Jeremia 32 - KITABU KITAKATIFU

Jeremia Yagula Mulimi

¹ Yahova yamoloma ninzi mu muhiga gwi Likomi lwa Zedekia yaali mwami wi Ivuyuda, yigu gwaali kandi muhiga gwa 18 lwa Nebukadineza yaali mwami wa Babiloni.

² Ing'inga yene yeyo iliihi liu mwami wa Babiloni lilakumberiza kandi lingilira Jerusalemi, na inzi Jeremia ndaakorwa muhambe mu mugizi gwi inyumba yu mwami wi Ivuyuda.

³ Mwami Zedekia yaali ni yangoli kuva muhambe, kandi niyanzaala kovora ndi, inzi mboraa ndi Yahova avoora, “Inzi ndahaana lidaala linene yili ku mwami wa Babiloni,

⁴ na mwami Zedekia wi Ivuyuda si alahononoka kutura mu zinguru zia avandu va Babiloni mba navuzwa alaviikwa mu zinguru ziu mwami wa Babiloni. Alalolana naye moni na moni kandi alamoloma naye naveeye muvuhambe.

⁵ Zedekia alahilwa mu Babiloni, na alavayo kuduuka lwamukolela agadukanaa naye. Kali niiva alalwana avandu va Babiloni, si alaguuta mba. Inzi Yahova mali kovora.”

⁶ Yahova yambolera ndi,

⁷ Hanameli mwana wa Shalumu naveeye koza wange alaza ku inzi nokongoonya nguli mulimi gwigwe ogoveeye ha Anazozi mu kivala cha Benjamini, kigira inzi mbeeye mwiko weve wa ahimbi ligali kandi mbeeye nuvunyari kugura mulimi yigu.

⁸ Maku, kuli Yahova yaali navooye, Hanameli yaza ku inzi mu mugizi gwi inyumba yu vwami, hene yaho, yaandeva nguli mulimi. Kunangwa, ndaamanya ndi Yahova yaali naamulomi na inzi ligali.

⁹ Maku ndaagula mulimi kutura ku Hanameli ha Anazozi mukivala cha Benjamini, ku vuguli vwi vidonye 17 vie ifeza.

¹⁰ Inzi ndaviika ku mukono ku ibarwa yu mulimi yiyi, kandi nimbika ku muhuri. Ndaalanga avaloli kuva avalolekizi, kandi ndaamugelera vidonye 17 vie ifeza ku ziratiri.

¹¹ Maku, ndaavugura zibarwa ziombi zia kwagulanira mulimi, ibarwa ya ndaavikaku muhuri iyaali amalago kandi iliiva nilienya liu kugurana mulimi kandi ne ekopi yaali inzalamu.

¹² Ndaavugura zibarwa ziene yizi niimbana ku Baruki, mwana wa Neria kandi mwisukulu wa Mahaseya. Avandu vaaliho mu lihaana yili vaali: Hanameli, avaloli vaali ni vaviikiku mukono gwaavo, harara na Avayuda vosi avaari ni vikaaye mu mugizi gwi inyumba yu vwami.

¹³ Imbiri wa avandu yava vosi, ndaavolera Baruki,

¹⁴ “Yahova Wuvunyali, Nyasaye wa avandu va Isiraeli, alagi ivi uvuguli zibarwa yizi, ziombi, ibarwa yi ligulana mulimi iyaavikwa ku muhuri kandi nibarwa inzalamu ma uziviiki ku kiju chovodohi, kunangwa ziduuki komenya madiku manyingi.

¹⁵ Yahova Wuvunyali, Nyasaye wa avandu va Isiraeli, umali kovora ndi, zinyumba, milimi kandi vizabibu vilagulwa kandi mukivala yiki.”

Lisaala lia Jeremia

¹⁶ Inyima wa ndaali nindaakahaana zibarwa zie ligulana mulimi ku Baruki mwana wa Neria, ndaasaara ku Yahova nimbora,

¹⁷ “Mwami munene Yahova, ivi walomba ligulu ni lirova kuzinguru zizio zinene kandi ku vunyali vuvwo. Si keveeyeho kindu kinyala kutama ivi mba.

¹⁸ Ivi umali kumanyia uvuyanzi vutali nekeheri ku avandu zielefu, navuzwa kandi uhaanaa amageri ku avandu kigira uvwoni vwa avaguuga vaavo. Ivi oveeye Nyasaye munene ligali kandi wi zinguru; Oveeye Yahova Wuvunyali Vwosi.

¹⁹ Olomba lilohiza lie zing'anagani kandi okolaa vindu vie zinguru; ololaa vindu viosi via avandu vakora, kandi uvahezaa madanyi kolondekana ni vikolwa viavo.

²⁰ Mu zing'inga zia kale, wakola vilolekizu kandi viokogenya mukivala cha Egebeti, kandi umali kuzizagilira kuvikola kuduuka ing'inga yiyi, mu Isiraeli kandi hagati zihiiri zindi ziosi, kunangwa kalunu wamanyikana havundu hoosi.

²¹ Ivi waleeta avandu vovo Isiraeli kutura mukivala cha Egebeti ni vilolekizu kandi ni viokogenyia, mu zinguru zizio zinene ligali kandi ku vunyali vuvwo.

²² Ivi wavaha kivala yiki kuli waali ni wisuhira avaguuga vaavo kuvaha kivala cha malova magunamu.

