Jeremia 44 - KITABU KITAKATIFU

Likuva lia Yahova na avandu va Isiraeli mukivala cha Egebeti

¹ Yahova yamoloma ku inze kigira avandu vosi va Isiraeli avamenyaa mukivala cha Egebeti, mu madaala manene ga Migidoli, Tahapanesi, Mefisi kandi mukivala cha Pazirosi.

² Yahova Wuvunyali, Nyasaye wa avandu va Isiraeli avoora, “Munyi aveene mumali kolola lidiviza liandaaleeta ku Jerusalemi kandi madaala gandi goosi gi Ivuyuda. Kali kuduuka kalunu ndi gaveeye vuzwa amang'anye, kandi sihaveeyeho nu mundu omenyi mugo mba,

³ kigira avandu va madaala yaga vaakora uvudamanu kandi vaangora kuva nu vutima. Vahaana visiuviliru ku avanyasaye vandi kandi nivatumikira avanyasaye vavavula kumanya anoho avavaguuga vaavo vavura kusigamira.

⁴ Ndaazizagilira kutuma ku munyi avatumikiri vange avaporofeti, avamuvoleraa muvuli kokora vindu vidamanu yivi iviandunyiraa.

⁵ Navuzwa munyi si mwahulira mba. Si mwenya koleka vikolwa vienyu vidamanu viukuhaana visiuviliru ku avanyasaye vandi mba.

⁶ Kulwayago ndaviika uvutima vwange uvululu ku madaala goosi gi Ivuyuda kandi kuzinzira ziosi zia Jerusalemi, kandi nimbambiza muliru kugo. Amadara yaga gaatigala hazwa vugira mundu komenya mugo, kuduuka na Kalunu.

⁷ “Kunangwa, Inzi Yahova Wuvunyali, Nyasaye wa avandu va Isiraeli, kalunu muteeva ndi, kigira ki mwekolelaa munyi aveene vindu vidamanu kuli yivi? Mwenya koleta lidiviza ku avasaza na avakali, avana vasoleri kandi avana avadoto, kunangwa mundu ku avandu vinyu avuli kutigala?

⁸ Kigira ki mungolaa nimba nu vutima ku Lisigamira vifananyi kandi ku lihaana visiuviliru ku avanyasaye vandi mukivala cha Egebeti, havundu ha muuzi komenya? Mukoraa yaga kunangwa muduuki kwidiviza munyi aveene, kandi vuli ihiiri ku lirova iduuki kumukolera kehenyahenye kandi kutumikira lieta lienyu kuli kilaamo?

⁹ Munyi mumali kwivilira uvudamanu vwosi vwa mwakora harara na avakali vinyu, kandi na avami vi Ivuyuda harara na avakali vaavo mu madaala gi Ivuyuda kandi mu zinzira zia Jerusalemi?

¹⁰ Navuzwa kuduuka kalunu, ndi, mukikiri kwegehiza aveene mba. Mukikiri kuhaana luyali ku inzi, kandi mukikiri komenya kolondekana na malago goosi ga ndaamuha kandi ga ndahaana ku avaguuga vinyu mba.

¹¹ “Kunangwa Inzi, Yahova Wuvunyali, Nyasaye wa avandu va Isiraeli, ndamukolera uvudamanu kandi ndadiviza amadara goosi gi Ivuyuda.

¹² Avandu vosi avatigara Ivuyuda kandi avamali kotovola kuzia komenya mu kivala cha Egebeti, vosi valadivizwa. Vosi avanene ku avakeekeke valitirwa mukivala cha Egebeti mu liihi anoho ninzara. Valava litihiza, kandi avandu valavakolera kehenyahenye kandi valatumikira amita gaavo kuli kilaamo.

¹³ Ndahaana amageri ku vandu avamenyi mukivala cha Egebeti, kuli ndahaana amageri ku avandu va Jerusalemi ni liihi, inzara kandi uvulwaye.

¹⁴ Sialakaveho nu mundu kali nulala ku avandu vaatigara Ivuyuda kandi avaazia komenya Egebeti ulihononoka anoho ulihona mba. Sialakaveho nu mundu kali mulala kuvo ulirana nitali vataveeye vakekeeke ku avahaalirayo.”

¹⁵ Maku avasaza vosi ava vakali vaavo vaahana visiuviliru ku avanyasaye vandi, kandi avakali vosi avaari nivasingiyi ahimbi, harara na avandu va Isiraeli avaamenyaa ha Pasirosi mukivala cha Egebeti, vosi kiduma kenene ligali vambolera,

¹⁶ “Kunyi kusuuyi kuhulira amakuva ga umali kokovoolera mu lieta lia Yahova.

