Jeremia 39 - KITABU KITAKATIFU

Liigwa lia Jerusalemi

¹ Mu mweli gwi likomi ku muhiga gwa tisa lwa Zedekia yaali mwami wi Ivuyuda, Nebukadineza mwami wa Babiloni yaza harara ni liihi lilie liosi kandi vingilira Jerusalemi.

² Ku lidiku lia tisa mu mweli gwa kane, ku muhiga gwa kumi na moja lwa Zedekia yaali mwami, amadigi gi lidaala linene lia Jerusalemi gaaduyagwa nigavunguluka.

³ Lwa lidaala linene lia Jerusalemi liagumirwa, vatumikiri vosi vu mwami wa Babiloni, harara na Nerigali Sharezeri, Samigari Nebo, Sarisekimu umurabisarisi na Nerigali Sharezeri umurabimagi vaza nivikara ha Kirivwa cha Hagati.

⁴ Lwa mwami Zedekia harara na avasikari veve valora iliihi lia avandu va Babiloni ni vazaa, vaageriza kwiruka kutura mu lidaala linene mu vudiku. Virukira kunzira yu mulimi gwu mwami, nivavitira mu kirivwa cha hagati cha madigi gaviri, ni vazia kuduuka mu livona lia Jorodani.

⁵ Navuzwa Liihi lia Babiloni liavalondelera ma nivagumira Zedekia mu vireremo via Jeriko. Maku vaamuvugura nivamuhila ku mwami Nebukadineza, uwaali mu lidaala linene lia Ribula mu kivala cha Hamazi. Mwami Nebukadineza yaamukalagira.

⁶ Mwami Nebukadineza wa Babiloni yita avana va Zedekia ha Ribula imbiri weve, kandi yita vatumikiri vosi vi Ivuyuda.

⁷ Hene yaho, yaafwudula zimoni zia Zedekia, ma naamuvoha ni minyororo aduuki kumuhila Babiloni.

⁸ Inyima wa yaga, avandu va Babiloni vasamba inyumba yu vwami kandi zinyumba zia avandu ma nivaasambula amadigi gi lidaala linene lia Jerusalemi.

⁹ Mu limaliriza, Nebuzaradani munyabara wa avalindi yavugula avandu vaali nivatigaye mu lidaala, harara na avandu vaali nivamwiruki naavahira mu lihaminywa mukivala cha Babiloni.

¹⁰ Yaleka avandu vaali avadaka mukivala chi Ivuyuda, avataali ni kindu kali kilala; kandi yavaha milimi ji mizabibu kandi milimi.

Livoholorwa lia Jeremia

¹¹ Mwami Nebukadineza yalaga Nebuzaradani munyabara wa avalindi kuhaana lilaga yili:

¹² “Zia wenye Jeremia, umbuguli ma umulindi vulahi ligali. Utamusaliriza mba, navuzwa umukolere kolondekana ni lienya lilie.”

¹³ Kunangwa, Nebuzaradani, mwimiliri wa avalindi, harara na Nebushazibani, Muravisarisi Nerigali Sarezeri murabimagi, kandi na vatumikiri vosi vu mwami wa Babiloni,

¹⁴ vambugura kutura mu mugizi gwu mulindi wi inyumba yu vwami, ma nivambiika hasi hu vulindi vwa Gedalia, mwana wa Ahikamu, mwisukulu wa Shafani. Gedalia yalora ndi inzi nzie yengo nu murembe. Kunangwa ndaamenya uwene yeyo hagati ha avandu.

Lisuuvirizwa lia Ebedimeleki

¹⁵ Lwa ndaali nindavofwa mu mugizi gwu mulindi wi inyumba yu vwami, Yahova yambolera,

¹⁶ nzie mbolere Ebedimeleki kutura Ezopia ndi Yahova Wuvunyali, Nyasaye wa avandu va Isiraeli avoora, “Gaveeye vuzwa kuli ndaalaga, ndi ndaleta ikivi ku lidaala yili kandi si ndaleta uvugasu kulio mba. Ivi ulalola yaga nigakoleka.

¹⁷ Navuzwa Inzi Yahova, ndakohonyia, kandi siulavikwa mu zinguru zia vandu va utizaa mba.

¹⁸ Inzi ligali ndakohonyia, kandi si uliitwa mba. Ivi ulahononoka kutura mu likuza, kigira umali kusuuvira inzi. Inzi Yahova, mali kovora.”