Jeremia 47 - KITABU KITAKATIFU

Likuva lia Yahova Kigira Avandu va Filisitia

¹ Imbiri wu mwami wa Egebeti yaali nakikiri kwingilira Gaza, Yahova yamoloma ninzi kigira vandu va Filisitia.

² Yavoola: “Henza! Mazi manyingi gaazaa kutura Ivaale kandi galanyagula kuli mugera gwizuuyi. Galakunika lirova niviosi viveeye mu, amadara na avandu vamenyi mugo. Avandu navaaniri ovokonyi; vuli mundu mukivala naaliri vululu.

³ Navahuliri muliviti gwi zibarasi, muliviti gwa magare gu vulwani, kandi lihulirika lia magurudumu. Avababa sinavagirung'ane nukwikivuka kigira avana vaavo mba; makono gaavo nagaleme.

⁴ Ing'inga yimali kuduuka yu kudiviza avandu va Filisitia vosi, kandi kwita vosi avahononoka avaari vanyara kokonya Tiro na Sidoni. Yahova aveeye ahimbi kudiviza vandu va Filisitia, avatigara kutura muvisuru via Kerete.

⁵ Ovovereri vonene vumali kuduuka ku avandu va Gaza, na avandu va Ashikeloni vachiring'ani machiriri. Kuduuka ing'inga ki avandu vandi vosi va Filisitia valasioma? kuduuka ing'inga ki?

⁶ Munyi mwaniri, ‘Kivavi cha Yahova! Mulazizagilira kwiita kuduuka ing'inga ki? Mwirane muchura chiinyu mumenye mu ma musoose!’

⁷ Navuzwa kivavi kinyala ndi kosoosa, lwa inzi mali kukiha miyinzi kokora? Inzi mali kukilaga kwingilira vandu va Ashikeloni kandi avandu vamenyi ku visulu.”