Jeremia 43 - KITABU KITAKATIFU

Jeremia Yahilwa Egebeti

¹ Ndaamaliriza kovoolera avandu vindu viosi via Yahova Nyasaye wavo yaali nandumi mbavoolere,

² maku Azaria mwana wa Hoshaya na Johanani mwana wa Karea na avandu vandi vosi vikirage vambolera, “Ivi ovoraa vovehi. Yahova Nyasaye wiitu siatumi ivi okovolere kuvuli kuzia komenya mu Egebeti mba.

³ Baruki mwana wa Neria yakosona ivi ku kunyi, kunangwa avandu va Babiloni vanyoore zinguru ku kunyi ma vanyara kali ku kwita anoho kukuhira ihale mu Babiloni.”

⁴ Kunangwa Johanani anoho mulala ku avanene vi liihi anoho mulala ku avandu sivalatia malago ga Yahova kutigala mu kivala chi Ivuyuda mba.

⁵ Maku Johanani na aviimiliri vi liihi vosi vaavugura avandu vosi vaatigara mu Ivuyuda kuzia Egebeti, harara na avandu vosi avaari nivirani kutura muvivala viavaali nivamali kusalanyirwa mu:

⁶ avasaza, avakali, avana, kandi na vakana vavami. Vaavugura vuli umundu woosi uwa Nebuzaradani munene wi liihi yaali namali koleka mu vulindi vwa Gedalia, kali Baruki ninzi.

⁷ Vavura kutia lilago lia Yahova ma ni vazia mu Egebeti kali kuduuka mu lidaala lia Tahapanesi.

⁸ Hene yaho Yahova yambolera,

⁹ “Vugula magina malala manene na ugayaviri munzira yamatafali imbiri wuvwingiliru munyumba yu vwami hano mu lidaala. Oleke avandu va Isiraeli valala valore nokora yaga.

¹⁰ Maku uvavoolere ndi inzi, Yahova Wuvunyali, Nyasaye wa Isiraeli, nziza koleta mutumikiri wange mwami Nebukadineza wa Babiloni havundu yaaha. Alaviika uvwami vwivwe kumagina yaga agumali kuyavira, kandi alakunika lihema liu vwami kugo.

¹¹ Nebukadineza alaza na alaguuta Egebeti. Avandu valagirwa likuza liuvulwaye vaza vakuzi kigira uvulwaye, yava avalagirwa kuzia ihale kuli avahambe navahirwi ihale kuli avahambe, yavo avalagirwa likuza mu vulwani navitirwi muvulwani.

¹² Inzi nasambe matemberi gavanyasaye va Egebeti, kandi mwami wa Babiloni nasambe avanyasaye vaavo anoho navatuliziho. Kuli umwayi avugulaa zinguvu zizie nukuzinihiza kutura ku iziinda, kunangwa mwami wa Babiloni alavugula kivala cha Egebeti nukukinihiza, maku atuli nukuzia naveeye muguuti.

¹³ Aladiviza minaara mitakatifu jiveeye ha Heliopolisi mu Egebeti kandi alasamba matemberi agavanyasaye va Egebeti.”