Jeremia 45 - KITABU KITAKATIFU

Lilagana lia Nyasaye ku Baruki

¹ Mu muhiga gwa kane lwa Jehoyakimu mwana wa Josia yaali mwami wi Ivuyuda, Baruki yang'oda aga inzi ndaali nimuvoleeye. Kunangwa ndaamuvolera

² ndi, Yahova, Nyasaye wa Isiraeli, yaali navooye, “Baruki,

³ ivi ovola, ‘Inzi ndeke! Yahova amali komeeda ovovereri ku uvudinyu vwange. Inzi nduhi kigira likenya, kandi sinyala konyoora ovososi mba!’

⁴ “Navuzwa inzi, Yahova, ndasambura ichamali kwumbaka kandi ndiha chamali kutaga. Inzi ndakora yaga ku kivala choosi.

⁵ Weyenyela likolerwa vulahi ivi mwene? Utakola ndio mba. Inzi ndeta kivi ku avandu vosi, navuzwa ndakohonyia vuli havundu hoosi ha uzia. Inzi, Yahova mali kovora.”