²³ Lwa vaduuka mukivala yiki, vaavugura miandu josi jaali mucho, navuzwa si vaatia amalago googo anoho si vamenya kolondekana na amagizu googo mba. Si vaakora kindu ku viosi via waali ni wavalaga mba. Kulwayago, ivi waleeta lidiviza yili liosi kuvo.

²⁴ “Avandu va Babiloni vamali kwumbaka vitumi kukumbiriza lidaala linene kandi kuligumira nu kulingilira. Liihi, inzara enene kandi vulwaye vilalomba lidaala linene yili kuva mu zinguru zia avandu va Babiloni. Goosi aga walaga gamali kuduukizwa.

²⁵ O, Yahova Mwami Munene, ivi walaga inzi kugura mulimi imbiri wa avaloli, kali niiva lidaala linene yili liveeye ahimbi kugumirwa na avandu va Babiloni.”

²⁶ Maku Yahova yambolera,

²⁷ “Inzi mbeeye Yahova, Nyasaye wa avandu vosi. Keveeyeho ni kindu kinyala kutama inzi?

²⁸ Ndahaana lidaala linene yili ku mwami Nebukadineza wa Babiloni harara ni liihi lilie, kandi valaligumira.

²⁹ Valahambiza muliru ku lidaala liene yili, nukulisamba ligali; harara ni zinyumba zia avandu vaanomba kuva nu vutima ku lisaamba vimuli ku Baali ku visegese vie zinyumba, kandi ku lisundula vihaanwa vie Iwaini ku avanyasaye vandi.

³⁰ Avandu va Isiraeli kandi avandu vi Ivuyuda vamali kokora uvudamanu imbiri wange kutura mu vosooleri vwavo. Avandu va Isiraeli vamali kumbihiliriza kumiyinzi jaavo.

³¹ Avandu vi lidaala linene yili vamali kuvuukiza vutima vwange kutura ing'inga lidaala yili liumbakwa. Kulwayago, mali kusaavira kulidiviza ligali,

³² kigira uvudamanu vwosi vwa avandu vi Ivuyuda kandi Jerusalemi vamali kokora, harara na avami vaavo kandi na aviimiliri vaavo, na avasaalisi kandi na avaporofeti vaavo.

³³ Vamali kugirung'ana kutura ku inzi, kali niiva ndaazizagilira kuvigiza, navuzwa si venya kuhulira kandi kwiga mba.

³⁴ Kali vaviika vifwananyi viavo viu kuvihiliriza mu Litembeli liumbakwa kigira lisigamira, kandi vamali kuliononyia.

³⁵ Vamali kwumbakira Baali uvwali mu livona lia Hinomu, vaduuki kuhaanira umunyasaye Moleki avayaayi vaavo kandi avakaana vaavo vave kuli visiuviliru. Inzi si ndaavalaga vakole yaga mba, kandi si gaali ku kali muziganagani ziange vakole vindu kuli yivi nokolomba avandu vi Ivuyuda kokora uvwoni mba.”

Lilaga na lie Lisuuvirizwa

³⁶ Yahova Nyasaye wa avandu va Isiraeli yambolera, “Jeremia, avandu vavoola ndi, iliihi, Inzara, kandi uvulwaye vilalomba lidaala linene yili lilava mu zinguru ziu mwami wa Babiloni. Kalunu huliriza ku agandi goosi agambooraa.

³⁷ Inzi ndaleta avandu vosi harara kutura muvivala viosi via ndaavahilamu muvutima vwange kandi mu livihirirwa liange, ndavilanyia havundu hano na ndavakora vamenye nimirembe.

³⁸ Maku, valava avandu vange, na inzi ndava Nyasaye wavo.

³⁹ Ndavaha mwoyo mulala, kandi liiva lilala, vaduuki kutia inzi mihiga ni mihiga, ku vulahi vwavo aveene, kandi ku vulahi vwi visukululwi vaavo.

⁴⁰ Ndalomba lilagana liange navo lie mihiga ni mihiga. Ndazizagilira kuvakolera vindu vilahi, kandi ndavakora vatie inzi ni mioyo jaavo josi, kunangwa vavuli kugirung'ana kutura ku inzi.

⁴¹ Ndasangara kuvakolera vulahi, kandi ndavaviika mu kivala yiki mu vusuuvirifu, nu mwoyo gwange gwosi kandi ni liiva liange liosi.

⁴² “Kuli mali koleta ikivi yiki choosi ku avandu yava vosi, kandi ndio ndaleta uvulahi vwosi kuvo, kuli ndaavalaga.

⁴³ Milimi jilagulwa kandi mukivala yiki, ja avandu vavoola ndi jiveeye kuli changalangwi, havundu ha avandu vatamenya mba, anoho zinyama zitamenya mba, kandi kilahanwa ku avandu va Babiloni.

⁴⁴ Avandu valagula milimi yiji, na ligulana liajo lilang'odwa nu kuviikaku mukono, kandi nu kumiinaku muhuri, imbiri wa avaloli. Yaga galakoleka mu kivala cha Benjamini, mu Jerusalemi kandi mu madaala gi Ivuyuda, mu madaala gi kivala chi vigulu, mu madaala ga Shefela, mu madaala ga Negebu. Ndilanyia avandu kutura mukivala chi liadikizwa, na ndavilanyia mukivala chavo. Inzi Yahova mali kovora.”