Jeremia 36 - KITABU KITAKATIFU

Baruki Yasomaa Ikaratasi ilingiywi mu Litembeli

¹ Mu muhiga gwa kane gwa Jehoyakimu mwana wa Josia yaali mwami wi Ivuyuda, Yahova yamoloma na inzi,

² “Vugula ikaratasi ilingiywi na ong'ode ku amakuva goosi agaamali kokovoolera kigira avandu va Isiraeli na avandu vi Ivuyuda kandi ni zihiiri ziosi. Ong'ode amakuva goosi agandakovolera kutura ing'inga ya ndamoloma ku ivi mulitanga, lwa Josia yaali mwami kuduuka lero.

³ Namusia lwa avandu vi Ivuyuda vahulira kigira lidiviza liasaaviraa koleta kuvo, valagirung'ana kutura kuzinzira ziu vudamanu. Maku ndavasamiiha uvudamanu vwavo kandi uvwoni vwavo.”

⁴ Kunangwa ndaalanga Baruki mwana wa Meria, kandi ndamuvolera ang'ode makuva goosi aga Yahova yaali niyamboleye. Baruki yang'oda amakuva yaga goosi kukaratasi ilingiywi.

⁵ Maku ndaha Baruki amalago yaga: “Inzi si mbugirilwi kuzia mu Litembeli mba.

⁶ Navuzwa nyenya ivi uzie mulitembeli ing'inga elondaku lwa avandu vaveeye ni lihonga lilia. Osome vudinyu imbiri wa avandu amakuva gaveeye ku karatasi yiyi, kunangwa avandu vaduuki kuhulira amakuva goosi aga Yahova amali kombolera, kandi aga ivi umali kong'oda. Okole yaga havundu ha avandu vosi vanyara kuhulira, nivaveeye mu harara na avandu vi Ivuyuda avazi kutura mu madaala gaavo.

⁷ Namusia valasaala ku Yahova kandi valagirung'ana kutura kuzinzira ziavo zindamanu, kigira Yahova umali kutihiza avandu yava nu vutima vwivwe vonene ligali.”

⁸ Kunangwa Baruki yaasoma amakuva ga Yahova mu Litembeli kuli ndaali nimuvoole akole.

⁹ Ku mweli gwa tisa ku muhiga gwa katano lwa Jehoyakimu yaali mwami wi Ivuyuda, avandu vosi mu Jerusalemi kandi avandu vosi avaazaa kutura mu madaala gi Ivuyuda valandiza lihonga lilia imbiri wa Yahova.

¹⁰ Maku, lwa avandu vosi vaali ni vahuliriza, Baruki yaasoma amakuva goosi kutura ku karatasi yaali nililingiywi kuli ndaali nimboye. Yakola yaga naveeye mu Litembeli, mu keng'oze cha Gemaria mwana wa Shafani, mung'odi wi keng'oze chu mugizi gwa higulu ahimbi nu vwingiliru vwi kirivwa kihia chi Litembeli.

Baruki yasoma ikaratasi ilingiywi ku vanene

¹¹ Lwa Mikaya mwana wa Gemaria, mwisukulu wa Shafani, yahulira amakuva goosi ga Yahova, kutura ku ikaratasi ilingiywi,

¹² yazia munyumba yu vwami, mukeng'oze chu mung'odi, uwa avanene vosi vaali ni viikaye: Elishama, mung'odi wu mugizi, Delaya mwana wa Shemaya, Elinazani mwana wa Akibori, Gemaria mwana wa Shafani, Zedekia mwana wa Hanania kandi harara na avanene vandi vosi.

¹³ Mikaya yavavolera amakuva goosi aga yahulira Baruki nasomaa imbiri wa avandu.

¹⁴ Maku avanene vaatuma Jehudi mwana wa Nezania, mwisukulu wa Shelemia kandi kisukururwi cha kushi azie kovoolera Baruki aleete ikaratasi ya makuva gasomi imbiri wavandu. Kunangwa, Baruki yaahira ikaratasi yaali nilingiywi.

¹⁵ Avanene vaamuvolera, “Yikala hasi ma okosomere ikaratasi ya makuva yago.” Kunangwa Baruki yakola ndio.

