Jeremia 41 - KITABU KITAKATIFU

¹ Mu mweli gwa saba mu muhiga yigwo, Ishimaeli mwana wa Nezania mwisukulu wa Elishama, mulala ku avinyumba yu vwami kandi mulala ku vatumikiri avanene vu mwami vazia Mizipa harara numuganda gwa avandu likomi kolola Gedalia. Ing'inga lwa vaali nivaliiza chukulia harara,

² Ishimaeli harara navandu likomi, vaavugura vivavi niviita Gedalia.

³ Ishimaeli kandi yita vandu va Isiraeli vosi avaari na Gedalia ha Mizipa na avasikari va Babiloni avaari nivaveeye hene yaho.

⁴ Lidiku lialondaku, umundu kali mulala nakikiri kumanya liitwa lia Gedalia,

⁵ avandu samanini vaduuka kutura Shekemu, Shilo, na Samaria. Vaali nivavegi zinderu ziavo, nivatanduyi zinguvu ziavo kandi nivikali kali aveene. Vavugura uvuswage nivihanwa vie vimuli kuhaana mu Litembeli.

⁶ Kunangwa Ishimaeli yatura Mizipa nazia kuvaaganira nasiomaa. Lwa yaduuka kuvo yavoola, “Mwaza hambi mwingiri mulole Gedalia.”

⁷ Nonoho lwa vaali nivakaduuka hagati hi lidaala, Ishimaeli harara na avandu veve vavita ma nivasiuva miviri jaavo mu vogo.

⁸ Navuzwa avandu likomi mu muganda yigio vavoolera Ishimaeli, “Mwaza utakwita mba! Koveeye ningano, shairi, maguta ga muzeituni nu uvwuki kuvisi mumilimi.” Kunangwa si yaviita mba.

⁹ Ovogo vwa Ishimaeli yasiuva mu miviri ja avandu vayaali niyiiti vwali vuvambalaru uvwu mwami Asa yaali nayavi lwu mwami Baasha wa Isiraeli yaali namwingiliyi. Ishimaeli yizuliza vogo ni miviri.

¹⁰ Maku Ishimaeli yamanya nagumira avakaana vu mwami harara na avandu vandi vosi mu Mizipa, ava Nebuzaradani munene wi liihi yaali naviiki mu vulindi vwa Gedalia. Ishimaeli yavavugula naavakola kuva avahambe, kandi yatura nazia mu kivala cha Amoni.

¹¹ Johanani na aviimiliri vosi vi liihi vahulira zimbi zia Ishimaeli yaali naakori.

¹² Kunangwa vamulondelera inyima na avandu vaavo kuzia kulwana naye. Vamunyoola mu Gibeoni ahimbi ni lidavalia kenene linene lya amazi.

¹³ Lwa avahambe va Ishimaeli valora Johanani na aviimiliri vi liihi vaveeye naye, vaali nuvusangali,

¹⁴ kandi vaagirung'ana nivanyagura kuzia kuvo.

¹⁵ Navuzwa Ishimaeli na avandu veve munane vatura ku Johanani niviruka kuzia mukivala cha Amoni.

¹⁶ Maku Johanani harara na aviimiliri vi liihi, valinda avandu va Ishimaeli yaali navuguyi kuli avahambe kutura Mizipa lwa yaali niyakita Gedalia, avasikari, avakali, avana kandi avatumiki.

¹⁷ Vazizagilira nologendo, ma nivaduuka ha Geruzi Kimuhamu ahimbi Bezelehemu, vazizagilira kuzia Egebeti

¹⁸ ukwesola kutura ku vandu va Babiloni. Vaali nuvuti kigira Ishimaeli mwana wa Nezania, yaali niyiiti Gedalia mwana wa Ahikamu, uwu mwami wa Babiloni yaali natovoye kuva mwamihi wikivala.