Jeremia 35 - KITABU KITAKATIFU

Jeremia na Vandu va Rekabu

¹ Lwa Jehoyakimu mwana wa Josia yaali mwami wi Ivuyuda, Yahova yambolera,

² “Zia ku vandu vi hiiri ya Rekabu na omolome kuvo. Maku uvalete mukeng'oze kilala ku ving'oze viu mulitembeli ma uvahe iwaini.”

³ Kunangwa ndaavugura ihiiri yoosi ya vandu va Rekabu-Jaazania mwana wa Jeremia, waali mwana wa Habazinia na avamwavo vaavo vosi na avana vaavo

⁴ nimbaleeta mu Litembeli. Ndaavahila mu keng'oze cha aviigi avumuporofeti Hanani mwana wa Igidalia. Keng'oze yicho chaali igulu ku keng'oze cha Maaseia mwana wa Shalumu munene wikivuni mu Litembeli himbi kuving'oze via vanene vandi.

⁵ Kunangwa ndahaana ku vandu va Rekabu iwaini mu vikombe nuku zisahani niyizuuyi nimbavolera, “Munwi iwaini yiyi.”

⁶ Navuzwa vaativura, “Kunwezaku iwaini mba. Jonadabu mwana wa Rekabu, baba wiitu yakulaga navoora, ‘Munyi anoho mutanwa iwaini, munyi avana vinyu mutakanywi iwaini mulimenyalinyu liosi mba;

⁷ kandi yakovolera mutumbaka inyumba mba, mutamiiza vuguza mba, mutataaga anoho kuva nikizabibu mba, navuzwa mulamenya mu mahema madiku ginyu goosi, maku mulamenya madiku manyingi mukivala chamuveeye mu kuli avageni.’

⁸ Kunyi kwamala kutia amigizu ga Jonadabu mwana wa Rekabu baba wiitu, mu goosi agayakulaga, kuvuli kunwa iwaini mu madiku giitu goosi, kunyi aveene, avakali viitu, avana viitu, anoho avakaana viitu,

⁹ kandi kutumbaka zinyumba ziokomenya mu mba. Sikoveeye nikizabibu anoho mulimi anoho vuguza mba;

¹⁰ navuzwa kwamenya mu mahema, kandi kwamala kutia nokokola goosi aga Jonadabu baba wiitu yakulaga.

¹¹ Navuzwa lwu mwami Nebukadineza yingilira kivala, kwatovola kuzia Jerusalemi kove ihale kutura ku avilihi va Babiloni na Siria. Yiki nicho kigira komenyaa mu Jerusalemi.”

¹² Maku Yahova Wuvunyali, Nyasaye wa Isiraeli yambolera

¹³ zia ovoolere avandu vi Ivuyuda na Jerusalemi, “Inzi Yahova ndeva munyi, kigira ki mwasuura kumbulira kandi nukutia amalago gange?

¹⁴ Ivisukulurwi via Jonadabu vamali kutia malago geege kuvula kunwa iwaini, kandi kuduuka na lero avulaho umundu kali mulala unwezaa iwaini mba. Navuzwa inzi nzizagilira komoloma ku munyi na simutizaa inze mba.

¹⁵ Nzizagilira kumutumira avaporofeti avatumikiri vange vosi, kandi vamali ku muvooleraa muleke likora lienyu liuvuchamu na mukore agaveeye malungi. Vaamwiganihizaa kuvula kusigamira nukutumikira avanyasaye vandi, kunangwa muzizagiliri komenya mukivala cha ndamuha navaaguuga vinyu. Navuzwa simwahulira inzi mba.

¹⁶ Visukululwi via Jonadabu vimali kutia lilaga lia vaguuga vaavo vahaana kuvo, navuzwa avandu munyi simutizaa inzi mba.

¹⁷ Kunangwa kalunu, Inzi, Yahova Wuvunyali, Nyasaye wa Isiraeli, ndaleta ku munyi avandu vi Ivuyuda na Jerusalemi lidiviza liosi liandalaga. Ndakora yaga kigira simuhuliyi lwa molomi ku munyi, kandi simwali munyala kuhaana mativuli lwa ndaamulanga mba.”

¹⁸ Maku ndaavoolera ihiiri ya vandu va Rekabu ndi, Yahova Wuvunyali, Nyasaye wa Isiraeli, avoora, “Munyi mwatia amalago agaguuga winyu Jonadabu yamuha; munyi mumali kolonda amalago geege goosi na mukoli vuli kindu chayamulaga.

¹⁹ Kunangwa inze, Yahova Wuvunyali, Nyasaye wa Isiraeli, ndagaa ndi Jonadabu mwana wa Rekabu nave nikisukululwi musaza wu kundumikira mihiga ni mihiga.”