizwaho; uvukumi vwayo nizinguru ziayo siziveeho kandi mba.’

¹⁸ O, munyi avandu vamenyi mu Diboni, mwiki kutura havundu hu luyali kandi mwikale mu luguchi; kigira avandu vu kudiviza Moabu vamali kuduuka, kandi vamali kwononyia zimbinga zia Moabu.

¹⁹ O, munyi avandu vamenyi Aroeri, musingiri mu zinzira na muhenzerizi; muteeve yavo avirukaa vaduuki hokohona muvateeve, ‘Kindiki kimali kokoleka?’

²⁰ Valativura ndi, ‘Moabu imali kugwa, musiome kigira eveeye mu zisoni. Mulandizi ku mugera gwa Arinoni, ndi Moabu imali kudivizwa!’

²¹ “Likalaga limali kuduuka ku madaala manene givireremo via Holoni, Jahaza, Mefazi,

²² Diboni, Nebo, Bezi Dibilazaimu,

²³ Kiriazaimu, Bezigamuli, Bezimeon,

²⁴ Keriozi na Bozira, harara na amadara goosi ga Moabu agihale na himbi.

²⁵ Zinguru zia Moabu zimali kutulizwaho; zinguru ziavo zimali kudivizwa. Inzi Yahova mali kovora.”

Moabu Ilagehizwa

²⁶ Yahova yavoola, “Munyi avandu va Moabu, mulakolwa kuva kuli avahambiku, kigira mumali kwibaala ku inzi. Mulagalagala mu maluki ginyu aveene, kandi avandu valamusekeriza.

²⁷ Mwizulizaa kuli mwakolera avandu va Isiraeli kehenyahenye? Mwavakolera kuli vaali ni vagumiliywi harara nu muganda gwa aviivi.

²⁸ “Munyi avandu vamenya mukivala cha Moabu, muleke amadara ginyu! Muzie komenya mu zinyanda! Muve kuli likuulu lilombaa inyumba yalio mu zimbega zie live.

²⁹ Munyi muveeye avelori ligali! Inzi mali kuhulira kuli mwelora, kuli mwigingiraa kandi kuli mwekonyaa, kandi kuli mwiganaganira aveene.

³⁰ Inzi Yahova, manyi liegingira lienyu. Liekonya lienyu liveeye liavuzwa, kandi vikolwa vienyu si vilazizagilira mba.

³¹ Kulwayago, ndasioma kigira avandu vosi mukivala cha Moabu kandi avandu va Kiri Heresi.

³² Ndalira kigira avandu va Sibuma, kandi ndalira ligali kigira avandu va Jazeri. Munyi avandu vi lidaala lia Sibuma, muveeye kuli musaala gwu muzabibu gwi zisia ziagwo ziambuka engereka wi Inyanza yijumbi kandi luzia kali kuduuka Jazeri. Navuzwa kalunu amakuyu ginyu kandi makuyu ginyu ging'inga yu muvasu gamali kudivizwa.

³³ Uvuyanzi kandi uvusangari vimali kutulizwaho kutura mukivala kigunamu cha Moabu. Inzi mali kokora iwaini ivuli kwidoroka kutura mu viminilu vie iwaini, mundu si aveeyeho olomba iwaini kandi nukuhanzuka kigira uvusangari mba.

³⁴ “Avandu va Heshiboni na Eleale valira, na lilira liavo lihulirika kali kuduuka Jahazi; linyala kuhulirika ku avandu mu Zoari, kali kuduuka Horonaimu kandi Egilazi Shelishiya. Kali Kisenukiru cha mazi ga Nimurimu kimali kwuma.

³⁵ Ndigalira avandu va Moabu vavuli kuhaana vihaanwa viu kusambwa havundu haavo hu kusigamira vifananyi, kandi ndavigalira vavuli kuhaana visiuviliru ku avanyasaye vaavo. Inzi Yahova mali kovora.

³⁶ “Kunangwa siomaa kigira avandu va Moabu kandi avandu va Kiri Heresi, kuli umundu yimbaa zinyimbu zie likuza mu lilere, kigira vindu viosi viaveeye navio vimali kudiva.

³⁷ Avandu yava vosi vamali kovega amasu gaavo kandi zinderu ziavo mu lisioma. Vosi vamali kusalaga ku makono gaavo, kandi vuli mundu yiviiki inguvu yi ligunia.

³⁸ Ku visegese vie zinyumba ziosi zia Moabu kandi mu viitu viosi siulahulira kindu navuzwa lisioma lieng'ine, kigira mali kwatanyia Moabu kuli ikiju chu mundu atayaanziliraa mba

³⁹ Maobu imali kwononywa! Muliri! Moabu imali kuvikwa mu zisoni. Imali kugwa chokosekeriza kandi litihiza ku zihiiri ziosi iziakumberiza kivala yiki. Inzi Yahova mali kovora.”

Moabu si Ilahononoka mba

⁴⁰ Yahova umali kulaga ndi ihiiri ilabuluka kuli indizu na ilavaambula zimbaha ziayo ku kivala cha Moabu,

⁴¹ amadara kandi zimbinga zilagumilwa. Ku lidiku liene yilio, avasikari va Moabu valatiihizwa kuli umukali oveeye mu lilumwa liumwana.

⁴² Moabu iladivizwa na silava ihiiri kandi mba, kigira avandu vi kivala yiki vamali kwibaala ku Yahova.

⁴³ Litihiza, mitego kandi ovogo viveeye imbiri winyu munyi avandu va Moabu. Yahova umali kovora.

⁴⁴ Mundu woosi ogeriza kutura mu litihiza yili alagwa mu ovogo, kandi oyo ogeriza kunina kutura mu ovogo alagumirwa nimitego, kigira Yahova umali kuviikaho ing'inga yu kudiviza Moabu.

⁴⁵ Avahaali vataveeye novokonyi valageliza kuzia konyoora likingwa mu Heshiboni, lidaala linene liu mwami wa Sihoni yamiha ing'inga yindi, navuzwa lomemo lwu mulilu lwaduuka kulio. Mulilu gumali kudiviza zinzako harara ni zindongozi zie vigulu via vandu va Moabu avayaanzaa iliihi.

⁴⁶ Ikivi keveeye ku munyi avandu va Moabu! Avandu vaasigamira umunyasaye wavo Kemoshi vamali kudivizwa. Avayaayi vaavo na avakaana vaavo vamali kokolwa kuli vahambe.

⁴⁷ Navuzwa mu madiku gaaza Yahova alilanyila Moabu uvutugi kandi. Yaga goosi nigo aga Yahova amali kovora ndi, galakoleka ku kivala cha Moabu.