Jeremia 4 - KITABU KITAKATIFU

Lilangwa kuza Kwiganira

¹ Yahova avoora, “Avandu va Isiraeli, niiva mwenya kugirung'ana mugirung'ane muuzi ku inzi. Niiva muveeye avasuuvirifu ku inzi, kandi nimutulizaho ivifananyi viandunyira,

² gakaveeye amalungi munyi kwisuha, kulieta liange. Maku izihiiri ziosi zilandeva kuzigasiza, nazilanzizominya.”

³ Yahova avooreraa avandu vi Ivuyuda na Jerusalemi, “Mulimi imirimi jinyu ijikikiri kulimwa; mutamiiza uvuguza vwinyu mumafa mba.

⁴ Avandu vi Ivuyuda na Isiraeli mulindi lilagana lienyu ninzi Yahova winyu, kandi mwihaane munyi aveene ku inzi. Niiva simulakolandio mba, vutima vwange vulaaka kuli muliru kigira ivindu vidamanu viamumali kokora. Vulaaka na siaveeyeho na mulala ulisiminya mba.”

Ivuyuda itihizwa nilingilirwa

⁵ Mukubi kisiriva mukivala choosi chi Ivuyuda! Muhanzuki vudinyu kandi vulahi! Muvoolere avandu vi Ivuyuda na Jerusalemi vanyaguri kuduuka mu madaala gizimbinga.

⁶ Muvuki muzie Ziyoni! Mwiruki muhonywe! Mutalindagira mba! Yahova aletaa kivi kandi ilidivizwa linene kutura Ivaale.

⁷ Kuli isimba itulaa havundu hukwivisa hayo, umudivizi wizihiiri umali kutura ichova. Yaazaa kudiviza avandu vi Ivuyuda. Amadara gi Ivuyuda galatigala amang'anye, kandi siaveeyeho kali mulala ulimenya mu mba.

⁸ Kunangwa mwiviki zinguvu ziamagunia, muliri kandi musiome; kigira vutima vululu vwa Yahova vukikiri kugirung'ana kutura ku avandu vi Ivuyuda.

⁹ Yahova yavoola, “Kulidiku yilio avami kandi avanene sivalava nuvuluviliri mba; avasaalisi valegosa navaporofeti valagenya.”

¹⁰ Maku ndavoora, “Yahova Wuvunyali, ivi umali ligali kovehera avandu va Jerusalemi! Umali kovora mirembe jilavaho, navuzwa kivavi kilaviita.”

¹¹ Ing'inga yiza lwa avandu va Jerusalemi navavolerwe ndi imbuza yumuliru ihuuzaa kutura muchangalangwe kuzia kolovega lwavo. Siilakave imbuza yagalaha ihuuzaa vuzwa umukuzi mba.

¹² Imbuza yiza kulilaga lia Yahova ilakave iyinduuta kuvita yene yira! Ni Yahova mwene ulandizaa likalaga ku avandu veve.

Ivuyuda Ikumbiriziywi navasigu

¹³ Henza, musigu yaza kuli amalesi. Amagare geege gu vulwani gaveeye kuli imbuza yi kiihi, kandi zibarasi zizie zinyagura vwangu ukuvita izindizu. Kwagota! Kandi kwadiva!

¹⁴ Avandu va Jerusalemi, mutulizi uvudamanu mumioyo jinyu, kunangwa muduuki kohonywa. Mulazizagilira kuva niziganagani ziuvwoni kuduuka ing'inga ki?

¹⁵ Avatumwa kutura mu lidaala lia Dani yumbaka kandi kutura muvigulu via Efuraimu mulandizi amakuva madamanu.

¹⁶ Vamali kuuza kwiganihiza izihiiri kandi kovoolera avandu va Jerusalemi ndi avasigu vazaa kutura mukivala chi ihale. Avasigu yava valahanzuka nu mwoyo mululu ku madaala gi Ivuyuda

¹⁷ navalakumbiriza Jerusalemi kuli avasaza valindanga umulimi kigira avandu vaavo vamali kwibaala ku Yahova. Yahova umali kovora.

¹⁸ Vayuda munyi mumali kweletera yaga kolondekana nilimenya liamumali komenya kandi nivindu viamumali kokora. Uvwoni vwinyu vumali kumuletera uvusaaliri yivu; Gamali kusaliliza mioyo jinyu ligali.

Ovovereri vwa Jeremia ku avandu veve

¹⁹ Uvuzunu! Sinyala kwikuzira kuvuzunu mba! Mwoyo gwange! Mwoyo gwange gukubaganaa vudinyu ligali! Sinyala kuchiring'ana mba; mbulira visiliva kandi liyoga lie liihi.

²⁰ Ikivi kilala kelondekana nikindi; kivala choosi kimali kugwa mang'anye. Nonoho amahema giitu gononyiywi; zisuka ziago zitanduranyiywi muvidonye.

²¹ Ndaalora iliihi kandi kuhulira mwoyo gwi visiliva kuduuka ng'inga ki?

²² Yahova avoora, “Avandu vange vaveeye avasiru; sivamanyi mba. Vaveeye kuli avana vayingu; sivaveeye nilimanyiriza mba. Vaveeye avasiza mulikola uvudamanu, navuzwa sivamanyiriza kokora uvulahi mba.”

Malola ga Jeremia Kigira Lidiviza lizaa

²³ Ndahenza ku lirova naliali mang'anye kandi ndahenza muligulu na vulavu sivwalimu mba.

²⁴ Ndahenza ku vigulu naviadegeraa, kandi vigulu viosi viazizaa imbiri ni inyima.

²⁵ Ndahenza na sindalola mu avandu mba kandi amanyonyi goosi gu mwigulu gaali nigaburuki.

²⁶ Kivala kigunamu chamala kugwa changalangwe madaala gacho goosi gaveeye amang'anye kigira vutima vwa Yahova vululu.

²⁷ Yahova umali kovora ndi, lirova liosi lilava ligendanyama, navuzwa sialalidiviza ligali mba.

²⁸ Avandu valasioma; ligulu lilava kisundi. Yahova umali kovora kandi sialagirung'anyia zing'anagani zizie mba. Umali kolomba likalaga lilie kandi sialagirung'ana mba.

²⁹ Vuli mundu aliruka nukuzia ihale lwa ahulira liyoga lia avandu, vizibarasi na avuvuta avalala valirukira mumulitu, avandi valanina kuzinyanda vuli lidaala lilatigala iliere, nasiaveeyeho nu mundu ulimenyamu kandi mba.

³⁰ Avandu va Jerusalemi, mwadiva! Kigira ki mwivika zinguvu zinzakanyu? Kigira ki mwisiaha viukwisiaha viizahabu nukuvaka mu zimoni zienyu? Mwekora munyi aveene kuva avalahi vugira kindu! Avanyasaye vinyu vamusuuri kandi venya kumwita.

³¹ Ndaahulira ililira kuli liu mukali oveeye mulilumwa liu mwana, ndaahulira iliayura kuli mukali wivuraa mwana weve wukutanga. Liali lilira lia avandu va Jerusalemi vaagamuraa imvika, nivanyiraa imikono jiavo nivavoora, “Kumali kudiva! Vazaa kunzita!”