Jeremia 37 - KITABU KITAKATIFU

Mwami Zedekia Yateeva Jeremia Kusaala

¹ Mwami Nebukadineza wa Babiloni yakola Zedekia mwana wa Josia kuva mwami wi Ivuyuda mu vogono vwa Jehoyakini mwana wa Jehoyakimu.

² Navuzwa Zedekia, vanene veve anoho avandu si vaatia likuva lia Yahova yaali nambeeye mba.

³ Mwami Zedekia yatuma Jehukali mwana wa Shelemia kandi musaalisi Zefania mwana wa Maaseia koteeva inzi saale ku Yahova Nyasaye wiitu kigira avandu vihiiri yitu.

⁴ Ndaali ningikiri kuvikwa mu vuhambe; ndaali ningikiri muvoholore ningendaa hagati ha avandu.

⁵ Liihi lia Babiloni liali nilikumbilizaa Jerusalemi, navuzwa lwa vahulira ndi liihi liu mwami wa Egebeti limali kusiila lwako lwa Egebeti, vamanya nivilana inyima.

⁶ Maku Yahova, Nyasaye wa Isiraeli yambolera

⁷ mbolere Zedekia ndi, “Liihi liu mwami wa Egebeti liveeye nuvuha kokokonya, navuzwa lilirana yengo.

⁸ Maku avandu va Babiloni valirana, nu kwingilira lidaala, nukuligumira kandi nu kulisamba nu muliru.

⁹ Inzi Yahova, mwiganihizaa muvuli kwigaada aveene ni muganaganaa ndi avandu va Babiloni valavula kuuza, valaza.

¹⁰ Kali niiva mulaguuta liihi liosi lia vandu va Babiloni, mavatigale avamali kurumindwa veng'ine nivagoni mumahema gaavo, avandu yavo vanyara kuvuka nukusamba lidaala yili nu muliru.”

Jeremia Yagumirwa nakuvikwa mu Vuhambe

¹¹ Liihi lia vandu va Babiloni lirana inyima kutura Jerusalemi kigira liihi liu mwami wa Egebeti liali niliesuunda ahimbi.

¹² Kunangwa ndaatula Jerusalemi ninzia mukivala cha Benjamini konyoora kedonye chi miandu jiange kutura mu miandu ja avinyumba yange.

¹³ Navuzwa lwa ndaaduuka mu kirivwa cha Benjamini, umundu walangwa Irija, mwana wa Shelemia mwisukulu wa Hanani, munene ulindaa avasikari vaaliho ku miyinzi, yasingiriza navoora, “Ivi ung'anyaa kuzia mu vandu va Babiloni!”

¹⁴ Inzi ndaativura, “Gaveeye ndio mba! Ng'anyaa mba.” Navuzwa Irija si yambuliriza mba. Nitali, yang'umira nambira ku avanene.

¹⁵ Vaali nu vutima vululu ku inzi, kandi nivalaga ngubwi ma nivaambanira munyumba ya Jonazani mung'odi wu mugizi, uwinyumba yeeye yagirung'anywa nokokorwa umuhambe.

¹⁶ Ndaavikwa mukibizi isi wilirova ku ing'inga indambi.

¹⁷ Lwinyima mwami Zedekia yatumana nzie, kandi hene yaho munyumba yu vwami yaandeva mu vwivisu, “Likuva liveeye kuho kutura ku Yahova?” Ndaamutivulira kandi nimeeda kovora, “Liveeyeho, Ivi uraviikwa mu zinguru ziu mwami wa Babiloni.”

¹⁸ Maku ndaateva, “Inzi mbunaji lilago ki ku ivi anoho ku avanene vovo anaho avandu yava, agakoli ivi umbika mu vuhambe?

¹⁹ Kindiki chekoleka ku avaporofeti vovo avakovoolera ndi mwami wa Babiloni si alakwingilira anoho kwingilira kivala?

²⁰ Navuzwa kalunu, Wuluyali, inzi ngogonya umbuliri kandi okole agandeevaa. Mwaza nuyanza utambira kandi mu vuhambe munyumba ya Jonazani mba. Niiva ulakola ndio, gaveeye giligali ndakuzilayo.”

²¹ Kunangwa mwami Zedekia yalaga inzi mbanirwi mu mugizi gwinyumba yu vwami. Ndaamenya hene yaho, na vuli lidiku ndaahevwa mugadi kutura munyumba yokolombela mu migadi kuduuka lwi migadi josi mu lidaala jafwa.