¹⁶ Inyima wa Baruki yaali niyakasoma, vaahenzana aveene kuvene nuvuti, kandi vavoolera Baruki, “Gakuduukiraa kovolere mwami makuva yaga goosi.”

¹⁷ Maku vateva Baruki, “Kovolere kalunu ndi, Ivi waang'oda ndi makuva yaga goosi? Jeremia yamoloma na ivi nong'oda?”

¹⁸ Baruki yavativulira, “Jeremia yamoloma makuva yaga ku inzi, na ndagang'oda nu vwinu ku karatasi ilingiywi.”

¹⁹ Maku avanene vavoolera Baruki, “Ivi harara na Jeremia gamuduukira mwivisi. Mundu kali mulala atamanya hamuveeye mba.”

Mwami asambaa Ikaratasi Ilingiywi

²⁰ Kunangwa, avanene mu keng'oze cha Elishama, uwaali mung'odi mu mugizi, nivaviika ikaratasi ilingiywi yavaali nayo mu keng'oze cha Elishama, ni vazia mu mugizi gwu mwami, nivavolera mwami makuva goosi.

²¹ Maku mwami yatuma Jehudi azie koleta ikaratasi ilingiywi kutura mu keng'oze cha Elishama. Jehudi yaleeta ikaratasi ilingiywi, naagesoma imbiri wu mwami harara na avanene, vosi avaari ni vasingiyi ahimbi nu mwami.

²² Gwaali mweli gwa tisa, ing'inga yu vukindu lwu umwami yaali ni yikaye munyumba ya vooteramu muliru, na yaali ni yotaa muliru.

²³ Nonoho lwa Jehudi yaali ni yakasoma lilohiza lia kavaga anoho lia kane lia mang'oda, umwami yavugula ikaratasi ilingiywi naagikaranyia nu muvano ma nagisiuva mu muliru kuduuka niihia ligali.

²⁴ Navuzwa umwami anoho avanene veve avaahulira amakuva yaga goosi, si vaali nuvuti kinga si vaamanyiaku liiva liosi liu vovereri mba.

²⁵ Kali niiva Elinazani, Delaya na Gemaria vagoonya umwami avuli kusamba ikaratasi ilingiywi, navuzwa siyenya kuhulira mba.

²⁶ Maku umwami yalaga Jerahameeli mwana weve, harara na Senaya mwana wa Abudeeli, vaang'umiri inzi harara na Baruki mung'odi wange. Navuzwa Yahova yaali naakuvisi.

Jeremia Yang'oda Ikaratasi yindi ya Makuva

²⁷ Inyima wu mwami Jehoyakimu yaali ni yakasamba ikaratasi ilingiywi ya Baruki yaali nang'odi kutura kuli ndaali nimuvoleeye, Yahova yambolera

²⁸ mbuguli Ikaratasi yindi ma ng'ode ku amakuva goosi agaali ku Ikaratasi yukutanga ya Jehoyakimu mwami wi Ivuyuda yaali nasambi.

²⁹ Yahova yambolera mbolere mwami ndi, “Ivi umali kusamba Ikaratasi ilingiywi, kandi oteevi Jeremia kigira ki yang'oda ndi mwami wa Babiloni alaza kandi aladiviza kivala yiki nu kwita avandu vamenyi mu kandi zinyama.

³⁰ Kunangwa, kalunu inzi Yahova, mboraa ku ivi mwami Jehoyakimu ndi, sihalavaho ni kisukururwi chicho kali kilala kiliamiiha ku vwami vwa Daudi mba. Ulakuza na muviri gugwo gulasuvwa havundu hu luya lidiku liosi kandi gulazilira mu ing'inga yu vudiku.

³¹ Ndakahaane amageri ku ivi, visukululwi vivio, kandi avanene vovo kigira uvwoni vwa mumali kokora. Ivi anoho avandu va Jerusalemi ni Ivuyuda si mwahulira lieganihiza liange mba. Kulwayago, ndakaleteku munyi vosi kivi cha mali koleta kuli litihiza.”

³² Maku ndaavugura Ikaratasi yindi niimbana ku Baruki mung'odi wange, kandi nang'oda amakuva goosi agandamuvoolera. Yang'oda vuli kindu choosi ichaali ku ikaratasi yukutanga kandi amakuva malala mere aga ndaamuvolera.