Jeremia 40 - KITABU KITAKATIFU

Jeremia Yaavoholorwa Kuzia Komenya na Gedalia

¹ Yahova yamoloma na inzi inyima wa Nebuzaradani, munene wi liihi yaali niyakamboholora ha Rama. Inzi ndaali nimbiriywi yo nivambohi ni minyororo, harara navandu vandi vosi kutura Jerusalemi ni Ivuyuda avahirwa ihale kuli avahambe mu Babiloni.

² Munene wi liihi yambika halovega nambolera, “Yahova Nyasaye woovo yavoola alaleeta uvuti vwi lidiviza,

³ kunangwa kalunu umali kokora agayavoola naakole. Yaga goosi gaakolwa kigira avandu vovo vakora uvwoni ku Yahova kandi nivavula kumutia.

⁴ Kalunu, Inzi ngovoholoraa lidiku lia kalunu kutura ku minyororo jiveeye ku amakono googo. Niiva gaveeye amalahi ivi uzie ninzi Babiloni, hamba, kandi ndakulinda vulahi; navuzwa niiva sivoveeye vulahi ivi kuzia ninzi Babiloni, utaaza mba. Kivala yiki choosi keveeye chicho unyala kuzia wa uganaganaa haveeye halahi kandi halungi ku ivi.”

⁵ Lwa ndaavura kuhaana mativuli, Nebuzaradani yavoola, “Wilana ku Gedalia, mwana wa Ahikamu kandi mwisukulu wa Shafani, uwu mwami Babiloni amali kokora umwamihi ku madaala gi Ivuyuda. Nuwenyi unyala komenya naye kandi omenye na avandu vovo, anoho unyala kuzia hoosi ha uganagana.” Kunangwa yamanya niyamba kihanwa niviukulia vilala ng'ingi, ma naleka ninzia.

⁶ Ndaazia komenya na Gedalia mu Mizipa harara na avandu vaatigara mukivala.

Gedalia, Umwamihi wi Ivuyuda

⁷ Aviimiliri valala vi Ivuyuda na avasikari vaali nivakikiri kwihana ku vandu va Babiloni. Kunangwa vahulira ndi mwami wa Babiloni amali kokora Gedalia umwamihi wi kivala kandi amukoli kuva mwamihi wa yavo vosi avavura kuhilwa Babiloni, avandu vaali avadaka ligali vi kivala yicho.

⁸ Kunangwa Ishimaeli mwana wa Nezania, Johanani mwana wa Karea, Seraya mwana wa Tanihumezi, avana va Efai kutura Netofa na Jezania kutura Maaka vazia na avandu vaavo ku Gedalia ha Mizipa.

⁹ Gedalia yavavolera, “Inzi muvooleraa ndi, ikivuni kivulaho kigira mutie kwihana ku avandu va Babiloni mba. Mumenye mukivala yiki, mutumikiri mwami wa Babiloni na goosi galava malahi ku munyi.

¹⁰ Inzi mwene ndamenya ha Mizipa na ndasingira mu vogono vwinyu lwa vandu va Babiloni vaza hano. Navuzwa munyala kuvungiza nukuviika iwaini, amakuyu namaguta ga muzeituni na mumenye mu madaala gamwavugula.”

¹¹ Lwa Avayuda vosi mu Moabu, Amoni, Edomu nivivala vindi viosi viahulira ndi mwami wa Babiloni yaleka vandu va Isiraeli valala kutigala mu Ivuyuda kandi vamali kotovola Gedalia mwana wa Ahikamu, mwana wa Shafani kuva umwimiliri wavo,

¹² vosi viirana mukivala chi Ivuyuda, ku Gedalia ha Mizipa kutura muvivala viosi viavaali nivasalanyirwamu kandi nivirana Ivuyuda. Vaza ku Gedalia ha Mizipa, kandi vaali ni ligesa linyingi lie iwaini na makuyu.

Gedalia Umali Kwitwa

¹³ Inyima wa yaga, Johanani na aviimiliri vavasikali avaari nivakikiri kwihana ku vandu va Babiloni vaza ku Gedalia ha Mizipa

¹⁴ nivamuvoolera, “Si umanyi ndi mwami Baalisi wa Amoni amali kutuma Ishimaeli yaaze kukwita?” Navuzwa Gedalia siyaasuuvira mba.

¹⁵ Kunangwa Johanani yamoloma kuye mu vwivisu, “Leka nzie kwita Ishimaeli, na mundu kali mulala si alamanya uwakola gene yago mba. Kigira ki avugilirwi kukwita? Yaga galakola Avayuda vosi havamali kwivungikiza nukukukumbiliza vasalane, kandi galaleta kivi ku avandu vosi vatigara mu Ivuyuda.”

¹⁶ Navuzwa Gedalia yativura, “Utakola ndio mba! Aga ovola kigira Ishimaeli sigaveeye giligali mba!”