Jeremia 42 - KITABU KITAKATIFU

Avandu vateva Jeremia Kuvasaalira

¹ Maku aviimiliri vosi vi liihi, harara na Johanani mwana wa Karea na Azaria mwana wa Heshaya, na avandu vosi kutura ku mukekeeke kuduuka ku munene vaza ku inzi

² ni vavoola, “Mwaza yaanza okole agakokoteeva! Ukusaviri ku Yahova Nyasaye wiitu. Ukusaaliri kunyi vosi avamali kutigala. Mulitanga kwaali avanyingi, navuzwa kalunu koveeye vuzwa avakeekeke avatigara kutura mu avanyingi, kuli ivi mwene ololaa.

³ Ukusaaliri ku Yahova Nyasaye wiitu akumanyie zinzira ziduukanaa kolonde ku kandi vindu viduukana kokole.”

⁴ Maku ndaativura, “Inzi mali kumuhulira, ndasaara ku Yahova Nyasaye wiitu kolondekana ni ligoonya lienyu, na goosi agaativula ku munyi, ndamuvolera. Sindamuvisa kindu kali kilala mba.”

⁵ Maku avandu vosi vambolera, “Yahova ave muloli wa agiligali kandi musuuvirifu ku kunyi niiva sikulatia amalago goosi aga Yahova Nyasaye wiitu ahaanaa ku ivi kigira kunyi.

⁶ Kali gave amalahi ku kunyi anoho amadamanu, kulatia Yahova Nyasaye wiitu, uwa kunyi kokoteeva ukusaaliri kuye. Goosi galava malahi niiva kulatia Yahova.”

Amativuli ga Yahova ku Lisaala lia Jeremia

⁷ Madiku likomi lwa gaafwa, Yahova yamoloma ninzi;

⁸ kunangwa ndaalanga Johanani mwana wa Karea harara na aviimiliri vi Liihi vosi avaari naye, harara na avandu vosi kutura kumukekeeke kuduuka ku munene.

⁹ Ndaavavoolera, “Yahova, Nyasaye wa avandu va Isiraeli, wa mwatuma inzi kuzia kumusaalira kuye avoora,

¹⁰ ‘Niiva mulazizagilira komenya mukivala yiki, hene yaho, ndamunenehiza kandi si ndamugehiza mba; ndamuhonyia kandi si ndamudiviza mba. Lidiviza lia ndaaleeta kumunyi limali kongola kuva novovereri vonene ligali.

¹¹ Mutava nuvuti kigira mwami wa Babiloni mba. Inzi mbeeye harara na nimunyi, ndamusoola kandi ndamuhonyia kutura kuzinguru zizie.

¹² Kigira inzi nu wi zimbavasi, ndakora mwami wa Babiloni kuva ni zimbavasi ku munyi kandi aleke mwilane mukivala chiinyu. Inzi Yahova mali kovora.’

¹³ “Navuzwa, niiva mulavoola, ‘Kunyi sikulamenya mukivala yiki nimuvula kutia Yahova Nyasaye winyu,

¹⁴ kandi muvooraa, kunyi kulazia komenya mukivala cha Egebeti, wanakuvuli kolola iliihi, anoho wanakuvuli kuhulira mwoyo gwi kisiriva anoho wanakuvuli kuva ninzara yi chukulia mba.’

¹⁵ O, munyi avandu vaatigara Ivuyuda, Yahova Wuvunyali, Nyasaye wa avandu va Isiraeli avoora, ‘Niiva Mumali kotovola kuzia komenya mukivala cha Egebeti,

¹⁶ maku iliihi lia mutiizaa yili lilamulondayo, kandi inzara yamutizaa, ilamulondelera yo, kandi mulakuzira mu kivala cha Egebeti.

¹⁷ Avandu vosi avamali kotovola kuzia komenya mukivala cha Egebeti, valakuzira mu liihi anoho valakuza kigira inzara anoho uvulwaye. Sialakaveho nu mundu kali mulala kuvo ulitigala anoho ulihona kutura mu kivi cha nandete kuvo mba.’

¹⁸ “Yahova, Nyasaye wa avandu va Isiraeli avoora, ‘Kuli uvutima vwange uvululu vwali ku avandu va Jerusalemi, nindio uvutima vwange uvululu vulakave ku munyi niiva mulazia komenya mukivala cha Egebeti. Mulava avandu vu kutihizwa, vokonyegwa kandi vikilaamo. Simulakalole kivala yiki kandi mba.’ ”

¹⁹ Maku ndaazizagilira kovora, “Munyi avandu vaatigara Ivuyuda, Yahova umali kovora muvuli kuzia mukivala cha Egebeti. Kunangwa mwiganihizaa kalunu

²⁰ ndi, munyi mumali kweletera uvudinyu Mwandeva musaliri ku Yahova Nyasaye wiitu kandi mwalaga ndi mulakola goosi agamulaga.

²¹ Na kalunu mali kovoolera munyi, navuzwa si muhulira amakuva goosi aga Yahova Nyasaye wiitu yaandumi kumuvolera mba.

²² Kunangwa kalunu, mwizurizi yaga: Mulakuzira mu liihi anoho mulakuza kigira inzara anoho uvulwaye mukivala cha Egebeti uwamutovoye kuzia komenya.”