¹⁷ Navuzwa kulakola vindu viosi via kwavoola kulakola. Kulahaana visiuviliru ku nyasaye wiitu wi kikali, mwami wikikali wu mwigulu, kandi kulahaana vihaanwa vie Iwaini kuye, kuli kwakora na avaguuga viitu, avami na aviimiliri viitu kuli vakoola mu madaala gi Ivuyuda kandi mu zinzira zia Jerusalemi. Mulikola ndio, kwalange ni viukulia vinyingi; kwagasizwa kandi si kwali nu vudinyu mba.

¹⁸ Navuzwa kutura ing'inga ya kwalekera kuhaana visiuviliru ku nyasaye wikikali wu mwigulu, kandi lwa kwalekera kuhaana vihaanwa vie Iwaini kuye, sikwanyoola kindu kali hakuzu mba, kandi avandu viitu vakuzira mu liihi kandi mu inzara.”

¹⁹ Avakali vavoola, “Lwa kwalomba migadi mu lifana liu mwami wi kikali wu mwigulu, mikuhaana visiuviliru kuye, kandi nikuhaana vihaanwa vie iwaini kuye, avasaza viitu vamanya aga kwakora.”

²⁰ Maku ndaavoorela avandu vosi avasaza na avakali avaari nivahaani amativuli gaavo ku inzi kuli ndi,

²¹ “Visiuviliru via mwahaana harara na avaguuga vinyu, avami kandi aviimiliri vinyu, kandi na avandu vi kivala mu madaala gi Ivuyuda kandi nu muzinzira zia Jerusalemi, muganaganaa Yahova si yavula kuvimanya anoho yaavivilira?

²² Kuduuka kalunu ndi, kivala chiinyu keveeye amang'anye kandi mundu siamenyi mucho mba. Kimali kugwa havundu hu kutihiza, kandi avandu vaatumikira lieta liacho kuli kilaamo, kigira Yahova si yaali anyala kwikuzira uvuchamu vwinyu kandi vikolwa vienyu vidamanu mba.

²³ Ing'inga yiyi ikivi kimali kuduuka ku munyi kigira mwahaana visiuviliru ku avanyasaye vandi kandi mwakora uvwoni imbiri wa Yahova kulivula kutia amalago geege goosi.”

²⁴ Ndaavoolera avandu vosi harara na avakali vosi vi Ivuyuda avaveeye mukivala cha Egebeti ndi,

²⁵ Yahova Wuvunyali, Nyasaye wa avandu va Isiraeli avoora, “Munyi harara na avakali vinyu mumali kwisuha ku mwami wi kikali wu mwigulu. Mwalaga ndi mulahaana visiuviliru kuye kandi mulahaana vihaanwa vie iwaini kuye. Maku mudinyerize kandi muduukizi lilagana lienyu.

²⁶ Navuzwa kalunu muhulirize ku liesuha lia Inzi Yahova mali kolomba mu vunyali vwi lieta liange ku munyi avandu va Isiraeli vosi avamenyi mukivala cha Egebeti: Si ndaleka kandi mulala ku munyi atumikiri lieta liange kolomba iliesuuha nokovoora, ‘Inzi nzisuha ku lieta lia Yahova, Nyasaye, oveeye mwoyo!’

²⁷ Inzi ndalora ndi munyi si mulagasizwa mba, navuzwa muladivizwa. Munyi vosi avamenyi mukivala cha Egebeti mulakuzira mu liihi anoho mulakuza kigira inzara, kuduuka mwosi muhere.

²⁸ Navuzwa vakekeeke ku munyi avalihononoka kutura mu likuza kandi valirana kutura Egebeti kuzia Ivuyuda. Maku yavo avatigara vosi vaza komenya Ivuyuda avalihona valamanya ndi na makuva gange agaveeye giligali anoho na makuva gaavo.

²⁹ Inzi Yahova, ndamanyia kelolekizu ku munyi ndi ndahaana amageri ku munyi havundu hano, kandi lilagana liange liokoleta lidiviza ku munyi lilava lia agiligali.

³⁰ Ndahaana Hofira mwami wa Egebeti ku avasigu veve avenya kumwita, kuli ndahaana Zedekia mwami wi Ivuyuda ku Nebukadineza mwami wa Babiloni, uwaali umusigu weve kandi yenya kumwita.”