Jeremia 34 - KITABU KITAKATIFU

Likuva ku Zedekia

¹ Yahova yamoloma ku inzi lwu mwami Nebukadineza wa Babiloni ni liihi lilie, vakonyelera avasikari vi liihi kutura muvivala viosi nizihiiri ziali hasi hi liamiiha lilie vingilira Jerusalemi namadaala ga himbi.

² Yahova, Nyasaye wa Isiraeli, yambolera nzie mbolere mwami Zedekia wi Ivuyuda ndi, “Inzi, Yahova nambane lidaala yili ku mwami wa Babiloni kandi nalisambe.

³ Si mulahononoka kutura kuye mba; navuzwa mulagumirwi manamuhirwi kuye. Mamumulore moni na moni kandi namulomome naye mwene; maku namuzie Babiloni.

⁴ Zedekia uhuliri agambola kigira ivi. Ivi siulitirwa mu vulwani mba.

⁵ Ivi ulakuzira mu mirembe, kandi kuli avandu vasamba ivifunya mwayu lwa vayavira avaguuga vovo avaari vami imbiri woovo, navakusambiri ivifunya mwayu munzira kuli yene yeyo. Navakusiomere nivavoora, ‘Mwami wiitu akuzi!’ Inzi, Yahova, mali kovora.”

⁶ Maku ndaavoolera mwami Zedekia makuva yaga mu Jerusalemi

⁷ ing'inga yi liihi liu mwami wa Babiloni lingilira lidaala. Liihi lingilira kandi Lakishi na Azeka, amadara gizimbinga geng'ine a gaali nigatigaaye mu Ivuyuda.

Likolera Avatugwa Vugadi

⁸ Yahova yamoloma na inzi lwa wami Zedekia na avandu va Jerusalemi vaali nivamali kolomba lilagana yokovoholora

⁹ avatugwa vaavo Avaheburaina, vosi avasaza navakari, kunangwa avuli kuvaho umundu wa Isiraeli oveeye kuli umutugwa.

¹⁰ Avandu vosi na aviimiliri vaavo vavugirizana kovoholora avatugwa vaavo kandi vavuli kuvakola avatugwa mba. Kunangwa vavavoholora,

¹¹ navuzwa inyima vagirung'anyia zing'anagani ziavo, nivaviiranyia, kandi nivavaniga kugwa avatumwa kuzingulu.

¹² Maku Yahova,

¹³ Nyasaye wa Isiraeli yambolera mbolere avandu: “Inzi ndaalomba lilagana navaaguuga vinyu lwa ndaavahonyia kutura Egebeti nukuvavoholora kutura muvutugwa. Inzi ndaavavoolera ndi

¹⁴ Vuli mihiga saba valavoholora mutugwa woosi Muheburaina uwatumika ku mihiga sita. Navuzwa avaguuga vinyu sivategiza amatu nukuhulira agandaavola mba.

¹⁵ Kunangwa kumadiku makekeeke gavitii mwagirung'anyia zing'anagani zienyu nimukora aganyaanzizaa. Munyi vosi mwavugilira kovoholora avandu va Isiraeli vache, kandi mwalomba lilagana imbiri wange, mu Litembeli aha sigamirwa.

¹⁶ Navuzwa mwamanya nimugirung'anyia zing'anagani zienyu kandi nimuvula kumba luyali. Munyi vosi mwavugula avatugwa vamwali nimwavoholora kuli venya, kandi mwavaniga kugwa avatugwa.

¹⁷ Kunangwa kalunu, Inzi, Yahova, mboraa ndi munyi simwatia inzi mba: Simwavoholola vandu va Isiraeli vache vinyu mba. Nivulahi, nitali inzi ndamuha ovovoholore vwavo mba. Nivulahi, nitali inzi ndamuha ovovoholore: Ovovoholore kukuzira muvulwani, nuvulwaye kandi ninzara. Ndakora vuli ihiiri mulirova kuva nuvuti vonene ligali kuli agamungolera.

¹⁸ Avandu vamali kuvunaga lilagana liange kandi vavuli kutwekiza liiva lie lilagana lia valomba ibiri wange, nambakore kuli kemoli chakaranywamu haali kaviri ma nivavitira hagati hividonye viacho.

¹⁹ Aviimiliri vi Ivuyuda na Jerusalemi, vatumikiri vumugizi gwi inyumba yu vwami, avasaalisi kandi avandu vosi vikivala vavitira hagati hividonye viekemoli,

²⁰ ndavaviika ku vasigu vaavo avenya kuviita. Miviri jaavo mikuzu najiliivwi namanyonyi, nizinyama ziumuvulimu.

²¹ Kunangwa ndahaana mwami Zedekia wi Ivuyuda navatumikiri veve ku yavo avenya kuviita. Kandi ndavaviika ku liihi lia avandu va Babiloni, iliali nilialekera kuvingilira.

²² Nambane lilaga, kandi navirane mu lidaala yili. Vaza vavingiliri, navaligumiri ma navalisambe numuliru. Nangore madaala gi Ivuyuda nagagwi kuli changalangwi havundu humundu atamenyi. Inzi, Yahova, mali kovora.”