Jeremia 46 - KITABU KITAKATIFU

Egebeti Yaguutwa ha Karikemishi

¹ Yahova yamoloma ninzi kigira zihiiri,

² kutanga ni zihiiri zia Egebeti. Yaga nigo agayavoola kigira iliihi liu mwami Neko uwa Egebeti, uwu mwami Nebukadineza wa Babiloni yaguutira ha Karikemishi himbi kumugera gwa Efurate. Gwaali mu muhiga gwa kane gwa Jehoyakimu yaali mwami wi Ivuyuda:

³ “Avanene va Egebeti muhanzuki, ‘Mutegekizi zinguva zienyu ma muzie mu liihi!

⁴ Mulombe zibarasi zienyu na muzimeederere! Muve muluvaso ma mwiviki zigudwa! Mushagale amatimu ginyu! Mwiviki viuma vienyu!’ ”

⁵ Yahova ateeva, “Navuzwa nikindiki chandolaa? Vagirung'ana nukwirana inyima mu uvutihizi. Avasikari vaavo vakubagwa; vizuyi uvuti, vanyagura vwangu kuli vanyara na sivikivukaa inyima mba.

⁶ Yavo avanyagura vwangu si vanyara kwiruka mba; avasikari vanyara kohononoka mba. Mu kivala chi Ivaale, mu Efurate, vikigatiraa nu vaagwa.

⁷ Uyu nivwaha uwidudaa kuli mugera gwa Naili, ugwizuyi amazi?

⁸ Ni Egebeti yidudaa kuli Naili, kuli mugera gwizuuyi amazi. Avandu va Egebeti vavoola, ‘Kunyi kuliduda nukukunika lirova; kunyi kuladiviza madaala na avandu vamenyi mu.

⁹ Laga zibarasi zizie kandi magare gu vulwani gagomagome! Tuma vasikari ichova: Vasaza kutura Ezopia na Libia ni vagingi zinguva, na vasaza avasiza vuvuta kutura Lidia.’ ”

¹⁰ Yili nilidiku liu Mwami munene Yahova Wuvunyali: kalunu alavaanza kisaalia; kalunu alahaana amageri ku avasigu veve. Kivavi chiche kilavalia kuduuka lwa chizula, kandi kilanwa masahi gaavo kuduuka lwa chiguta. Kalunu Wuvunyali alahaana kisiuviriru mu kivala chi Ivaale ku mugera gwa Efurate.

¹¹ Avandu va Egebeti muzie Gileadi na muhenze zinyasi! Zinyasi zienyu ziosi ziveeye vuzwa; kivulaho kindu kinyala kumuhonyia.

¹² Zihiiri zimali kuhulira zisoni zienyu; vuli umundu umali kuhulira nimulira. Musikari mulala yichigatira ku wundi ma vosi vaagwa.

Liza lia Nebukadineza

¹³ Lwa mwami Nebukadineza wa Babiloni yaza kwingilira avandu va Egebeti, Yahova yamoloma ninze. Yavoola,

¹⁴ “Ulandizi mu madaala ga Egebeti, mu Migidoli, Mefisi na Tahapanesi: ‘Mwetegeke kwikinga munyi aveene; viosi viamuveeye navio viladivizilwa mu liihi!

¹⁵ Kigira ki nyasaye winyu wizingulu Apisi agwiyi? Yahova umali kumutuula!’

¹⁶ Avasikari vinyu vamali kwikigatira ma vagwiyi; vuli mulala avolera wache, ‘Kola vwangu! Leka kuzie yengo ku avandu viitu ma kwiruki kutura mu likuza!’

¹⁷ “Muhaane ku mwami wa Egebeti lieta lihia ‘Liyoga liukwigingira ku uyu uwa vula kutumikira vwiyangu vwivwe vulahi.’

¹⁸ Inzi, Yahova Wuvunyali, mbeeye mwami. Inzi ni Nyasaye oveeye mwoyo. Kuli Kiguru cha Tabori keveeye igulu mu vigulu, kandi kiguru cha Karimeli kisingila igulu ku inyanza, kunangwa zilakave ndio zinguru zia oyo ulikutulira.

¹⁹ Mwetegeke kuva avahambe, munyi avandu va Egebeti! Mefisi lilakolwa changalangwi, amang'anye hu mundu atamenyaa mba.

²⁰ Egebeti eveeye kuli eng'ombe eveeye indahi ligali navuzwa ligugu limali kujingilira kutura Ivaale.

²¹ Kali avasikari vaavo vagulwa vaveeye vuzwa kuli vimoli. Sivali vanyara kusingila nukulwana mba; vosi vagirung'ana ni viruka. Lidiku lie lidivizwa liavo liali niliduuki, ing'inga yaavo yukudivizwa.

²² Avandu va Egebeti viiruka ni vakora liyoga kuli enzoka, lwa liihi liumusigu lie suunda ahimbi. Vingilira Egebeti nizimbazi, kuli avandu vatemera misaala hasi,

²³ kandi naadiviza mulitu munene ligali. Avandu vaavo vaveeye avanyingi ligali va utavalizwa mba; avasikari vaavo vaveeye avanyingi ligali kuvita zisigi.

²⁴ Avandu va Egebeti vaveeye muzisoni; vaguutiywi na avandu kutura Ivaale. Inzi, Yahova mali kovora.”

²⁵ Yahova Wuvunyali, Nyasaye wa avandu va Isiraeli avoora, “Nziza kuhaana amageri ku vandu va Amoni, nyasaye wa Zebesi, harara na avandu va Egebeti na avanyasaye vaavo na avami vaavo. Nziza kuvugura mwami wa Egebeti kandi na vosi avaasuuvira muye,

²⁶ kandi ndavaviika mu zinguru zia yavo avenya kuvita, ku mwami Nebukadineza wa Babiloni ni liihi lilie. Navuzwa lwinyuma avandu navamenye mu Egebeti kandi, kuli vakora mu zing'inga ziavita. Inzi, Yahova mali kovora.”

Yahova Yahonyia Avandu Veve

²⁷ “Avatumikiri vange visukululwi via Yakobo, mutatia mba, avandu va Isiraeli, mutatiihizwa mba. Inzi ndamusoola kutura mukivala chi ihale yicho, kutura mukivala chamuveeyemu avahambe. Munyi na mwirane yengo kandi namumenye mumirembe; munyi na mukingwi, kandi umundu kali mulala sinamutiihizi mba.

²⁸ Inzi nanzizi kumunyi kandi naamuhonyie. Inzi nandivizi zihiiri ziosi uwa inzi mali kumusalanyira, navuzwa sindamudiviza mba. Inzi sindaleka muzie vugira kohevwa amageri mba; navuzwa lwamuha amageri nambe nilikalaga lirungi. Inzi, Yahova mali kovora.”