Jeremia 33 - KITABU KITAKATIFU

Lilaga na lindi lie Lisuuvirizwa

¹ Lwa ndaali ningikiri mu vuhambe, mu mugizi gwi inyumba yu vwami, likuva lia Yahova liaduuka ku inzi kandi.

² Yahova walomba lirova, kandi naalivika muvogono vwa lio, lieta lilie liveeye Yahova, yavoola,

³ “Waniri ku inzi, na inzi ndakutivulira. Ndakovolera vindu vinene ligali kandi viaviswa via ivi utamanyi mba.

⁴ Inzi Yahova Nyasaye wa avandu va Isiraeli, mboraa ndi, ndasambura zinyumba ziosi zia Jerusalemi kandi ni zinyumba ziu vwami zie Ivuyuda lwa avandu va Babiloni vavakumberiza kandi vavingilira.

⁵ Valala valalwaana avandu va Babiloni, avaazaa vizulizi zinyumba ni miviri ja vakuzu ja yavo avaananziti mu muvutima vwange. Inzi mali kugirung'ana kutura ku lidaala yili kigira uvudamanu vwa avandu valio vamali kokora.

⁶ Navuzwa ndahonyia lidaala yili kandi ndilanyia avandu valio nu kuvaha uvulamu. Valamenya mu mirembe kandi mu likingwa liange.

⁷ Ndiilanyila avandu vi Ivuyuda kandi avandu va Isiraeli uvutugi vwavo, nu kuvakola vave kuli valange maziambiri.

⁸ Ndatakasa uvwoni vwa vamali kongolera vwosi, kandi ndasamiiha uvwoni vwavo vwosi vwa vamali kwibaala ku inzi.

⁹ Jerusalemi ilava kuli kisenukiru chu vusangali, uvukumi kandi lizominywa, kandi zihiiri ziosi zie lirova zilava nu vuti kandi ni lidegera lwa zihulira kigira vindu vilahi via ngolera avandu va Jerusalemi kandi kigira ligasizwa liambaana ku lidaala yili.”

¹⁰ Yahova yavoola, “Avandu vavoola ndi havundu hano haveeye kuli ichangalangwi, kandi avandu anoho zinyama si zinyala komenya havundu yaaha mba. Yaga gaveeye malungi, amadara gi Ivuyuda kandi zinzira zia Jerusalemi ziveeye hazwa; avandu anoho zinyama si zimenyi havundu yaaha mba. Navuzwa havundu hene yaaha mulahulira kandi

¹¹ lihanzuka liu vuyanzi kandi liu vusangali vwa oyo osererwa kandi osereranga. Avandu valimba nokoleta vihaanwa vie lisaandiza mu Litembeli liange; valavoora, ‘Muhaane lisaandiza ku Yahova Wuvunyali, kigira aveeye mulahi, kandi vuyanzi vwivwe vutali nekeheri vuhindiraa mihiga ni mihiga.’ Ndakora kivala yiki kuva chu vugasu kuli chaalange maziambiri. Inze Yahova, mali kovora.”

¹² Yahova Wuvunyali Vwosi avoora, “Mukivala yiki, ekeveeye kuli ichangalangwi, havundu ha avandu anoho zinyama zitamenyi, kilava kandi uvwayiru vwosi, havundu ha avayi navahile iviayo viavo.

¹³ Mu madaala gaveeye mu kivala chi vigulu, kandi mu madaala ga Shefela, kandi mu madaala ga Negebu, mukivala cha Benjamini, mu madaala ga Jerusalemi kandi madaala gi Ivuyuda, avayi valavaliza iviayo viavo vinyingi. Inzi Yahova mali kovora.”

¹⁴ Yahova avoora, “Ing'inga yiza lwa inzi ndiduukiza lilagana liange liandalomba ku avandu va Isiraeli ni Ivuyuda.

¹⁵ Ing'inga yene yeyo ndakatovole kisukururwi kilungu cha Daudi kuva umwami. Mwami oyo alakakole agaveeye amalungi kandi likalaga lirungi mukivala choosi.

¹⁶ Avandu vi Ivuyuda na Jerusalemi valahonywa kandi valamenya mu mirembe. Lidaala linene yili lilangwa ‘Yahova Muhonyi Wiitu.’

¹⁷ Inzi, Yahova, mali kulaga ndi, kisukururwi cha Daudi kilava mwami wa avandu va Isiraeli mihiga ni mihiga,

¹⁸ kandi avasaalisi kutura mu ihiiri ya Levi valandumikira, kandi valahaana vihaanwa viu kusamba, vihaanwa viu vuswage kandi visiuviliru mihiga ni mihiga.”

¹⁹ Yahova yambolera,

²⁰ “Niiva mulavunaga lilagana liange mbasu kandi vudiku, kunangwa lidiku liene yilio nu vudiku vwene yivwo vuvuli kuduuka ku ing'inga idukanaa,

²¹ hene yaho indagano yange na Daudi mutumikiri wange, kandi indagano yange na vandu va Levi kuli avasaalisi avatumikaa imbiri wange, ilavunagwa; kandi Daudi sialava ni kisukururwi kiliamiiha mu vwami vwivwe mba.

²² Visukululwi via Daudi mutumikiri wange kandi avasaalisi kutura mu ihiiri ya vandu va Levi valamedeka, kunangwa vaduuki kuva avanyingi ligali kuli zing'ereng'ani ziveeye mu ligulu anoho kuli zinzaro ziu muyeke mu inyanza.”

²³ Yahova yambolera,

²⁴ “Ivi oveeye ni limanyiriza ku makuva ga vandu vavoola ndi, Inzi mali kusura avandu va Isiraeli kandi avandu vi Ivuyuda, ava inzi ndaatovora? Avandu yava vachayi kandi valegerizi avandu vange, na si vavavuguye kuva kandi ihiiri imbiri wavo mba.

²⁵ Navuzwa Inzi Yahova, mbeeye ni indagano ni lidiku kandi nu vudiku, kandi mali kolomba amalago kwamiiha ligulu ni lirova.

²⁶ Ligali kuli mali kokora yaga, kunangwa ndadinyiriza lilagana liange ni visukululwi via Yakobo harara na Daudi mutumikiri wange. Ndatovora mulala ku visukululwi via Daudi kwamiiha visukululwi via Aburahamu, Isaka na Yakobo. Ndavera avandu vange zimbavasi kandi ndavagasiza ni miandu kuli vaali maziambiri.”